The Phnom Penh Post Search

Search form




Logo of Phnom Penh Post newspaper Phnom Penh Post - ក្រុមហ៊ុន​ជប៉ុន​កំពុង​ស្វែង​រក​ឱកាស​វិនិយោគ​

ក្រុមហ៊ុន​ជប៉ុន​កំពុង​ស្វែង​រក​ឱកាស​វិនិយោគ​

ក្រុមហ៊ុន​ជប៉ុន​កំពុង​ស្វែង​រក​ឱកាស​វិនិយោគ​

ភ្នំពេញៈ តំណាង​មក​ពី​ក្រុមហ៊ុន​ធំៗ​មួយ​ចំនួន​របស់​ជប៉ុន បាន​និង​កំពុង​ធ្វើ​ទស្សន​កិច្ច​នៅ​កម្ពុជា ដើម្បី​ស្វែង​រក​ឱកាស​វិនិយោគ។

បណ្តា​ក្រុមហ៊ុន​ដែល​ដឹក​នាំ​ដោយ​លោក Hidetoshi Nishimura នាយក​ប្រតិបត្តិ​វិទ្យាស្ថាន​ស្រាវ​ជ្រាវ​សេដ្ឋកិច្ច​អាស៊ាន និង​អាស៊ី​បូព៌ា (ERIA)​កំពុង​វិនិយោគ​លើ​ឧស្សាហកម្ម​បច្ចេក​វិទ្យា​ទំនើប អាជីវកម្ម​បរិស្ថាន ត្បូង និង​គ្រឿង​អលង្ការ ការ​អភិវឌ្ឍ​ហេដ្ឋា​រចនា​សម្ព័ន្ធ និង​កសិកម្ម។

ថ្លែង​ក្នុង​កិច្ច​ប្រជុំ​ជាមួយ​លោក ហ៊ុន សែន នាយក​រដ្ឋ​មន្ត្រី​កម្ពុជា កាល​ពី​ថ្ងៃ​អង្គារ​នៅ​វិមាន​សន្តិភាព លោក Hidetoshi Nishimura បាន​លើក​ឡើង​ថា ដំណើរ​ទស្សនកិច្ច​របស់​លោក មក​កាន់​កម្ពុជា ក្នុង​គោល​បំណង​សិក្សា​អំពី​វិស័យ​ដែល​មាន​សក្តានុពល​នៅ​កម្ពុជា ដើម្បី​ស្វែង​រក​ឱកាស​វិនិយោគ។ លោក​ថ្លែង​ថា ក្រុមហ៊ុន​ទាំង​នោះ ដឹង​ថា កម្ពុជា​មាន​ស្ថិរភាព​នយោបាយ​និង​សន្តិសុខ​ព្រម​ទាំង​បរិយាកាស​អាជីវកម្ម​ប្រកប​ដោយ​ភាព​អំណោយ​ផល។

លោក ហ៊ុន សែន បាន​ឲ្យ​ដឹង​ថា ប្រទេស​កម្ពុជា​មាន​ស្ថិរភាព​នយោបាយ​ពេញ​លេញ​និង​ម៉ាក្រូ​សេដ្ឋកិច្ច​ព្រម​ទាំង​មាន​ច្បាប់​និង​បទ​ប្បញ្ញត្តិ​អនុគ្រោះ​ដល់​វិនិយោគិន​ផង​ដែរ។

លោក​នាយក​រដ្ឋ​មន្ត្រី បាន​បញ្ជាក់​ថា កម្ពុជា​មាន​សក្តានុពល​ខ្លាំង​សម្រាប់​វិនិយោគិន​ក្នុង​វិស័យ​ឧស្សាហកម្ម​វិស័យ​កសិកម្ម ទេសចរណ៍ រ៉ែ ប្រេង និង​ឧស្ម័ន ថាមពល ការ​ដឹក​ជញ្ជូន និង​ទូរគមនាគមន៍។

