ភ្នំពេញៈ ក្រុមហ៊ុនវិនិយោគអង្ករបាត់ដំបង BRICO ដែលវិនិយោគចូលគ្នារវាងវិនិយោគិនក្នុងស្រុក សិង្ហបុរី និង Emerging Market Investment Fund គ្រោងនាំចេញអង្ករក្រអូប១ម៉ឺនតោនក្នុងខែមិថុនាឆ្នាំនេះ។
លោក យុគ ចំរើនរិទ្ធិ ប្រធានក្រុមប្រឹក្សានាយកក្រុមហ៊ុនបានឲ្យដឹងថា BRICO ជាការវិនិយោគរួមគ្នារវាងរូបលោក ក្រុមហ៊ុនឡូរ៉ង់ វិនិយោគិនសិង្ហបុរី និងក្រុមហ៊ុន Emerging Market Investment Fund ដោយវិនិយោគក្នុងទឹកប្រាក់ជាង៣,៥លានដុល្លារក្នុងការសាងសង់រោងម៉ាស៊ីនស្រូវក្នុងស្រុកថ្មគោលខេត្តបាត់ដំបង។
លោកបន្តថារោងម៉ាស៊ីនស្រូវនេះសង់លើផ្ទៃដី៦,៥ហិកតាដែលរួមមានឃ្លាំងម៉ាស៊ីនកិនស្រូវដែលទិញពីប្រទេសថៃ។ លោកបន្តថា៖ «យើងទទួលបានការយល់ព្រមពីក្រុមប្រឹក្សាអភិវឌ្ឍន៍កម្ពុជាស្ដីពីការវិនិយោគចាប់តាំងពីខែវិច្ឆិកាឆ្នាំទៅ។ យើងបានចាប់ផ្ដើមការសាងសង់របស់យើងចាប់តាំងពីដើមឆ្នាំនេះហើយឥឡូវនេះការសាងសង់បញ្ចប់បាន៧០ភាគរយហើយ។ យើងសង្ឃឹមថាការសាងសង់នឹងបញ្ចប់ត្រឹមខែមិថុនាឬខែកក្កដាឆ្នាំនេះ»។
លោកបន្តថារោងម៉ាស៊ីននេះអាចផលិតអង្ករបាន១៥តោនក្នុងមួយម៉ោង។
លោក ម៉ៅ សូវិន អ្នកគ្រប់គ្រងវិនិយោគរបស់EMI និងជានាយករបស់ BRICO និយាយថាមូលនិធិនេះដាក់ប្រាក់ដើម្បីវិនិយោគរួមគ្នាលើវិស័យអង្ករដោយសារតែពួកគេមើលឃើញពីសក្ដានុពលខ្ពស់។ លោកបន្តថា៖ «អង្ករគឺជាវិស័យមានអាទិភាពក្នុងវិស័យកសិកម្មដែលរដ្ឋាភិបាលកំពុងតែលើកកម្ពស់ដូច្នេះយើងមើលឃើញសក្ដានុពលដ៏ធំនិងការទទួលបានប្រាក់ចំណេញច្រើនពីការវិនិយោគនេះ។
ទីពីរស្រូវភាគច្រើនជាធម្មតាត្រូវបានលក់ទៅឲ្យប្រទេសជិតខាងដោយសារតែម្ចាស់រោងម៉ាស៊ីនក្នុងស្រុកមិនមានប្រាក់គ្រប់គ្រាន់ដើម្បីទិញហើយប្រទេសយើងគ្មានឧបករណ៍ផលិតគ្រប់គ្រាន់»។ លោកបន្ថែមថា ក្រុមហ៊ុនគ្រោងនាំចេញអង្ករ៣ម៉ឺនតោនរៀងរាល់ឆ្នាំ៕ PB
