The Phnom Penh Post Search

Search form

Logo of Phnom Penh Post newspaper Phnom Penh Post - ក្រុមហ៊ុន​អាកាសចរណ៍​ជាតិ​ទិញ​យន្តហោះ​បន្ថែម




ក្រុមហ៊ុន​អាកាសចរណ៍​ជាតិ​ទិញ​យន្តហោះ​បន្ថែម

ក្រុមហ៊ុន​អាកាសចរណ៍​ជាតិ​ទិញ​យន្តហោះ​បន្ថែម

121217_14a
យន្តហោះប្រភេទ ATR របស់ក្រុមហ៊ុនអាកាសចរណ៍កម្ពុជាអង្គរអ៊ែរ ហេង ជីវ័ន

ភ្នំពេញៈ នា​ពេល​ថ្មីៗ​នេះ ក្រុមហ៊ុន​កម្ពុជា​អង្គរ​អ៊ែរ (CAA) បាន​ទិញ​យន្តហោះ​ថ្មី​ប្រភេទ Airbus 321 មួយ​គ្រឿង​ពី​អឺរ៉ុប នៅ​ពេល​ក្រុមហ៊ុន​នេះ​កំពុង​ពង្រីក​ផ្លូវ​ហោះ​ហើរ​អន្តរជាតិ​របស់​ខ្លួន ដើម្បី​ឆ្លើយ​តប​នឹង​កំណើន​តម្រូវ​ការ​ទីផ្សារ​។ ក្រុមហ៊ុន​នេះ​ក៏​គ្រោង​នឹង​នាំ​ចូល​យន្ត​ហោះ​បន្ថែម​មួយ​គ្រឿង​ទៀត​ផង​ដែរ​នៅ​ដើម​ឆ្នាំ​ក្រោយ​។

ក្រុមហ៊ុន​អាកាស​ចរណ៍​កម្ពុជា​អង្គរ​អ៊ែរ គឺជា​ក្រុមហ៊ុន​បណ្តាក់​ទុន​រួម​គ្នា​មួយ​រវាង​រដ្ឋាភិបាល​កម្ពុជា​ដែល​មាន​ភាគ​ហ៊ុន​៥១​ភាគ​រយ ជាមួយ​ក្រុមហ៊ុន​អាកាស​ចរណ៍​វៀតណាម ដែល​ជា​ផ្នែក​មួយ​នៃ​កិច្ច​ព្រម​ព្រៀង​រយៈ​ពេល​៣០​ឆ្នាំ​ក្នុង​គម្រោង​វិនិយោគ​ជា​បឋម​ចំនួន ១០០​លាន​ដុល្លារ។ ក្រុមហ៊ុន​អាកាស​ចរណ៍​នេះ បាន​បើក​ដំណើរ​ការ​ជា​ផ្លូវ​ការ​កាល​ពី​ខែ​កក្កដា​ឆ្នាំ​២០០៩ ដោយ​ប្រើប្រាស់​យន្ត​ហោះ​ប្រភេទ ATR ចំនួន​២​គ្រឿង​ដើម្បី​ហោះ​ហើរ​នៅ​ក្នុង​ស្រុក។

មន្ត្រី​នៅ​រដ្ឋ​លេខាធិការ​ដ្ឋាន​អាកាសចរ​ស៊ីវិល(SSCA)បាន​ប្រាប់​កាសែត​ភ្នំពេញ​ប៉ុស្តិ៍​កាល​ពី​ម្សិល​មិញ​ថា យន្តហោះ​ប្រភេទ Airbus នេះ បាន​មក​ដល់​ខេត្ត​សៀមរាប​នៅ​ថ្ងៃ​សុក្រ​សប្តាហ៍​មុន ហើយ​នឹង​ផ្តល់​សេវា​ហោះ​ហើរ​ផ្លូវ​អន្តរជាតិ​សំខាន់ៗ​ចំនួន​ពីរ​គឺ​ពី​ទីក្រុង​ភ្នំពេញ​ទៅ​ទី​ក្រុង​ហូជីមិញ និង​ពី​ខេត្ត​សៀមរាប​ទៅ​ទីក្រុង​បាងកក ទីក្រុង​ហូជីមិញ និង​ទៅ​ទីក្រុង​ហាណូយ​។

លោក​សយ សុខាន់ អនុ​រដ្ឋ​លេខាធិការ​នៃ​រដ្ឋ​លេខាធិការ​ដ្ឋាន​អាកាសចរ​ស៊ីវិល​ដែល​ទទួល​ខុស​ត្រូវ​រាល់​កិច្ច​ការ​ទាំង​អស់​ជាមួយ​នឹង​ក្រុមហ៊ុន​មួយ​នេះ បាន​ថ្លែង​ថា យន្ត​ហោះ​ប្រភេទ Airbus នេះ បាន​ចាប់​ផ្តើម​ហោះ​ហើរ​លើក​ដំបូង​រួច​ហើយ​កាល​ពី​ថ្ងៃ​សៅរ៍​បន្ទាប់​ពី​បាន​មក​ដល់​ខេត្ត​សៀមរាប​មួយ​ថ្ងៃ ដោយ​មាន​អ្នក​ដំណើរ​ចំនួន​៩៣​នាក់។

លោក សយ សុខាន់ បាន​បន្ត​ទៀត​ថា​៖ «​ឧស្សាហកម្ម​ទេសចរណ៍​របស់​យើង កំពុង​រីក​ចម្រើន​ខ្លាំង ហើយ​មាន​តម្រូវ​ការ​ច្រើន យន្ត​ហោះ​ថ្មី​នេះ​នឹង​ឆ្លើយ​តប​ចំពោះ​តម្រូវ​ការ​ទីផ្សារ​បាន​»។

