.jpg)
សកម្មភាពបុគ្គលិកកំពុងធ្វើការនៅក្នុងរោងចក្រផលិតដែកថែបមួយក្នុងប្រទេសចិន។ ការដាក់ពន្ធលើកដែកថែបនាំចូលទៅអាមេរិក ធ្វើឲ្យតម្លៃកើនឡើង។ AFP
វ៉ាស៊ីនតោនៈ ទោះបីជាកំណើនសេដ្ឋកិច្ចនៅតែបន្តក៏ដោយ ក៏ពាណិជ្ជករ អាមេរិកមានការបារម្ភខ្លាំងអំពីជម្លោះពាណិជ្ជកម្មជាមួយប្រទេសចិន ដែលបានជំរុញឲ្យតម្លៃកើនឡើងកាន់តែខ្ពស់។ នេះបើយោងតាមការអង្កេតរបស់ ធនាគារកណ្ដាលអាមេរិក ដែលបានចេញផ្សាយកាលពីថ្ងៃពុធម្សិលមិញ។
ធនាគារកណ្ដាលអាមេរិក បានឲ្យដឹងថា ដោយសារតែពន្ធនាំចូលច្រើន ដែលបានដាក់ កាលពីខែមុន ដោយប្រធានាធិបតី ដូណាល់ ត្រាំ តម្លៃដែកថែប និង អាលុយមីញ៉ូម បានកើនឡើងទូទាំងប្រទេសនេះ ដែលក្នុងករណីខ្លះកើនឡើងពីរដង។
ការអង្កេតទូទាំងប្រទេសបានបង្ហាញថា ឧស្សាហកម្ម និងក្រុមហ៊ុនលក់រាយជាច្រើននៅក្នុងប្រទេសនេះក៏បានរាយការណ៍ពីការពិបាកក្នុងការស្វែងរកកម្លាំងពលកម្មជំនាញផងដែរ។ ភាពតានតឹងផ្នែកពាណិជ្ជកម្មបានកើនឡើងក្នុងរយៈពេលជាច្រើនសប្ដាហ៍ថ្មីៗនេះ ដោយសារទីក្រុងវ៉ាស៊ីនតោន និងទីក្រុងប៉េកាំង បានសងសឹកគ្នាខ្លាំងក្លារឿងបញ្ហាពន្ធ ។
ជម្លោះនេះផ្ដោតលើការតវ៉ារបស់អាមេរិកលើការរឹតបន្តឹងការវិនិយោគ ចោរកម្មកម្មសិទ្ធិបញ្ញា និងការផលិតលោហធាតុលើសតម្រូវការ។
ធនាគារសហព័ន្ធ Cleveland Fed បានរាយការណ៍តម្លៃដែកថែបក្នុងករណីខ្លះ បានកើនឡើងក្នុងអត្រាពីរខ្ទង់ ខណៈនៅទូទាំងប្រទេសនេះមានសេក្ដីរាយការណ៍របស់ក្រុមហ៊ុនស្ដុកដែកថែបប្រឆាំងនឹងការបង្កើនតម្លៃ។
នៅក្នុងតំបន់ Boston ក្រុមហ៊ុនជាច្រើនបានឲ្យដឹងថា ជម្លោះពាណិជ្ជកម្មបានបង្ហាញ «ហានិភ័យដ៏ធំ» និងថា ពួកគេកំពុងមើលឃើញតម្លៃអាលុយមីញ៉ូមកើនឡើងកាន់តែខ្ពស់។
ក្រុមហ៊ុនមួយបានឲ្យដឹងថា៖ «នៅពេលនេះពន្ធនាំចូលទាំងនេះកំពុងសម្លាប់ការងារផលិតកម្ម និងក្រុមហ៊ុនរបស់អាមេរិកដែលផ្តល់ប្រាក់ខែខ្ពស់»៕LA
