The Phnom Penh Post Search

Search form




Logo of Phnom Penh Post newspaper Phnom Penh Post - ក្រុមហ៊ុន​ថៃ​ដក​គម្រោង​វិនិយោគ​ពី​កម្ពុជា

ក្រុមហ៊ុន​ថៃ​ដក​គម្រោង​វិនិយោគ​ពី​កម្ពុជា

ក្រុមហ៊ុន​ថៃ​ដក​គម្រោង​វិនិយោគ​ពី​កម្ពុជា

130830_12
ការលើកស៊ីម៉ងត៍ចេញពីរថភ្លើងបន្ទាប់ពីដឹកមកដល់ភ្នំពេញ ហេង ជីវ័ន

ភ្នំពេញៈ​ប្រធាន​ប្រតិបត្តិ​ជាន់ខ្ពស់​ឲ្យ​ដឹង​ថា ក្រុមហ៊ុន​ស៊ីម៉ងត៍​ធំ​ជាងគេ​ទី​ពីរ​របស់​ថៃ​បាន​ផ្អាក​គម្រោង​រោងចក្រ​ស៊ីម៉ងត៍​តម្លៃ​ប្រហែល ២០០ ​លាន​ដុល្លារ​នៅ​ ខេត្ត​កំពត ​ដោយ​លើក​ហេតុផល​ពី​ភាព​មិន​ច្បាស់លាស់​ចំពោះ​នយោបាយ​នៅ​កម្ពុជា​និង​បាន​ងាក​ទៅ​មើល​ឱកាស​វិនិយោគ​នៅ​ប្រទេស​មីយ៉ាន់ម៉ា​វិញ។

លោក​ Philippe Arto នាយក​គ្រប់គ្រង​ក្រុមហ៊ុន Siam City Cement Public Company Limited (SCCC) បាន​ប្រាប់ ​បាងកក ​ប៉ុស្តិ៍ ​កាលពី​ថ្ងៃ​ពុធ​ថា ​ក្រុមប្រឹក្សា​របស់​ក្រុមហ៊ុន​ដែល​ចុះបញ្ជី​នៅ​ផ្សារហ៊ុន​បាន​សម្រេច​ចិត្ត​ «​ពន្យារ​ពេល​»​ រោងចក្រ​ដែល​គេ​រំពឹង​ថា ​នឹង​ផលិត​បាន​ពី​ ១​ លាន​តោន​ទៅ​ ១,៥ ​លាន​តោន ​ក្នុង​មួយ​ឆ្នាំ ​ក្នុង​ការ​បំពេញ​តម្រូវការ​ដែល​កំពុង​តែ​រីកចម្រើន​ឡើង​នៅក្នុង​វិស័យ​សំណង់​របស់​កម្ពុជា​នេះ។

ភ្នំពេញ ប៉ុស្តិ៍ មិន​អាច​ទាក់ទង លោក Philippe Arto​បាន​ទេ ​កាលពី​ម្សិលមិញ​ ហើយ​តំណាង​ក្រុមហ៊ុន បដិសេធ​មិន​ធ្វើ​អត្ថាធិប្បាយ​ថា ​តើ​បញ្ហា​នេះ​ជាប់ទាក់ទង​ទៅ​នឹង​ស្ថានភាព​នយោបាយ​ ឬ​ក៏ ​មកពី​ស្ថានភាព​ទំនាក់ទំនង​ការទូត​រវាង​កម្ពុជា​និង​ថៃ​ យ៉ាង​ណា​នោះ។

ក្នុង​សន្និសីទ​ កាលពី​ថ្ងៃ​ពុធ​នៅ​ទីក្រុង​បាងកក ​លោក Philippe Arto​ បាន​និយាយ​ថា​ គម្រោង​នេះ​គឺ​ «​មិនមែន​ជា​អាទិភាព​ទេ ខណៈ​ យើង​មាន​ការងារ​ជាច្រើន​ត្រូវ​ធ្វើ​នៅក្នុង​ប្រទេស​ថៃ​» ដោយ​លើកឡើង​ថា ​SCCC កំពុង​ស្វែងរក​ការ​ពង្រីក​ទៅ​ប្រទេស​មីយ៉ាន់ម៉ា​ផង​ដែរ​ ហើយ​ទាញ​យក​ផលប្រយោជន៍​ពី​ការ​កើនឡើង​យ៉ាង​រហ័ស​នៅ​ទី​នោះ​លើ​ទីផ្សារ​ស៊ីម៉ងត៍។

