ភ្នំពេញៈ ក្រុមហ៊ុនពហុផលិតផលកម្ពុជា ជីប ម៉ុង គ្រុប បានប្រកាសកាលពីថ្ងៃចន្ទថា ក្រុមហ៊ុននេះពង្រីកអាជីវកម្មរបស់ខ្លួនជាផ្លូវការទៅវិស័យហិរញ្ញវត្ថុ ដោយប្រតិបត្តិការធនាគារពាណិជ្ជ ជីប ម៉ុង ដែលជាក្រុមហ៊ុនបុត្រសម្ព័ន្ធទី ១២ របស់ខ្លួន។
ថ្លែងទៅកាន់ក្រុមអ្នកយកព័ត៌មាននៅក្នុងសន្និសីទព័ត៌មានកាលពីម្សិលមិញ លោក Wan Kup Yew ប្រធានធនាគារ ជីប ម៉ុង បានឲ្យដឹងថា ធនាគារនេះទទួលបានអាជ្ញាប័ណ្ណពីធនាគារជាតិនៃកម្ពុជា (NBC) កាលពីខែឧសភា ឆ្នាំមុន និងបានចាប់ផ្តើមបង្កើតក្រុមការងារតាំងពីពេលនោះ។
លោកបន្ថែមថា ធនាគារនេះនឹងចាប់ផ្ដើមជាមួយនឹងផលិតផលហិរញ្ញវត្ថុធម្មតាជាមូលដ្ឋាន មុនពេលផ្លាស់ប្តូរជាបណ្ដើរៗទៅរកធនាគារឌីជីថលឈានមុខគេ។ លោកបានថ្លែងថា៖ «ប្រទេស កម្ពុជា កំពុងរីកចម្រើន ហើយវិស័យក៏ធនាគារកំពុងរីកចម្រើនផងដែរ។ យើងមិនអាចឆ្ពោះទៅរកឌីជីថលទាំងស្រុងភ្លាមទេ ប៉ុន្តែយើងនឹងធ្វើវាតាមជំហាន»។
ធនាគារ ជីប ម៉ុង បានចុះបញ្ជីនៅក្រសួងពាណិជ្ជកម្មចាប់តាំងពីខែកក្កដា ឆ្នាំមុន និងចុះឈ្មោះលោកស្រី ភាព ហៀក ជាប្រធានក្រុមប្រឹក្សាភិបាល ខណៈលោក លាង ឃុន និងលោក លាង ម៉េង ត្រូវបានតែងតាំងជានាយក។
លោក Wan Kup Yew មិនអាចផ្ដល់ព័ត៌មានលម្អិតពីមូលធនរបស់ធនាគារនេះទេកាលពីម្សិលមិញ ប៉ុន្តែលោកបានឲ្យដឹងថា ដើម្បីប្រតិបត្តិការនៅក្នុងប្រទេស កម្ពុជា បាន ធនាគារនេះត្រូវតម្រូវឲ្យមានដើមទុនយ៉ាងហោចណាស់ ៧៥ លានដុល្លារដូចដែលតម្រូវដោយ NBC។
របាយការណ៍ពាក់កណ្ដាលប្រចាំឆ្នាំរបស់ NBC សម្រាប់ឆ្នាំនេះបានឲ្យដឹងថា កម្ពុជាមានធនាគារពាណិជ្ជ ៣៩ និងធនាគារឯកទេស ១៥។
ប្រតិបត្តិការអាជីវកម្មរបស់ ជីប ម៉ុង រួមមានវិស័យសំណង់ និងសម្ភារ ទំនិញប្រើប្រាស់ ការអភិវឌ្ឍអចលនទ្រព្យ អាហារ ភេសជ្ជៈ បដិសណ្ឋារកិច្ច និងវិស័យលក់រាយ៕ LA