The Phnom Penh Post Search

Search form




Logo of Phnom Penh Post newspaper Phnom Penh Post - ក្រុមហ៊ុន​នាំ​ចេញ​អង្ករ​ប្រឈម​នឹង​ការ​វាយ​លុយ

ក្រុមហ៊ុន​នាំ​ចេញ​អង្ករ​ប្រឈម​នឹង​ការ​វាយ​លុយ

ក្រុមហ៊ុន​នាំ​ចេញ​អង្ករ​ប្រឈម​នឹង​ការ​វាយ​លុយ

20140321_13
អង្ករដែលវេចខ្ចប់សម្រាប់នាំចេញរបស់ក្រុមហ៊ុននាំចេញក្នុងស្រុកមួយ ភ្នំពេញ ប៉ុស្តិ៍

ភ្នំពេញៈ សហគមន៍​អ្នក​នាំ​ចេញ​អង្ករ​កំពុង​ពង្រឹង​ប្រព័ន្ធ​សុវត្ថិភាព​របស់​ខ្លួន​ឡើង​វិញ បន្ទាប់​ពី​មាន​ការ​វាយ​លុក​យក​ទិន្នន័យ​និង​ព័ត៌មាន (Hack) របស់​ក្រុមហ៊ុន​នាំ​អង្ករ​ចេញ​របស់ កម្ពុជា មួយ​ចំនួន​កាល​ពី​ពេល​ថ្មីៗ​នេះ។

ក្រុមហ៊ុន​នាំ​អង្ករ​ចេញ​បាន​ប្រកាស​ពី​ការ​ចូល​លួច​ទិន្នន័យ​និង​ព័ត៌មាន​ពី​គេហទំព័រ និង​សារ​អេឡិច​ត្រូនិក​របស់​ខ្លួន​ពី​ម្សិលមិញ​និង​បាន​ស្នើ​សុំ​ឲ្យ​អ្នក​បញ្ជា​ទិញ​បង្កើន​ភាព​ប្រយ័ត្ន​ប្រយែង​នៅ​ពេល​ទទួល​បាន​វិក្កយបត្រ​ស្នើ​ឲ្យ​ផ្ទេរ​ប្រាក់​ទៅ​ក្នុង​កុង​ធនាគារ​ថ្មី។

ការ​ចូល​លួច​បន្លំ​ទិន្នន័យ និង​ព័ត៌មាន​រួម​មាន​ការ​ផ្ញើ​វិក្កយបត្រ​ទៅ​អ្នក​បញ្ជា​ទិញ​ដើម្បី​ផ្ទេរ​ប្រាក់​ទៅ​កុង​ធនាគារ​ថ្មី​ដោយ​ប្រើ​ប្រាស់​អាសយដ្ឋាន​សារ​អេឡិច​ត្រូនិក​របស់​បុគ្គលិក​ក្រុមហ៊ុន​ជាដើម។

លោក សុខ ដេវិដ អនុ​ប្រធាន​ក្រុមហ៊ុន Golden Rice បាន​ឲ្យ ភ្នំពេញ ប៉ុស្តិ៍ ថា គេហទំព័រ និង​សារ​អេឡិច​ត្រូនិក​របស់​ក្រុមហ៊ុន​ត្រូវ​បាន​គេ​ចូល​លុក​លុយ​រយៈ​ពេល​ប៉ុន្មាន​ខែ​ចុង​ក្រោយ​នេះ។

លោក​ថ្លែង​ថា៖ «ក្រុមហ៊ុន GRC ក៏​ដូចជា​ក្រុមហ៊ុន​នាំ​ចេញ​ដទៃ​ទៀត​ដែរ​គឺ​ត្រូវ​បាន​គេ​ចូល​លុក​លុយ​គេហទំព័រ។ GRC កំពុង​ចាត់​វិធានការ​ពង្រឹង​ប្រព័ន្ធ​សុវត្ថិភាព​បច្ចេកវិទ្យា​របស់​ក្រុមហ៊ុន»។

បើ​ទោះ​ជា​បច្ចុប្បន្ន​ស្ថានភាព​បាន​ប្រសើរ​ឡើង​ហើយ​ក៏​ដោយ​ក៏​ក្រុមហ៊ុន Golden Rice កំពុង​បន្ត​ពង្រឹង​ប្រព័ន្ធ​សុវត្ថិភាព​របស់​ខ្លួន​បន្ថែម​ទៀត។ លោក​បន្ត​ថា ក្រុមហ៊ុន​នឹង​បន្ត​ស៊ើប​អង្កេត​ទៅ​លើ​ករណី​នេះ។

លោក​បាន​ឲ្យ​ដឹង​ថា អ្នក​ដែល​ចូល​លួច​ទិន្នន័យ​នេះ​អាច​ជា​គូ​ប្រជែង ដែល​មិន​មាន​ក្រម​សីលធម៌​ក្នុង​វិស័យ​នេះ។ លោក​បាន​បញ្ជាក់​ថា មិន​ទាន់​មាន​អ្នក​បញ្ជា​ទិញ​ណា​រងគ្រោះ​ខាត​បង់​ជា​ប្រាក់​កាស​ដោយ​សារ​ករណី​នេះ​ទេ។

ការ​លួច​ចូល​យក​ទិន្នន័យ​និង​ព័ត៌មាន​ពី​គេហទំព័រ​និង​សារ​អេឡិច​ត្រូនិក​គឺ​ដោយ​សារ​សុវត្ថិភាព​ប្រព័ន្ធ​បច្ចេកវិទ្យា​នៅ កម្ពុជា នៅ​មាន​កម្រិត។ នេះ​បើ​តាម​ប្រសាសន៍​របស់​លោក វ៉ាន់ ដេវិដ អនុ​ប្រធាន​សម្ព័ន្ធ​អ្នក​ផលិត​ស្រូវ និង​នាំ​ចេញ​អង្ករ កម្ពុជា។

លោក កេន ចាន់ថន ស្ថាបនិក​នៃ​ក្រុមហ៊ុន Ken Group ជា​អ្នក​ជំនាញ​លើ​ប្រព័ន្ធ​បច្ចេកវិទ្យា បាន​ឲ្យ​ដឹង​ថា ការ​លួច​ចូល​យក​ទិន្នន័យ​ពី​គេហទំព័រ​របស់​បណ្តា​ក្រុមហ៊ុន​ផ្សេងៗ​តែង​តែ​កើត​ឡើង​ជា​រឿយៗ។

លោក​បាន​បន្ត​ទៀត​ថា៖ «ជា​ធម្មតា Hacker គាត់​ចូល​ទៅ Hack គេហទំព័រ​ណា​ដែល​ប្រព័ន្ធ​សុវត្ថិភាព​មាន​ភាព​ទន់​ខ្សោយ»។

លោក​បន្ថែម​ថា ត្រូវ​មាន​ច្បាប់​ការពារ​ទាក់​ទង​នឹង​រឿង​សុវត្ថិភាព​នៃ​ប្រព័ន្ធ​ព័ត៌មានវិទ្យា​ដាក់​ទោស​ដល់​ជន​ណា​ដែល​រក​ឃើញ​ថា បាន​ចូល​ទៅ​លួច​ទិន្នន័យ​និង​ព័ត៌មាន​ដោយ​គ្មាន​ការ​អនុញ្ញាត»៕

អត្ថបទគួរចាប់អារម្មណ៍