The Phnom Penh Post Search

Search form

Logo of Phnom Penh Post newspaper Phnom Penh Post - ក្រុមហ៊ុន​ចិន​គ្រោង​នឹង​សាង​សង់​ផ្លូវ​អាកាស​ល្បឿន​លឿន

ក្រុមហ៊ុន​ចិន​គ្រោង​នឹង​សាង​សង់​ផ្លូវ​អាកាស​ល្បឿន​លឿន

ក្រុមហ៊ុន​ចិន​គ្រោង​នឹង​សាង​សង់​ផ្លូវ​អាកាស​ល្បឿន​លឿន

ភ្នំពេញៈ ក្រុម​ហ៊ុន​ដ៏​ធំ​មួយ​របស់​ចិន គ្រោង​សាង​សង់​ផ្លូវ​អាកាស​ល្បឿន​លឿន​នៅ​កណ្ដាល ទីក្រុង​ភ្នំពេញ ចាប់​ពី​រង្វង់​មូល​ទីក្រុង​រណប​កាំកូស៊ីធី ឆ្ពោះ​ទៅ​ព្រលាន​យន្តហោះ​អន្តរជាតិ​ភ្នំពេញ ដើម្បី​កាត់​បន្ថយ​ការ​កក​ស្ទះ​ចរាចរណ៍​ដែល​កំពុង​តែ​កើត​មាន​នា​ពេល​បច្ចុប្បន្ន។

ផែនការ​នេះ​ត្រូវ​បាន​លើក​ឡើង​ក្នុង​អំឡុង​ពេល​កិច្ច​ប្រជុំ​រវាង​លោក Chang Xingwen ប្រធាន​អគ្គ​នាយក​ក្រុម​ហ៊ុន​វាយ​តម្លៃ​គម្រោង​គមនាគមន៍ និង​វិទ្យាស្ថាន​រចនា​ប្លង់​នៃ ខេត្ត​ហឺណាន (HPCPSDI) និង​លោក​ឧប​នាយក​រដ្ឋ​មន្ដ្រី​ប្រចាំ​ការ គាត ឈន់ នៅ​ក្នុង ទីក្រុង​ភ្នំពេញ កាល​ពី​ថ្ងៃ​ចន្ទ។

លោក Chang Xingwen បាន​ថ្លែង​ថា ជាមួយ​នឹង​ការ​រីក​ចម្រើន​យ៉ាង​រហ័ស​នៃ​សេដ្ឋកិច្ច​របស់ ប្រទេស​កម្ពុជា ក្នុង​រយៈ​ពេល​ជា​ច្រើន​ទសវត្សរ៍​ដែល​អាច​ប្រៀប​ធៀប​ជាមួយ​នឹង​សេដ្ឋកិច្ច​របស់ ប្រទេស​ចិន ក្នុង​រយៈ​ពេល ២០ ឆ្នាំ​កន្លង​មក វា​តម្រូវ​ឲ្យ ប្រទេស​កម្ពុជា ដើម្បី​បន្ត​អភិវឌ្ឍ​គមនាគមន៍​សាធារណៈ​កាន់​តែ​ច្រើន។ នេះ​បើ​យោង​តាម​សេចក្ដី​ប្រកាស​ព័ត៌មាន​បាន​ពី​ខុទ្ទកាល័យ​របស់​លោក គាត ឈន់។

សេចក្ដី​ប្រកាស​ព័ត៌មាន​នេះ​បាន​ស្រង់​សម្ដី​របស់​លោក Chang ថា៖ «ក្រុម​ហ៊ុន​លើក​ឡើង​ពី​ផែន​ការ​នេះ​ដើម្បី​ចូល​រួម​ក្នុង​ការ​អភិវឌ្ឍ​សាធារណៈ​នៅ​ក្នុង ប្រទេស​កម្ពុជា ដែល​ទទួល​អត្ថ​ប្រយោជន៍​ក្នុង​ការ​ជំរុញ​ការ​អភិវឌ្ឍ​ប្រទេស​កម្ពុជា ឲ្យ​កាន់​តែ​មាន​ការ​រីក​ចម្រើន​ខ្លាំង​ថែម​ទៀត​ជា​ពិសេស​ជំរុញ​កំណើន​សេដ្ឋកិច្ច​ប្រកប​ដោយ​ចីរភាព​សំដៅ​លើក​កម្ពស់​កម្រិត​ជីវភាព​រស់​នៅ​របស់​ប្រជាជន​កម្ពុជា»។

លោក គាត ឈន់ បាន​យល់​ព្រម​ជា​គោល​ការណ៍​លើក​គម្រោង​ដែល​ធ្វើ​ឡើង​តាម​រយៈ​រូបមន្ត​សាង​សង់ អាជីវកម្ម ផ្ទេរ (B.O.T)។ លោក​បាន​លើក​ឡើង​នៅ​ក្នុង​សេចក្ដី​ប្រកាស​ព័ត៌មាន​នេះ​ថា៖ «ក្រុម​ហ៊ុន​នេះ​ត្រូវ​ពិចារណា និង​សិក្សា​ឲ្យ​បាន​ច្បាស់​លាស់​អំពី​ប្រសិទ្ធភាព​សេដ្ឋកិច្ច និង​ផល​ចំណេញ​ផ្ទៃ​ក្នុង (IRR)។ តើ​គម្រោង​នេះ​មាន​ផល​ចំណេញ​ផ្ទៃ​ក្នុង​ប៉ុន្មាន​ដែរ? តើ​រយៈ​ពេល​ប៉ុន្មាន​ឆ្នាំ​ទើប​ក្រុម​ហ៊ុន​ទទួល​ផល​ចំណេញ?

លោក Chang Xingwen បាន​យល់​ព្រម​នឹង​អនុសាសន៍​នោះ ហើយ​នឹង​សិក្សា​ឲ្យ​បាន​ច្បាស់​ពី​ការ​សាង​សង់​ផ្លូវ​នេះ។

ក្រុម​ហ៊ុន​នេះ​បាន​សហការ​ជាមួយ​ក្រសួង​សាធារណការ​រួច​រាល់​ហើយ​ក្នុង​ការ​សិក្សា​ពី​លទ្ធភាព​ស្ដីពី​ការ​សាង​សង់​ផ្លូវ​នេះ​ក្នុង​រយៈ​ពេល​ពីរ​ឆ្នាំ​កន្លង​មក។

ក្រុម​ហ៊ុន​នេះ​បាន​ប្រគល់​ផែនការ​មេ​អភិវឌ្ឍន៍​ផ្លូវ​ល្បឿន​លឿន​នៅ​កម្ពុជា ឲ្យ​ក្រសួង កាល​ពី ខែ​ឧសភា ស្ដីពី​ផ្លូវ​លឿន​សំខាន់​ពីរ មួយ​ចាប់​ពី ទីក្រុង​ភ្នំពេញ ឆ្ពោះ​ទៅ ក្រុង​ព្រះ​សីហនុ ហើយ​មួយ​ទៀត​ចេញ​ពី ទីក្រុង​ភ្នំពេញ ឆ្ពោះ​ទៅ ទីក្រុង​ហូជីមិញ របស់ វៀតណាម។

ផ្លូវ​ល្បឿន​លឿន​ទាំង​ពីរ​នេះ​នឹង​ចំណាយ​ប្រាក់ ៩ ពាន់​លាន​ដុល្លារ ហើយ​រំពឹង​ថា នឹង​ត្រូវ​បញ្ចប់​ត្រឹម ឆ្នាំ​២០៣០៕

អត្ថបទគួរចាប់អារម្មណ៍