ភ្នំពេញៈ ទិន្នន័យពីក្រសួងកសិកម្មបានបង្ហាញថា នៅឆ្នាំ២០១២ មានក្រុមហ៊ុននាំចេញអង្ករធំៗ១០ ក្នុងនោះក្រុមហ៊ុនខ្មែរហ្វូតឈរលំដាប់ទី១។
តួលេខនាំចេញអង្ករសរុបនៅឆ្នាំ២០១២ពីក្រសួងកសិកម្មបង្ហាញថាមានចំនួន២០៥ ៧១៧តោនក្នុងនោះក្រុមហ៊ុនទាំង១០មាន១៥១ ៥៧៥ តោន ខណៈក្រុមហ៊ុននាំចេញអង្ករទាំងអស់នៅទូទាំងប្រទេសមាន៧១ក្រុមហ៊ុន។
អ្នកជំនាញលើកឡើងថា ទិន្នន័យនេះនឹងជួយជំរុញដល់បណ្តាក្រុមហ៊ុននាំចេញឲ្យកាន់តែបង្កើនផលិតភាពរបស់ពួកគេ។
លោក ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិនិងជាអ្នកសរសេរគោលនយោបាយនំាចេញអង្កររបស់កម្ពុជាបានឲ្យដឹងថា៖ «នេះជាការល្អដែលយើងអាចដឹងអំពីព័ត៌មាននៃលទ្ធភាពនំាចេញរបស់ក្រុមហ៊ុននីមួយៗ»។ លោកបន្តថាក្រុមហ៊ុនដែលមានការនាំចេញតិចតួចនឹងបន្តខំប្រឹងប្រែងបង្កើនសមត្ថភាព។
នៅឆ្នាំ២០១២ ក្រុមហ៊ុន ខ្មែរហ្វូត បានឈរនៅលំដាប់លេខ១ដោយនាំចេញបាន៣១ ៤៤១តោន ហើយ Golden Rice ឈរលំដាប់ទីពីរ គឺ ២៦ ០៧១ តោន។
លោក គឹម សាវុធ ប្រធានក្រុមហ៊ុន ខ្មែរហ្វូត បានឲ្យដឹងថា លោកនៅមិនទាន់ពេញចិត្តនឹងលទ្ធផលនេះនៅឡើយទោះបីក្រុមហ៊ុនលោកនាំមុខក្នុងការនាំចេញក៏ដោយ។លោកបន្តថា៖«ខ្ញុំនឹងព្យាយាមបន្ថែមទៀតដើម្បីបង្កើនផលិតភាពនៃការនាំចេញហើយខ្ញុំជឿជាក់ថាក្រុមហ៊ុនផ្សេងទៀតក៏នឹងធ្វើដូចគ្នាព្រោះចំនួននេះមានគម្លាតឆ្ងាយដើម្បីសម្រេចឲ្យបានគោលដៅនាំចេញ១លានតោននៅឆ្នាំ២០១៥»។
ក្រុមហ៊ុន បៃតងកម្ពុជាឈរលំដាប់លេខ ៣ នាំចេញបាន២៤ ២១៣ តោន។ អ្នកបន្ទាប់គឺក្រុមហ៊ុន អមរូរ៉ាយស៍ កម្ពុជា មាន១៦ ១៥៦ តោន ក្រុមហ៊ុន អ៊ីនធើណេសស៊ិនណលរ៉ាយស៍ ត្រេឌីងមាន ១៥ ៤៥០ តោន ក្រុមហ៊ុនឡូរ៉ង់៩ ៦៩៣តោន ក្រុមហ៊ុនមេហ្គាគ្រីន៩ ៣៣៦ តោន ក្រុមហ៊ុន វ៉ាយហ្គោល អ៊ីមផត អិចផត ៧ ៩៨៦ តោន ក្រុមហ៊ុន អិនឌូឆាយណា រ៉ាយស៍មៀលមាន ៥ ៩៣៩ តោន ក្រុមហ៊ុន ខេមវី ហ្វូត៥ ២៩០ តោន៕
