The Phnom Penh Post Search

Search form




Logo of Phnom Penh Post newspaper Phnom Penh Post - ក្រុមហ៊ុន​របស់ អ៊ីស្រាអ៊ែល ចាប់​អារម្មណ៍​នឹង​ការ​ធ្វើ​កសិកម្ម​ផ្ទះ​កញ្ចក់​នៅ​ប្រទេស កម្ពុជា

ក្រុមហ៊ុន​របស់ អ៊ីស្រាអ៊ែល ចាប់​អារម្មណ៍​នឹង​ការ​ធ្វើ​កសិកម្ម​ផ្ទះ​កញ្ចក់​នៅ​ប្រទេស កម្ពុជា

ក្រុមហ៊ុន​របស់ អ៊ីស្រាអ៊ែល ចាប់​អារម្មណ៍​នឹង​ការ​ធ្វើ​កសិកម្ម​ផ្ទះ​កញ្ចក់​នៅ​ប្រទេស កម្ពុជា

131217_11
ការដាំបន្លែរបស់កសិករខ្មែរតាមបែបធម្មជាតិនៅខេត្តកំពង់ស្ពឺនាពេលកន្លងមក ភ្នំពេញ ប៉ុស្តិ៍

ភ្នំពេញៈ ក្រុមហ៊ុន​កសិកម្ម​របស់ អ៊ីស្រាអ៊ែល មួយ​កំពុង​ស្វែង​រក​លទ្ធភាព​ចូល​មក​ទីផ្សារ កសិកម្ម​របស់​កម្ពុជា​តាម​រយៈ​ការ​នាំ​បច្ចេកវិទ្យា​ផ្ទះ​កញ្ចក់ ដែល​ជា​គំនិត​ថ្មី​មួយ​នៅ​កម្ពុជា។

ក្រុមហ៊ុន Excellence Agritech Solution (EAS) កាល​ពី​ថ្ងៃ​ម្សិលមិញ​បាន​ធ្វើ​សិក្ខាសាលា​នៅ​ភ្នំពេញ​បង្ហាញ​ពី​គម្រោង​ផ្ទះ​កញ្ចក់ Canyon របស់​ខ្លួន។

គម្រោង​នេះ​គឺ​ផ្តល់​សេវា​សាង​សង់​ផ្ទះ​កញ្ចក់​ពី​ទំហំ​ពី ១ ០០០ ទៅ​ដល់ ៣ ០០០ ម៉ែត្រ​ការ៉េ​ដល់​ក្រុម​កសិករ​ដែល​មាន​គ្នា ៦ នាក់​ឡើង​ទៅ។

កញ្ចប់​សេវា​ផ្ទះ​កញ្ចក់​នេះ​មាន​តម្លៃ ៣៦ ០០០ ដុល្លារ។ បន្ថែម​ពី​លើ​កញ្ចប់​សេវា​នេះ សេវាកម្ម​គ្រប់​គ្រង​ការ​សាងសង់​មាន​តម្លៃ​បន្ថែម ៤ ០០០ ដុល្លារ។ សេវាកម្ម​ផ្តល់​ប្រឹក្សា​ពី​អ្នក​ជំនាញ​កសិកម្ម​ដោយ​ផ្ទាល់​ឬ​តាម​ប្រព័ន្ធ​អ៊ីនធឺណិត​មាន​តម្លៃ​ប្រមាណ ១០ ០០០ ដុល្លារ ដែល​នាំ​ឲ្យ​តម្លៃ​សរុប​ដើម្បី​កសាង និង​រក្សា​ផ្ទះ​កញ្ចក់​នេះ​ឡើង​ដល់ ៥០ ០០០ ដុល្លារ។

លោក Oded Eliashiv ស្ថាបនិក និង​ជា​ដៃគូ​គ្រប់​គ្រង​ក្រុមហ៊ុន​បច្ចេកវិទ្យា​កសិកម្ម​បាន​ឲ្យ​ដឹង ថា កសិករ​អាច​ជ្រើស​រើស ការ​ដំឡើង​ផ្ទះ​កញ្ចក់​នៅ​លើ​ដី​ស្រែ​របស់​ពួកគេ​ឬ​លើ​ដី​ក្រុមហ៊ុន EAS។ លោក​បាន​ថ្លែង​ថា៖ «ជា​មូលដ្ឋាន​យើង​អាច​ផ្ដល់​ដី​ដល់​កសិករ​សាង​សង់​ផ្ទះ​កញ្ចក់ ហើយ​យើង​មាន​ដំណោះស្រាយ​មីក្រូ​ហិរញ្ញវត្ថុ​ដែល​នឹង​ជួយ​ដល់​កសិករ ក្នុង​ការ​ចំណាយ។

ក្រុមហ៊ុន EAS ផ្ដល់​ការ​គាំទ្រ​ទាំង​អស់​និង​ជួយ​កសិករ​បង្កើន​ទិន្នផល​ផ្លែ​ឈើ​និង​បន្លែ​ប្រចាំ​ឆ្នាំ និង​ផ្តល់​ទីផ្សារ​កាន់​តែ​ប្រសើរ​សម្រាប់​ផលិតផល​របស់​ពួក​គេ»។