អនុស្សរណៈ​នៃ​កិច្ចព្រមព្រៀង​ស្តីពី​ការ​សិក្សា​ស្វែងរក​លទ្ធភាព​រវាង​ក្រុមហ៊ុន​ ស៊ីម៉ងត៍ ​ថៃ ​និង​ក្រុមហ៊ុន ជីបម៉ុងគ្រុប ដែល​ជា​អ្នក​ផ្គត់ផ្គង់​ក្នុង​ការ​សាងសង់​នៅ​កម្ពុជា​ត្រូវ​បាន​ចុះ​ហត្ថលេខា​ កាលពី​ថ្ងៃ​ទី ​៨ ​ខែ​ធ្នូ ​ឆ្នាំ ​២០១០។​ ការ​សាងសង់​ត្រូវ​បាន​សន្មត​ថា ​នឹង​ចាប់ផ្ដើម​នៅ​ឆ្នាំ ​២០១១ និង​ត្រូវ​ការ​ពេលវេលា​ប្រហែល​ពី​ ពីរ ​ទៅ ​បី ​ឆ្នាំ។

លោក​ សុខ ចាន់ថា​ ប្រធាន​គ្រប់គ្រង​ទំនាក់ទំនង​សាធារណៈ​នៅ​ក្រុមហ៊ុន ជីបម៉ុង បាន​ឲ្យ​ដឹង​ថា ​លោក​មិន​បាន​ដឹង​ពី​ផែនការ​បង្ក​គម្រោង​នេះ​ទេ ​ហើយ​ថា ​ក្រុមហ៊ុន​នេះ​កំពុង​សិក្សា​ពី​ផលប៉ះពាល់​សង្គម​និង​បរិស្ថាន។

​លោក​ថ្លែង​ដោយ​សំដៅ​ទៅ​ដល់​ការ​លើក​ឡើង​របស់ ​លោក ​Arto អំពី​ភាព​មិន​ច្បាស់លាស់​នេះ​ថា​៖ ​«​ខ្ញុំ​គិតថា​ មូលហេតុ​របស់​គេ​ គឺ​សមហេតុ​ផល​ផង​ដែរ។ ​ចំពោះ​ទស្សនៈ​ផ្ទាល់​របស់​ខ្ញុំ ​យើង​មាន​ការ​បារម្ភ ​ដោយសារ​តែ​យើង​ មិន​ដឹង​ពី​អ្វី​នឹង​កើតឡើង​នៅ​ថ្ងៃ​ស្អែក​នោះ​ទេ។ បើ​ក្រុមហ៊ុន​មួយ​វិនិយោគ​រាប់លាន​ដុល្លារ​ពួក​គេ​ចាំបាច់​ត្រូវ​គិត​អំពី​ស្ថានភាព​នយោបាយ​»។

ស្ថានការ​នៅ​កម្ពុជា​នៅ​តែ​មាន​ភាព​មិន​ច្បាស់លាស់ ​ក្រោយ​ការ​បោះឆ្នោត ​កាលពី​ខែ​មុន ​ខណៈ​ គណបក្ស​សង្គ្រោះជាតិ​កំពុង​ជំទាស់​នឹង​លទ្ធផល​ដោយ​ចោទ​ពី​ការ​បន្លំ​សន្លឹកឆ្នោត​ហើយ​និង​ធ្វើ​មហាបាតុកម្ម​នៅ​ថ្ងៃ ​៧ ​ខែ​កញ្ញា។

តាម​ការ​អង្កេត​មួយ​របស់​អ្នក​ដឹកនាំ​ពាណិជ្ជកម្ម​បរទេស​កំពុង​ធ្វើការ​នៅ​កម្ពុជា​ជំនឿ​ចិត្ត​នៅក្នុង​សេដ្ឋកិច្ច​កម្ពុជា​បាន​ធ្លាក់​ចុះ​ប្រហែល​ ៥០ ​ភាគរយ ​នៅ​រយៈពេល​ក្រោយ​ការ​បោះឆ្នោត។

លោក ​ខូយ ឃុនហ៊ួ អភិបាល​ខេត្ត​កំពត​បាន​និយាយ​ថា ​ការ​ដក​ខ្លួន​ចេញ​ពី​គម្រោង​ដែល​ត្រូវ​បាន​គ្រោង​នៅ​ស្រុក ​ទូក​មាស​ មិន​មាន​ផលប៉ះពាល់​ដល់​ផលិតផល​ស៊ីម៉ងត៍​នោះ​ទេ។

លោក​បន្ត​ថា ​បច្ចុប្បន្ន ​កម្ពុជា​នៅ​មាន​រោងចក្រ​ស៊ីម៉ងត៍ ​K-cement ​និង ​Kampot Cement​ ខណៈ​ រោងចក្រ​ស៊ី ម៉ងត៍ ​ចក្រីទីង ​កម្ពុជា​ដែល​ផ្ដល់​មូលនិធិ​ដោយ​ប្រទេស​ចិន​អាច​បើក​ដំណើរការ​នៅ​ឆ្នាំ ​២០១៤។

លោក​ ឃុន ​ហ៊ួ ​បាន​បន្ត​ថា​៖​«​បច្ចុប្បន្ន ​ពួកគេ​ កំពុង​បង្កើន​ល្បឿន​សាងសង់​អគារ​រោងចក្រ​ទាំង​ថ្ងៃ​ទាំង​យប់​»។

