The Phnom Penh Post Search

Search form




Logo of Phnom Penh Post newspaper Phnom Penh Post - ក្រុមហ៊ុន​អឹមហ្វូន​នឹង​បង់​ប្រាក់​៣០​ភាគរយ​ទៀត​ដល់​អតីត​បុគ្គលិក

ក្រុមហ៊ុន​អឹមហ្វូន​នឹង​បង់​ប្រាក់​៣០​ភាគរយ​ទៀត​ដល់​អតីត​បុគ្គលិក

ក្រុមហ៊ុន​អឹមហ្វូន​នឹង​បង់​ប្រាក់​៣០​ភាគរយ​ទៀត​ដល់​អតីត​បុគ្គលិក

ភ្នំពេញៈ មេធាវី​ក្រុមហ៊ុន​អឹមហ្វូន​ដែល​ក្ស័យធន​បាន​ឲ្យ​ដឹង​ថា ក្រុមហ៊ុន​នេះ​នឹង​ចំណាយ​ប្រាក់ ​៣០ ​ភាគរយ​ទៀត​នៃ​ប្រាក់ឈ្នួល​អតីតភាព​ការងារ​ឲ្យ​បុគ្គលិក​ជាង​១ ០០០​នាក់​នៅ​ថ្ងៃ​ព្រហស្បតិ៍​នេះ​។

ក្រុមហ៊ុន អឹមហ្វូន ត្រូវ​បាន​សម្រេច​ដោយ​សាលាដំបូង​រាជធានី​ភ្នំពេញ​ពី​ការ​ក្ស័យធន កាលពី​ពាក់កណ្ដាល​ខែ​កុម្ភៈ​ឆ្នាំ​មុន បណ្ដាល​ឲ្យ​បុគ្គលិក​ជាង​១ ០០០​នាក់​មិន​ទទួល​បាន​ប្រាក់​ខែ​ដែល​មាន​តម្លៃ​៤,៤​លាន​ដុល្លារ​។

លោក ខាន់ សេរីវុទ្ធី អ្នក​ប្រឹក្សា​ច្បាប់​ជាន់​ខ្ពស់​របស់​អភិបាល​បណ្ដោះអាសន្ន​បាន​ឲ្យ ដឹង​ថា បន្ទាប់ពី​ក្រុមហ៊ុន​នេះ​បាន​លក់​ទ្រព្យ​សកម្ម​សំខាន់ៗ​ជាច្រើន​មក ពួកគេ​បាន​បង់ប្រាក់​ជា​ផ្នែកៗ​ដល់​បុគ្គលិក​ជាច្រើន​មួយ​ជំហាន​ម្ដងៗ​។

លោក​បាន​លើក​ឡើង​ថា​៖ « យើង​បាន​បង់ប្រាក់​ឲ្យ​បុគ្គលិក​របស់​យើង​ពីរ​ដង​រួច​មក​ហើយ ហើយ​នៅ​ថ្ងៃ​នេះ​យើង​នឹង​បង់​ប្រាក់​ឲ្យ​ពួកគេ​៣០​ភាគរយ​ទៀត ដែល​សរុប​មក​មាន​ចំនួន​៧០​ភាគរយ​ហើយ​»។

លោក​បន្ថែម​ថា ទឹកប្រាក់​នេះ​គឺ​បាន​មកពី​ការ​លក់​ទ្រព្យសកម្ម​ឲ្យ​ក្រុមហ៊ុន Khmer Unified Network គ្រប់គ្រង​ដោយ​វិនិយោគិន​ជនជាតិ​ចិន មាន​តម្លៃ​៩,៩​លាន​ដុល្លារ ហើយ​មក​ទល់​ពេល​នេះ​ក្រុមហ៊ុន​បាន​បង់​ប្រាក់​ប្រហែល​ ៤,៤ ​លាន ដុល្លារ​។

លោក​បន្ត​ថា​៖ «​យើង​ស្នើ​ដល់​ក្រុមហ៊ុន សុំ​បង់ប្រាក់​ឲ្យ​យើង​ឲ្យ​បាន​ទាន់​ពេលវេលា​ដើម្បី​យើង​អាច​យក​ប្រាក់ នេះ​ឲ្យ​ទៅ​បុគ្គលិក​។ បន្ទាប់មក​ពេល​យើង​មាន​ប្រាក់​ច្រើន​យើង​នឹង​សង​ដល់​ម្ចាស់​បំណុល​ផ្សេង ទៀត​»​។

លោក ប៉ាង វុទ្ធី តំណាង​អតីត​បុគ្គលិក​បញ្ជាក់​ថា​៖ «​ពិត​ហើយ​យើង​មាន​សេចក្ដី​រីករាយ​ជាមួយ​នឹង​កិច្ចព្រមព្រៀង​នេះ ប៉ុន្តែ​យើង​ចង់​ឲ្យ​ពួកគេ​បង្កើន​ល្បឿន​ដោយសារ​តែ​បុគ្គលិក​ជាច្រើន ផ្សេង​ទៀត​កំពុង​ត្រូវការ​ប្រាក់​បន្ទាប់ពី​ពួកគេ​បាត់បង់​ការងារ​»​។

មេធាវី​របស់​អឹមហ្វូន​បាន​ឲ្យ​ដឹង​ថា​លោក​នឹង​ដាក់ ពាក្យបណ្ដឹង​ផ្សេង​ទៀត​ទៅ​សាលាដំបូង​រាជធានី​ភ្នំពេញ​នៅ​ថ្ងៃ​នេះ ដើម្បី​បង្កក​ប្រាក់​ពី​ក្រុមហ៊ុន​ជំពាក់​ប្រាក់​ចំនួន​៣ មាន​ក្រុមហ៊ុន​មិត្តហ្វូន​ដែល​បាន​ជំពាក់​ប្រាក់​ចំនួន​៥៥២ ៤៥២,៨២​ដុល្លារ ក្រុមហ៊ុន​ Royal Telecom International ជំពាក់​៤៦ ៧៥៣,៤៧​ដុល្លារអាមេរិក​។

បច្ចុប្បន្ន​ក្រុមហ៊ុន​អឹមហ្វូន​បាន​ជំពាក់​ប្រាក់​ក្រុមហ៊ុន Huawei ជាង​៦៥​លាន​ដុល្លារ​អាមេរិក និង​ក្រុមហ៊ុន Altect មាន​តម្លៃ​ប្រហែល​៥​លាន​ដុល្លារអាមេរិក​។ ទ្រព្យសកម្ម​របស់​ក្រុមហ៊ុន​អឹមហ្វូន​ដែល​ត្រូវ​បាន​ប៉ាន់ប្រមាណ​មាន ១០៥​លាន​ដុល្លារ​គឺ​គ្រាន់តែ​ជា​តម្លៃ​នៅក្នុង​បញ្ជី​ទ្រព្យសកម្ម​ប៉ុណ្ណោះ ប៉ុន្តែ​តម្លៃ​នៅលើ​ទីផ្សារ​ពិតប្រាកដ​អាច​មាន​ពី​ជាង​៣០​លាន ដុល្លារ ដល់​៤០​លាន​ដុល្លារ​។

ទីផ្សារ​សេវា​ទូរស័ព្ទ​ចល័ត​នៅ​កម្ពុជា ជា​ទីផ្សារ​តូចអង្អៀត​ដែល​មាន​ការ​ប្រកួតប្រជែង​ខ្លាំង​ដែល​ធ្វើឲ្យ​ក្រុមហ៊ុន​ខ្លះ​ពិបាក​នឹង​ឈរ​ជើង៕PB

អត្ថបទគួរចាប់អារម្មណ៍