កាល​ពី​ប៉ុន្មាន​ឆ្នាំ​ថ្មីៗ​នេះ ក្រុមហ៊ុន​របស់​ជប៉ុន​ជា​ច្រើន បាន​មក​បណ្តាក់​ទុន​នៅ​កម្ពុជា ភាគ​ច្រើន​ក្នុង​វិស័យ​ឧស្សាហកម្ម។

លោក​Peter Brimble អនុ​ប្រធាន​ប្រចាំ​ប្រទេស​របស់​ធនាគារ​អភិវឌ្ឍន៍​អាស៊ី បាន​ប្រាប់​ភ្នំពេញ ប៉ុស្តិ៍​កាល​ពី​ពេល​ថ្មីៗ​នេះ​ថា​លំហូរ​វិនិយោគ​របស់​ក្រុមហ៊ុន​ជប៉ុន​នៅ​កម្ពុជា ជួយ​ធ្វើ​ពិពិធកម្ម​ការ​នាំ​ចេញ​របស់​កម្ពុជា។

លោក​បាន​លើក​ឡើង​ថា៖ «កាល​ពី​ឆ្នាំ​មុន យើង​សង្កេត​ឃើញ​មាន​ការ​ធ្វើ​ពិពិធកម្ម ហើយ​យើង​ក៏​ឃើញ​មាន​ក្រុមហ៊ុន​ជប៉ុន​ជា​ច្រើន កំពុង​ចូល​មក​កម្ពុជា​ផង​ដែរ។ ខ្ញុំ​ចង់​មាន​ន័យ​ថា ក្រុមហ៊ុន​ទាំង​នោះ កំពុង​បោះ​ជំហាន​មក​កាន់​ទី​នេះ ដោយ​ពួក​គេ សាង​សង់​រោង​ចក្រ​រួច​រាល់​ហើយ ហើយ​ចាប់​ផ្តើម​ដំណើរ​ការ​អាជីវកម្ម​របស់​ខ្លួន បន្ទាប់​មក សាង​សង់​រោង​ចក្រ​មួយ​ទៀត​នៅ​តំបន់​សេដ្ឋកិច្ច​ពិសេស​ភ្នំពេញ នៅ​កោះ​កុង និង​តំបន់​ផ្សេងៗ​ទៀត។ ខ្ញុំ​គិត​ថា ការណ៍​នេះ​នឹង​ជះ​ឥទ្ធិពល​ខ្លាំង​ទៅ​លើ​ការ​នាំ​ចេញ និង​សេដ្ឋកិច្ច​នៅ​ឆ្នាំ​២០១៣»។

កាល​ពី​ខែ​ធ្នូ ឆ្នាំ​មុន សាជីវកម្ម​Yazaki Corporation ដែល​ជា​ក្រុមហ៊ុន​ផ្គត់​ផ្គង់​គ្រឿង​បន្លាស់​រថយន្ត​នៅ​តូក្យូ បាន​បណ្តាក់​ទុន​២០​លាន​ដុល្លារ​អាមេរិក លើ​ការ​សាង​សង់​រោង​ចក្រ​ផលិត​គ្រឿង​បន្លាស់​រថយន្ត នៅ​តំបន់​សេដ្ឋកិច្ច​ពិសេស​កោះ​កុង។

កាល​ពី​ខែ​កញ្ញា​ឆ្នាំ​មុន ក្រុមហ៊ុន​AEON​បាន​បណ្តាក់​ទុន​២០០​លាន​ដុល្លារ​អាមេរិក ដើម្បី​សាង​សង់​ផ្សារ​ទំនើប​កម្ពស់​៤​ជាន់​នៅ​ភ្នំពេញ។ កាល​ពី​ចុង​ឆ្នាំ​២០១១​ក្រុមហ៊ុន Minebea បាន​បណ្តាក់​ទុន​ចំនួន ៦០​លាន​ដុល្លារ​អាមេរិក លើ​ការ​សាង​សង់​រោង​ចក្រ​ឧស្សាហកម្ម​ផលិត​ម៉ូទ័រ​ធុន​តូច និង​មធ្យម៕ CS

អត្ថបទគួរចាប់អារម្មណ៍