សម្រាប់​កិច្ចព្រមព្រៀង​របស់​ SCCC ​លោក​បាន​បន្ថែម​ថា ​វា​ជា​រឿង​ធម្មតា​សម្រាប់​ក្រុមហ៊ុន​មួយ​ចំនួន​នៅក្នុង​ដំណាក់កាល​សិក្សា​ស្វែងរក​លទ្ធភាព​ ដែល​ខ្វះ​ការ​កំណត់​កាលបរិច្ឆេទ​សម្រាប់​ការ​សាងសង់។​ ការ​ផ្លាស់ប្តូរ​ដ៏​ធំ​នេះ ​ជា​ករណី​ទី​ពីរ​ក្នុង​រយៈពេល​មួយ​ខែ​មក​នេះ ដែល​ការ​វិនិយោគ​រវាង​កម្ពុជា​និង​ថៃ​ត្រូវ​បាន​ទទួល​ការ​ផ្លាស់ប្តូរ។

កាលពី​ដើម​ខែ​នេះ​ កាសែត ​The Nation របស់​ថៃ​ បាន​រាយការណ៍​ថា​ ក្រុមហ៊ុន​ Ratchaburi Electricity General Holding របស់​ថៃ​បាន​ដក​ខ្លួន​ចេញ​ពី​កិច្ចព្រមព្រៀង​រោងចក្រ​អគ្គិសនី ​នៅ​ខេត្ត​កោះកុង។

លោក លី ​យ៉ុងផាត់ ប្រធាន​ក្រុមហ៊ុន ​LYP Group​ និង​ជា​ប្រធាន​ក្រុមហ៊ុន KK Power បាន​​ប្រាប់ ​ភ្នំពេញ ប៉ុស្ដិ៍ ​កាលពី​ថ្ងៃ​ព្រហស្បត៍​ថា ​ការ​វិនិយោគ​រួម​គ្នា​ជាមួយ​នឹង​ក្រុមហ៊ុន ​Rachaburi Electiricy របស់​ថៃ ​បាន​ផ្លាស់ប្តូរ​ប៉ុណ្ណោះ​ដោយ​មិន​ដក​ខ្លួន​ចេញ​នោះ​ទេ។​

លោក​បន្ត​ថា​៖ «​យើង​កំពុង​ធ្វើការ​ជាមួយ​ពួកគេ​ ប៉ុន្តែ ​បច្ចុប្បន្ន ​យើង​ផ្លាស់ប្តូរ​ការ​វិនិយោគ​របស់​យើង​ ពី​រោងចក្រ​អគ្គិសនី​ប្រើ​ធ្យូងថ្ម​ទៅ​ជា​ការ​ដំឡើង​ខ្សែអគ្គិសនី​នៅ​ប្រទេស​របស់​យើង​ ហើយ​យើង​កំពុង​សិក្សា​ពី​លទ្ធភាព​របស់​យើង​នៅ​ពេល​នេះ​»។​

លោក​បន្ថែម​ថា​៖ «​យើង​មាន​ដៃគូ​ថៃ​ថ្មី​មួយ​ក្នុង​ការ​ចូលរួម​សាងសង់​រោងចក្រ​អគ្គិសនី​ដោយ​ធ្យូងថ្ម​ជាមួយ​យើង។​ ប៉ុន្តែ​ ខ្ញុំ​មិន​អាច​និយាយ​បាន​ទេ ​នៅ​ពេល​នេះ​ដោយសារ​តែ​យើង ​កំពុង​ធ្វើការ​នៅ​លើ​គម្រោង​នេះ។​ នៅ​ពេល​អ្វី​ៗ​បាន​បញ្ចប់​ខ្ញុំ​នឹង​ឲ្យ​អ្នក​ដឹង​បាន។ ពេល​នេះ​ យើង​មិន​អាច​ធ្វើអ្វី​ៗ​បាន​ទេ ​ដោយសារ​ តែ​យើង​កំពុង​រង់ចាំ​ឲ្យ​មាន​ការ​បង្កើត​រដ្ឋាភិបាល​ថ្មី​បាន​សិន​»។

យោងតាម​ក្រុម​ប្រឹក្សា​អភិវឌ្ឍន៍​កម្ពុជា ​ប្រទេស​ថៃ ​គឺជា ​វិនិយោគិន​ឈាន​មុខ​គេ​ទី​ ៨​ នៅ​កម្ពុជា ​ដោយ​បាន​ចាក់​បញ្ចូល​ទឹកប្រាក់​ ៧៤៦ ​លាន​ដុល្លារ ​ក្នុង​ប្រទេស​កម្ពុជា​ចាប់ពី​ឆ្នាំ ​១៩៩៤ ​រហូត​ដល់​ឆ្នាំ​ ២០១១៕PB​

អត្ថបទគួរចាប់អារម្មណ៍