ភ្នំពេញៈ ក្រុមហ៊ុន លឹម សុខចេង បានឈ្នះការដេញថ្លៃការលក់សំបុត្រចូលទស្សនារមណីយដ្ឋានទេសចរណ៍ធម្មជាតិឧទ្យានជាតិព្រះសុរាម្រិតកុសមៈគិរីរម្យ នៅខេត្តកំពង់ស្ពឺ និងតំបន់រុំាសារព្រែកទាល់ ខេត្តបាត់ដំបង សម្រាប់ឆ្នាំ ២០២១។
ក្រុមហ៊ុនចំនួន ៣ បានចូលរួមប្រកួតប្រជែងប្រមូលថ្លៃលក់សំបុត្រចូលទស្សនារមណីយដ្ឋានឧទ្យានជាតិគិរីរម្យដោយតម្លៃដេញថ្លៃជាមូលដ្ឋានចាប់ពី ៣៥០ ០០០ ០០០ រៀល និងរមណីយដ្ឋានតំបន់រុំាសារព្រែកទាល់តម្លៃដេញថ្លៃ ចាប់ពី ៦០ ០០០ ០០០រៀល។ នេះបើតាមក្រសួងបរិស្ថាន។
ក្នុងកិច្ចប្រជុំបើកសំណើដេញថ្លៃជាសាធារណៈកាលពីថ្ងៃទី ៨ ខែមករា លោក ខូវ សូវៀត អនុប្រធានគណៈកម្មការដេញថ្លៃនៃក្រសួងបរិស្ថានបានប្រកាសថា ក្រុមហ៊ុន លឹម សុខចេង បានទទួលសិទិ្ធប្រមូលថ្លៃលក់សំបុត្រចូលទស្សនាឧទ្យានជាតិព្រះសុរាម្រិតកុសមៈគិរីរម្យក្នុងតម្លៃ ៨២៦ ០០០ ០០០ រៀល។
ឧទ្យានជាតិព្រះសុរាម្រិត ឬឧទ្យានជាតិគិរីរម្យនេះគ្របដណ្ដប់លើផ្ទៃដី ៨ ៤០១ ហិកតា និងមានចម្ងាយប្រមាណ ៤៤ គីឡូម៉ែត្រពីទីរួមខេត្តកំពង់ស្ពឺ។
លោក សូវៀត បានឱ្យដឹងទៀតថា ក្រុមហ៊ុននេះក៏ទទួលបានសិទ្ធិប្រមូលថ្លៃលក់សំបុត្រចូលទស្សនារមណីយដ្ឋានតំបន់រុំាសារព្រែកទាល់ដែលបានដាក់ដេញថ្លៃខ្ពស់ជាងគេចំនួន ៧៦ ០៥៥ ០០០ រៀល។
ព្រែកទាល់មានផ្ទៃ ២១ ៣៤២ ហិកតាស្ថិតក្នុងស្រុកឯកភ្នំ ខេត្តបាត់ដំបងជាប់ព្រំប្រទល់ទឹកជាមួយខេត្តសៀមរាប។ ព្រែកនេះជាជម្រកសត្វស្លាបទឹកដែលមានចំនួនជាង ៥០០០ ប្រភេទនាពេលបច្ចុប្បន្ន។
លោក អ៊ុច អ៊ុំភីនីស្សារ ប្រធានមន្ទីរទេសចរណ៍ខេត្តបាត់ដំបងបានប្រាប់ ភ្នំពេញ ប៉ុស្តិ៍ ថា រុំាសារព្រែកទាល់ គឺជាតំបន់ទេសចរណ៍ធម្មជាតិដែលមានសក្តានុពលខ្លាំង ដោយភ្ញៀវទេសចរអាចមកទស្សនាសត្វស្លាបរាប់ពាន់ប្រភេទនៅតំបន់នេះ។ លោកថ្លែងថា៖ «ការផ្តល់ឱ្យវិស័យឯកជនវិនិយោគ គឺជាធាតុចូលដ៏សំខាន់ក្នុងការអភិវឌ្ឍតំបន់ទេសចរណ៍ឱ្យមានរបៀបរាបរយល្អក្នុងការទាក់ទាញអ្នកទេសចរ»។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានឱ្យដឹងថា ការផ្តល់ឱ្យក្រុមហ៊ុនប្រមូលចំណូលថ្លៃលក់សំបុត្រនៅតំបន់ទេសចរណ៍ គឺការផ្តល់ឱកាសដល់វិស័យឯកជន ចូលរួមវិនិយោគលើវិស័យទេសចរណ៍ឱ្យកាន់តែរីកចម្រើនថែមទៀត។ លោកស្រីសង្ឃឹមថា ក្រុមហ៊ុននេះនឹងពង្រីកការអភិវឌ្ឍតំបន់ទេសចរណ៍ខាងលើ ដើម្បីលើកកម្ពស់វិស័យទេសចរណ៍ក្នុងស្រុក។
លោកស្រីថា៖ «ខ្ញុំគិតថាក្រុមហ៊ុនគាត់អាចមានទស្សនវិស័យវែងឆ្ងាយក្នុងការអភិវឌ្ឍតំបន់ទេសចរណ៍ឱ្យមានសេវាកម្មល្អថែរក្សាបរិស្ថាន»។
អ្នកនាំពាក្យក្រសួងទេសចរណ៍ លោក តុប សុភ័ក្ត្រ និយាយថា ដើម្បីចូលរួមអភិវឌ្ឍវិស័យទេសចរណ៍ឱ្យកាន់តែរីកចម្រើនត្រូវការជាចាំបាច់នូវការចូលរួមពីគ្រប់ភាគីពាក់ព័ន្ធរួមមាន វិស័យឯកជន ដៃគូអភិវឌ្ឍន៍ សាធារណៈ និងប្រជាជន។ លោកថ្លែងថា៖ «យើងស្វាគមន៍គ្រប់ភាគីទាំងអស់មកវិនិយោគលើវិស័យទេសចរណ៍ដោយគោរពទៅតាមច្បាប់របស់កម្ពុជា»។
របាយការណ៍ពីក្រសួងទេសចរណ៍ឱ្យដឹងថា ភ្ញៀវទេសចរអន្តរជាតិមកទស្សនាកម្ពុជាក្នុងរយៈពេល ១១ ខែឆ្នាំ ២០២០ មានចំនួន ១ ២៨៦ ០៧៤ នាក់ ធ្លាក់ចុះ ៧៨,២ ភាគរយ ធៀបនឹងឆ្នាំ ២០១៩ ដែលមានចំនួន ៥ ៨៩៨ ១៣០ នាក់៕
វីដេអូ៖