ភ្នំពេញៈ ក្រុមហ៊ុនរុករករ៉ែ Geopacific Resources មានមូលដ្ឋាននៅប្រទេសអូស្ដ្រាលី បានបញ្ជាក់ពីការរកឃើញកំណប់រ៉ែមាស និងស្ពាន់ នៅការដ្ឋានខួងរករ៉ែរបស់ខ្លូននៅភាគខាងជើងប្រទេសកម្ពុជា។ នេះបើយោងតាមឯកសាររបស់ក្រុមហ៊ុនផ្ញើទៅកាន់ផ្សារហ៊ុនអូស្រា្ដលី។
ក្រុមហ៊ុន Geopacific បានប្រកាសកាលពីថ្ងៃពុធថា តំបន់ថ្មីនៃកំណប់រ៉ែមាស និងស្ពាន់ ត្រូវបានរកឃើញនៅក្នុងការដ្ឋានអណ្ដូងរ៉ែ១១៨ របស់ខ្លួន នៅគម្រោង Kou Sa របស់ក្រុមហ៊ុននៅខេត្តព្រះវិហារ ជាការរកឃើញលើកទីពីរនៅឆ្នាំនេះ បន្ទាប់ពីការរកឃើញផ្សេងទៀតត្រូវបានប្រកាសកាលពីខែមករា។
រ៉ែមាស និងស្ពាន់ ដែលបានរុករករហូតមកដល់ពេលនេះ ត្រូវបានរកឃើញនៅក្នុងអណ្ដូងរ៉ែជម្រៅរាក់ ដែលជាធម្មតាមានទំហំតូច ប៉ុន្តែមានរ៉ែកម្រិតខ្ពស់។ កំណប់រ៉ែប្រភេទនេះទំនងជាកើតចេញពីការចរាចរណ៍ទឹកស្រទាប់ខាងក្រោម ដែលបំបែកភាគផ្សំសរីរាង្គនៅក្នុងដី ហើយធ្វើឲ្យក្លាយជារ៉ែ ដែលបន្លែងរូបធាតុសរីរាង្គទៅជាសារធាតុសរីរាង្គ ដូចជាមាស និងស្ពាន់។
ខណៈក្រុមហ៊ុន Geopacific ខិតកាន់តែជិតប្រភពការធ្វើចរាចរណ៍នេះ វានឹងទំនងជារកឃើញរ៉ែមាសកាន់តែច្រើន។ នេះបើយោងតាមលោក Ron Heeks នាយកគ្រប់គ្រងក្រុមហ៊ុន។
លោក បានឲ្យដឹងនៅក្នុងសេចក្ដីប្រកាសព័ត៌មានថា ជាមួយនឹងផ្ទៃដីជាច្រើន ដែលបានដាក់បញ្ចូលនៅក្នុងអាជ្ញាប័ណ្ណគម្រោង Kou Sa ក្រុមហ៊ុន Geopacific មិនទាន់បានរុករកដោយការខួងរកនៅឡើយទេ ដែលថ្មីៗនេះការរកឃើញរ៉ែមាស និងស្ពាន់ បង្ហាញថា នៅមានកំណប់ដ៏សំខាន់មិនទាន់ត្រូវបានបង្ហាញនៅក្នុងការដ្ឋាននេះ។
លោកថ្លែងថា៖ «ភាពជោគជ័យនៃគម្រោង Kou Sa បានលើកកម្ពស់ដោយការរកឃើញរ៉ែមាសជម្រៅរាក់ដ៏ធំនេះ»។ លោកបន្ថែមថា ការរកឃើញថ្មីៗបានបង្ហាញថា ប្រភពដ៏ច្រើន កាន់តែធំ ដែលជំរុញឲ្យមានការរុករករ៉ែនេះមិនទាន់ត្រូវបានរកឃើញនៅឡើយទេ។
លោកថ្លែងថា៖ «ការរកឃើញនេះ ស្របជាមួយនឹងលទ្ធផលនៅក្នុងគម្រោង ដែលបង្ហាញពី «ក្បាលម៉ាស៊ីន» ដ៏សំខាន់ ក្នុងការជំរុញការទាញយករ៉ែ»។
លោកបន្តថា៖ «លទ្ធផលបានពីការខួងរុករកនេះចង្អុលបង្ហាញថា យើងប្រហែលជាជួបប្រទះតំបន់លំហូរចេញនៃប្រព័ន្ធជម្រៅរាក់ ហើយថា តំបន់ដ៏សំខាន់នេះអាចមានទីតាំងនៅជិតៗនេះ»។
បន្ទាប់ពីការរុករកតំបន់អាជ្ញាប័ណ្ណ Kou Sa ពេញមួយឆ្នាំ ២០១៧ ក្រុមហ៊ុនបានកំណត់ថា ការដ្ឋានរ៉ែ ១១៨ និង ១៨១ ដែលរកឃើញដំបូងត្រូវបានធ្វើឡើង ទំនងជាកន្លែងកំណប់រ៉ែដ៏សំខាន់។ ក្រុមហ៊ុនមានបំណងបន្តរុករកនៅការដ្ឋាននេះ ហើយបច្ចុប្បន្នកំពុងធ្វើសំណាកដី ដើម្បីកំណត់វិសាលភាពនៃតំបន់រកឃើញរ៉ែមាស និងស្ពាន់ថ្មីៗនេះ៕LA