ក្រុងវ៉ាស៊ីនតោនៈ ក្រុមហ៊ុនអាមេរិកបានចំណាយ ២,៧ ពាន់លានដុល្លារបន្ថែមទៅលើពន្ធនាំចូលកាលពីខែវិច្ឆិកា ឆ្នាំ ២០១៨។ នេះបើយោងតាមទិន្នន័យដែលចេញផ្សាយ កាលពីចុងសប្តាហ៍មុន
យុទ្ធនាការដែលមានឈ្មោះថា Tariffs Hurt the Heartland ដែលធ្វើឡើងទូទាំងប្រទេសប្រឆាំងនឹងវិធានការពន្ធនាំចូលបច្ចុប្បន្នរបស់រដ្ឋាភិបាលអាមេរិក ដែលបានចេញផ្សាយទិន្នន័យនេះបានឲ្យដឹងថា នេះគឺជាទិន្នន័យប្រចាំខែថ្មីបំផុតដែលអាចរកបាន ដោយសារការបិទទ្វាររដ្ឋាភិបាល រយៈពេល ៣៥ ថ្ងៃ ដែលបានបញ្ចប់កាលពីចុងខែមករា។
ទិន្នន័យនេះបានបង្ហាញថា កំណើននាំចេញរបស់អាមេរិក បានធ្លាក់ចុះមកនៅត្រឹមកម្រិតទាបបំផុតរបស់ខ្លួនកាលពីខែវិច្ឆិកា ឆ្នាំ ២០១៨ មួយផ្នែកដោយសារការធ្លាក់ចុះ ៣៧ ភាគរយក្នុងការនាំចេញផលិតផលដែលប្រឈមពន្ធសងសឹក។
លោក Charles Boustany អ្នកនាំពាក្យរបស់យុទ្ធនាការ Tariffs Hurt the Heartland បានឲ្យដឹងក្នុងសេចក្ដីប្រកាសព័ត៌មានមួយថា៖ «ទិន្នន័យនេះបង្ហាញថា ប្រជាជនអាមេរិកដែលមិនមែនជាដៃគូប្រជែងបរទេសរបស់យើងនោះ ជា អ្នកខាតបង់ដ៏ធំដោយសារតែសង្គ្រាមពាណិជ្ជកម្មនេះ»។
លោកថ្លែងថា៖ «ខណៈដែលការចរចាពាណិជ្ជកម្មរវាងអាមេរិក និងចិនចាប់ផ្ដើមដំណើរការឡើងវិញ យើងសង្ឃឹមថា រដ្ឋាភិបាលនឹងយកចិត្តទុកដាក់លើក្តីបារម្ភរបស់ក្រុមហ៊ុនអាមេរិករាប់ពាន់ក្រុមហ៊ុនបានប្រឈមនឹងតម្លៃពន្ធនាំចូល មិនធ្លាប់មាន ខណៈដែលធ្វើឲ្យមានការរីកចម្រើនបន្ថែមទៀតឆ្ពោះទៅរកទំនាក់ទំនងពាណិជ្ជកម្មកាន់តែប្រសើរ និងការបញ្ចប់សង្គ្រាមពាណិជ្ជកម្ម»។
ទិន្នន័យនាំចូលប្រចាំខែ ត្រូវបានគណនាដោយប្រើប្រាស់តួលេខបានពីការិយាល័យជំរឿនរបស់អាមេរិក ខណៈដែលទិន្នន័យនាំចេញប្រចាំខែ ត្រូវបានពឹងផ្អែកលើតួលេខបានពីការិយាល័យជំរឿន និងក្រសួងកសិកម្ម។
ការសិក្សាមួយចេញផ្សាយដោយក្រុមយុទ្ធនាការនេះបានបង្ហាញថា ការងារជិត ១ លានកន្លែងនៅអាមេរិកអាចបាត់បង់ដោយសារការដំឡើងពន្ធនាំចូលនេះ៕ People''s Daily/LA