លោក​ថោង ខុន រដ្ឋ​មន្ត្រី​ក្រសួង​ទេសចរណ៍ រីករាយ​ចំពោះ​ការ​មក​ដល់​របស់​យន្ត​ហោះ​ថ្មី​នេះ​ដោយ​លោក​មាន​ប្រសាសន៍​ថា វា​នឹង​ជួយ​បំពេញ​តម្រូវ​ការ​ផ្នែក​អាកាសចរណ៍​ដែល​កំពុង​កើន​ឡើង​ខ្លាំង​នា​ពេល​បច្ចុប្បន្ន​នេះ។ តែ​លោក​បាន​លើក​ឡើង​ថា នៅ​ពេល​ក្រុមហ៊ុន​នេះ មាន​យន្ត​ហោះ​កាន់​តែ​ច្រើន​នោះ ពួក​គេ​មិន​គួរ​គិត​តែ​ពី​កំណើន​ហោះ​ហើរ​ទៅ​ក្រៅ​ស្រុក ហើយ​កាត់​បន្ថយ​ការ​ហោះ​ហើរ​នៅ​ក្នុង​ស្រុក​ទេ។

លោក​បាន​បន្ត​ថា​៖ «​ជា​បឋម ខ្ញុំ​អបអរ​សាទរ​ពួក​គេ។ តែ​ទន្ទឹម​នឹង​នេះ​ដែរ ក្រុមហ៊ុន​អាកាស​ចរណ៍​នេះ ត្រូវ​គិត​គូរ​ពី​ការ​បង្កើន​ជើង​ហោះ​ហើរ​ក្នុង​ស្រុក​បន្ថែម​ទៀត ខណៈ​តម្រូវ​ការ​កំពុង​កើន​ឡើង​ខ្ពស់ ហើយ​ពួក​គេ​មិន​គួរ​កាត់​បន្ថយ​ជើង​ហោះ​ហើរ​ក្នុង​ស្រុក​ក៏​ដូច​ជា​ពន្យារ​ពេល​ហោះ​ហើរ​ដោយ​ពុំ​មាន​ហេតុ​ផល​ច្បាស់​លាស់​នោះ​ដែរ​»។

លោក​បាន​ផ្តល់​អនុសាសន៍​ដល់​ក្រុមហ៊ុន​កម្ពុជា​អង្គរ​អ៊ែរ ពិចារណា​ផ្តល់​សេវា​ហោះ​ហើរ​ទៅ​កាន់​ប្រទេស​នានា​នៅ​ក្នុង​តំបន់​អាស៊ាន អាស៊ាន​បូក​៣ ក៏​ដូច​ជា​អាស៊ាន​ឥណ្ឌា​។ យើង​ឃើញ​ក្រុមហ៊ុន​អាកាសចរណ៍​របស់​ប្រទេស​ទាំង​នោះ ហោះ​ហើរ​មក​ប្រទេស​របស់​យើង​។ ដូច្នេះ នៅ​ពេល​នេះ​យើង​គួរ​តែ​ហោះ​ហើរ​ទៅ​កាន់​ប្រទេស​ទាំង​នោះ​វិញ ដោយ​សារ​ទីផ្សារ​របស់​ប្រទេស​ទាំង​នោះ មាន​សក្តានុពល​ខ្ពស់​។ បើ​ពួក​គេ​មិន​មក​ទេ [ដូច​ជា​ជប៉ុន] យើង​ត្រូវ​ហោះ​ហើរ​ទៅ​កាន់​ប្រទេស​ទាំង​នោះ​។

លោក សយ សុខាន់ មាន​ប្រសាសន៍​បន្ត​ថា ក្រុមហ៊ុន​អាកាសចរណ៍​កម្ពុជា​អង្គរ​អ៊ែរ បាន​បង្កើន​ជើង​ហោះ​ហើរ​ចំនួន​៥ជើង​ក្នុង​មួយ​ថ្ងៃ​ពី​ទីក្រុង​ភ្នំពេញ​ទៅ​កាន់​ខេត្ត​សៀមរាប និង​៣​ជើង​ក្នុង​មួយ​សប្តាហ៍​ពី​ទីក្រុង​ភ្នំពេញ​ទៅ​កាន់​ខេត្ត​ព្រះសីហនុ​នៅ​រដូវ​ក្តៅ​នេះ។

លោក​ថ្លែង​ដែរ​ថា ក្រុមហ៊ុន​នេះ​គ្រោង​នាំ​ចូល​យន្ត​ហោះ​ប្រភេទ​Airbus 321 នេះ​មួយ​គ្រឿង​ទៀត​នៅ​ដើម​ឆ្នាំ​ក្រោយ ដើម្បី​ចាប់​ផ្តើម​ផ្តល់​សេវា​ហោះ​ហើរ​អន្តរជាតិ​ទៅ​កាន់​ប្រទេស​ចិន កូរ៉េ​និង​ជប៉ុន​។

យោង​តាម​ទិន្នន័យ​របស់​ក្រសួង​ទេស​ចរណ៍ បាន​ឲ្យ​ដឹង​ថា ចំនួន​ភ្ញៀវ​ទេសចរ​ដែល​ចូល​មក​ទស្សនា​ក្នុង​ប្រទេស​កម្ពុជា​តាម​ផ្លូវ​អាកាស បាន​កើន​ឡើង​១៦,៦​ភាគ​រយក្នុង​រយៈ​ពេល​១០​ខែ​ដំបូង​ក្នុង​ឆ្នាំ​នេះ​៕ BP

អត្ថបទគួរចាប់អារម្មណ៍