.jpg)
មន្ត្រីក្រុមហ៊ុន AVS Innovation (ខាងឆ្វេង) ពេលជួបទូតកម្ពុជា។ រូបថត សហការី
ភ្នំពេញ: ក្រុមហ៊ុនផលិតឱសថរបស់ថៃ AVS Innovation Co. គ្រោងពង្រីកទីផ្សារផលិតឱសថ និងសម្ភារវេជ្ជសាស្ត្រនៅកម្ពុជា។
លោក អ៊ូក សោភ័ណ ឯកអគ្គរាជទូតកម្ពុជាប្រចាំប្រទេសថៃបានឲ្យដឹងក្នុងសេចក្តីប្រកាសព័ត៌មានថា ក្រុមហ៊ុន AVS Innovation របស់ប្រទេសថៃគ្រោងនឹងពង្រីកទីផ្សារមកប្រទេសកម្ពុជា។
ការថ្លែងនេះធ្វើឡើងនៅក្នុងជំនួបជាមួយលោក Kampon Sriwatakul អគ្គនាយកក្រុមហ៊ុន AVS Innovation នៅថ្ងៃពុធ។
លោកបានឲ្យដឹងថា ក្រុមហ៊ុននេះគ្រោងនឹងពង្រីកទីផ្សារទៅកាន់ប្រទេសកម្ពុជាតាមរយៈការនាំចូលផលិតផលវេជ្ជសាស្ត្រ និងនាំយកលទ្ធផលស្រាវជ្រាវថ្មីៗដោយសហការជាមួយក្រុមហ៊ុនខ្មែរ ដើម្បីផលិតឧបករណ៍ និងសម្ភារបរិក្ខារពេទ្យបែបនវានុវត្តន៍សំដៅឆ្លើយតបតម្រូវការទីផ្សារក្នុងតំបន់ និងពិភពលោក។
លោកថ្លែងថា៖ «យើងស្វាគមន៍ចំពោះគម្រោងខាងលើ»។
លោកក៏បានប្រាប់តំណាងក្រុមហ៊ុននោះអំពីសក្តានុពល និងកាលានុវត្តភាពធុរកិច្ចដែលកម្ពុជាមានសម្រាប់លើកទឹកចិត្តការវិនិយោគថ្មីៗ។
ក្នុងជំនួបនេះលោកវេជ្ជបណ្ឌិត Kampon Sriwatakul អគ្គនាយកក្រុមហ៊ុន AVS Innovation ថ្លែងថា បច្ចុប្បន្នក្រុមហ៊ុនលោកកំពុងផលិតឱសថ និងគ្រឿងបរិក្ខារការពារជំងឺកូវីដ ១៩ ដើម្បីផ្គត់ផ្គង់ទីផ្សារក្នុងប្រទេស។
លោកថ្លែងថា៖ «ក្រុមហ៊ុនកំពុងស្វែងរកដៃគូសហការនៅកម្ពុជា ដើម្បីពង្រីកសក្តានុពលថែមទៀត ដោយយើងឃើញថាកម្ពុជាមានធនធានជាច្រើនដែលអាចបម្រើផលិតកម្មរបស់ក្រុមហ៊ុនក្នុងប្រទេសកម្ពុជា»។
ឱសថបណ្ឌិត ហៃ លីអ៊ាង ប្រធានអគ្គនាយកសហគ្រាសផលិតឱសថ PPM ដែលជាសហគ្រាសផលិតឱសថបម្រើទីផ្សារក្នុងស្រុក និងនាំចេញទៅប្រទេសជាច្រើនក្នុងតំបន់អាហ្វ្រិក និងអឺរ៉ុបបានប្រាប់ភ្នំពេញប៉ុស្តិ៍កាលពីថ្ងៃម្សិលមិញថា លោករីករាយសាទរចំពោះក្រុមហ៊ុនបរទេសដែលមានបំណងពង្រីកទីផ្សារមកកម្ពុជា ដោយរួមចំណែកផ្តល់ផលប្រយោជន៍ដល់ការបង្កើតការងារ និងការអភិវឌ្ឍសេដ្ឋកិច្ចកម្ពុជា។
លោកថ្លែងថា៖ «យើងក៏ចង់សហការគ្នាជាមួយក្រុមហ៊ុនបរទេសដែរ ប៉ុន្តែសហការជាមួយក្រុមហ៊ុនបរទេស យើងក៏ត្រូវគិតផ្តល់ប្រយោជន៍ច្រើនដល់ប្រទេសជាតិយើង។ យើងមិនចង់សហការត្រឹមតែអ្នកធ្វើការបោសសំរាមឲ្យគេនោះទេ។ យើងមានលទ្ធភាពប្រកួតប្រជែងជាមួយគេ ហើយយើងក៏មានលទ្ធភាពសហការជាមួយគេផងដែរ»។
លោកបានឲ្យដឹងថា សហគ្រាសផលិតឱសថ ប៉េប៉េអឹម មានផលិតផលឱសថ គីណាល់ ជាឱសថដំបូងគេបំផុតរបស់កម្ពុជាបង្កើតឡើងក្នុងឆ្នាំ ១៩៦០ ហើយបច្ចុប្បន្នសហគ្រាសលោកបាននាំចេញឱសថប្រភេទនេះ និងផលិតផលសុខភាពជាច្រើនទៀតទៅកាន់ប្រទេសក្នុងតំបន់អឺរ៉ុប អាស៊ីអាគ្នេយ៍ និងអាហ្វ្រិក ជាដើម៕ LA