ថ្លែង​ក្នុង​ពិធី​បើក​សិក្ខាសាលា​ស្តី​ពី​គម្រោង​កសិកម្ម​បៃតង អេកូ​ទេសចរណ៍ និង​ទីក្រុង​ផ្ទះ​កញ្ចក់ អគ្គ​នាយក​រង​នៃ​អគ្គ​នាយកដ្ឋាន​កសិកម្ម កញ្ញា ចាន់ ផលលឿន ឲ្យ​ដឹង​ថា ផលិតផល​បន្លែ​នៅ កម្ពុជា ពុំ​ទាន់​បាន​បំពេញ​តាម​តម្រូវការ​បរិភោគ ឲ្យ​បាន​គ្រប់​គ្រាន់​នៅ​ឡើយ​ទេ ដែល​ទាមទារ​ការ​នាំ​ចូល​ពី វៀតណាម និង ថៃ ដោយ​សារ​បច្ចេកទេស​ដាំ​បន្លែ​ដូចជា​ការ​គ្រប់​គ្រង​ទឹក​របស់​កសិករ​កម្ពុជា នៅ​មាន​កម្រិត​នៅ​ឡើយ។

កញ្ញា​រំពឹង​ថា ការ​ណែនាំ​នូវ​បច្ចេកវិទ្យា​ផ្ទះ​កញ្ចក់​គឺជា​មធ្យោបាយ​មួយ​ដែល​នាំ​ឲ្យ វិស័យ​កសិកម្ម​ប្រទេស​កម្ពុជា​ឈាន​មុខ​មួយ​កម្រិត​ទៀត ដែល​នឹង​ជួយ​កាត់​បន្ថយ​ការ​នាំ​ចូល​បន្លែ​ក្នុង​ទីផ្សារ​កម្ពុជា។

ទីប្រឹក្សា​ឧត្ដម​ក្រុមប្រឹក្សា​សេដ្ឋកិច្ច​ជាតិ (SNEC) លោក ម៉ី កល្យាណ យល់​ថា ការ​ណែនាំ​បច្ចេកវិជ្ជា​ផ្ទះ​កញ្ចក់​នេះ​មិន​សមស្រប​សម្រាប់​កសិករ​កម្ពុជា​ដែល​ខ្វះ​ទុន​សម្រាប់​ចំណាយ​ក្នុង​ការ​ដំឡើង​ផ្ទះ​កញ្ចក់​នេះ​ឡើយ។

លោក​ថ្លែង​ថា៖ «ក្រុមហ៊ុន​ឯកជន​ដែល​គេ​ចង់​ដាំ​បន្លែ គេ​យល់​ថា លក់​បន្លែ​ចំណេញ​គេ​ធ្វើ​បាន។ ឲ្យ​កសិករ​យើង​ធ្វើ​ទៅ ធ្វើ​ទៅ​មិន​រួច​ទេ ថ្លៃ​ណាស់»។ លោក​បារម្ភ​ថា កសិករ​អាច​នឹង​ធ្លាក់​ទៅ​ក្នុង​បំណុល​ប្រសិន​បើ​ពួក​គេ​ទៅ​ខ្ចី​ទុន​ពី​គ្រឹះស្ថាន​ហិរញ្ញវត្ថុ​ដើម្បី​ទិញ​បច្ចេកវិជ្ជា​ក៏​ដូចជា​សាង​សង់​ផ្ទះ​កញ្ចក់​នេះ។

ដើម្បី​បង្កើន​ផលិតកម្ម​បន្លែ​លោក ម៉ី កល្យាណ បាន​ឲ្យ​យោបល់​ថា កសិករ​គួរ​ចាប់​យក​បច្ចេកវិទ្យា​សមស្រប​សំដៅ​ទៅ​លើ​វិធីសាស្ត្រ​ដែល​មាន​ស្រាប់ និង​បន្ត​ធ្វើ​ឲ្យ​ប្រសើរ​ឡើង។ លោក​បន្ត​ថា បច្ចេកវិជ្ជា​ដែល​ខ្ពស់​ពេក ខណៈ​សមត្ថភាព​និង​ចំណេះ​ដឹង​នៅ​មាន​កំណត់​គឺជា​ហានិភ័យ​សម្រាប់​អ្នក​អនុវត្ត។

យោង​តាម​លោក Eliashiv ក្រុមហ៊ុន EAS នឹង​វិនិយោគ​ទឹក​ប្រាក់ ១៥ លាន​ដុល្លារ​អាមេរិក​ផង​ដែរ​ក្នុង​គម្រោង​ទីក្រុង​ផ្ទះ​កញ្ចក់​សាកល្បង​លើ​ផ្ទៃ​ដី ២០ ហិកតា​លើ​ផ្ទៃ​ដី​សរុប ៥០ ហិកតា​ក្នុង​ការ​ធ្វើ​តេស្ដ​បច្ចេកវិទ្យា​ថ្មី​នេះ​នៅ​ប្រទេស កម្ពុជា។ តាម​គម្រោង​លើ​ផ្ទៃ​ដី​សរុប​ដែល​ក្រុមហ៊ុន​គ្រោង​នេះ​នឹង​ត្រូវ​ជ្រើសរើស​ខេត្ត​មួយ​ក្នុង​ចំណោម​ខេត្ត បី គឺ ខេត្ត ប៉ៃលិន ខេត្ត បន្ទាយ​មាន​ជ័យ និង ខេត្ត សៀមរាប៕ PB

អត្ថបទគួរចាប់អារម្មណ៍