ភ្នំពេញៈ ក្រុមហ៊ុន ម៉ុង ឫទ្ធីគ្រុប ដែលជាក្រុមហ៊ុននាំចេញប្រេងដូងធំជាងគេក្នុងស្រុកកំពុងកំណត់ទិសដៅក្នុងបណ្ដាប្រទេសអឺរ៉ុបសម្រាប់ការនាំចេញប្រេងដូង និងគ្រាប់ដូងប្រេងរបស់ខ្លួនបន្ទាប់ពីទទួលបានជោគជ័យកាលពីឆ្នាំទៅ។
លោក ម៉ុង ឫទ្ធី ប្រធានក្រុមហ៊ុនបាននិយាយថាដោយសារតែមិនមានការគិតពីកូតា និងការរួចពន្ធដែលផ្ដល់ដោយរដ្ឋាភិបាលសហភាពអឺរ៉ុបក្រុមហ៊ុនរបស់លោកកំពុងទទួលបានការនាំចេញគ្រាប់ដូងប្រេងនិងប្រេងដូងទៅបណ្ដាប្រទេសទាំងនេះ។លោកបន្តថា៖ «ការនាំចេញសរុបរបស់យើងប្រហែលជា៥០ភាគរយដែលមានតម្លៃប្រហែល២៧លានដុល្លារកាលពីឆ្នាំទៅត្រូវបាននាំចេញទៅប្រទេសទាំងនោះ។ ប្រទេសទាំងនោះផ្ដល់ឲ្យយើងដោយមិនគិតកូតានិងការរួចពន្ធដែលយើងអាចទទួលបាន៦០ដុល្លារក្នុងមួយតោនធៀបនឹងម៉ាឡេស៊ីឫក៏ថៃ ដែលតម្រូវឲ្យបង់ពន្ធ។នេះគឺជាការចំណេញដ៏ធំរបស់យើង»។
លោកបន្តថា៖ «ពួកគេលើកទឹកចិត្តដល់យើងឲ្យនាំចេញកាន់តែច្រើនថែមទៀតដោយសារតែយើងមកពីប្រទេសតូចដូច្នេះយើងត្រូវបានគេគាំទ្រនិងមានភាពល្បីល្បាញនៅទីនោះ»។
ក្រុមហ៊ុននេះបានចាប់ផ្ដើមដាំដូងប្រេងកាលពីឆ្នាំ១៩៩៥នៅពេលនោះក្រុមហ៊ុនអាចចម្រាញ់ប្រេងបាន៥តោន។ ប៉ុន្តែដោយសារតែការដាំដូងប្រេងចេះតែកើនឡើងការចម្រាញ់ប្រេងបានកើនឡើងដល់៣០តោនក្នុងមួយម៉ោង។
ក្រុមហ៊ុនរំពឹងថាផលិតផលប្រេងដូងឆៅនឹងកើនឡើងដល់ ២២ ០០០តោននៅឆ្នាំនេះ (ក្នុងចំណោម១១០ ០០០តោននៃដំណាំដូងប្រេង) ដោយកើនពី ១៨ ០០០តោននៃផលិផលប្រេងដូងឆៅកាលពី២០១២។
លោកបន្តថា៖ «យើងមិនភ័យខ្លាចកង្វះទីផ្សារនោះទេ។នៅទីណាមានមនុស្សមានអ្នកទិញដោយសារតែដូងប្រេងអាចធ្វើអាហារបានរហូតដល់២០០មុខ។ យើងមិនបារម្ភអំពីទីផ្សារទេប៉ុន្តែអ្វីដែលយើងបារម្ភអំពីនោះគឺកង្វះដីដាំដូងប្រេងបន្តទៀត»។លោកបន្តថាក្រុមហ៊ុនមានទិសដៅនាំចេញឲ្យបានជាង៣០លានដុល្លារនៅឆ្នាំនេះ ដែលក្នុងនោះជាង៥០ភាគរយនាំចេញទៅអឺរ៉ុប។
លោក ម៉ុង ឫទ្ធី និយាយថាភាគច្រើននៃប្រេងដូងឆៅក្រុមហ៊ុននេះត្រូវបាននាំចេញទៅម៉ាឡេស៊ីជាកន្លែងដែលផលិតផលនេះត្រូវបានបញ្ជូនទៅប្រទេសថៃ ឥណ្ឌា និងអឺរ៉ុប៕ PB
