.jpg)
ភ្នំពេញៈ រោងចក្រ ជីបម៉ុង អ៊ិនស៊ី ស៊ីមេន (CMIC) ជាក្រុមហ៊ុនបុត្រសម្ព័ន្ធរបស់ក្រុមហ៊ុនពហុផលិតផលក្នុងស្រុក ជីបម៉ុង គ្រុប បានវិនិយោគទឹកប្រាក់ ៤ លានដុល្លារបន្ថែម ដើម្បីបង្កើតរោងចក្រគ្រប់គ្រងកាកសំណល់ឧស្សាហកម្ម ក្នុងគោលបំណងផ្ដល់ដំណោះស្រាយមិនប៉ះពាល់បរិស្ថាន ដើម្បីបោះបង់កាកសំណល់ឧស្សាហកម្មចេញពីរោងចក្រស៊ីម៉ងត៍របស់ខ្លួន។
រោងចក្រគ្រប់គ្រងកាកសំណល់ «ជីបម៉ុង អេកូសាយខល» ដែលត្រូវបានសម្ពោធដាក់ឲ្យដំណើរការកាលពីថ្ងៃព្រហស្បតិ៍នៅរោងចក្រ CMIC នៅស្រុកបន្ទាយមាស ខេត្តកំពត។
លោក លាង ឃុន ប្រធានក្រុមហ៊ុន ជីបម៉ុង គ្រុប បានឲ្យដឹងនៅក្នុងពិធីសម្ពោធដាក់ឲ្យប្រើប្រាស់ថា គម្រោងជីបម៉ុង អេកូសាយខល ត្រូវបានផ្តួចផ្ដើមឡើងចាប់តាំងពីដើមឆ្នាំនេះដោយមានការគាំទ្រពីក្រសួងបរិស្ថាន។ លោកថ្លែងថា៖ «យើងបានចំណាយជាង ៤ លានដុល្លារសម្រាប់គម្រោងនេះដែលស្ថិតក្រោមដំបូលរបស់រោងចក្រ ជីបម៉ុង អ៊ិនស៊ី ស៊ីមេន ខណៈវាជាផ្នែកមួយនៃការវិនិយោគរួមរបស់យើង រវាងក្រុមហ៊ុនជីបម៉ុង គ្រុប»។
លោក សាយ សំអាល់ រដ្ឋមន្ដ្រីក្រសួងបរិស្ថានដែលធ្វើជាអធិបតីក្នុងពិធីនេះ បានឲ្យដឹងថាការដាក់ឲ្យដំណើការរោងចក្រ គ្រប់គ្រងកាកសំណល់ឧស្សាហកម្មនេះគឺជាលើកដំបូងនៅកម្ពុជា។ លោកថ្លែងថា៖ «គម្រោងនេះជួយយើងច្រើនសម្រាប់ការកែច្នៃឡើងវិញនូវកាកសំណល់ឧស្សាហកម្ម ដែលក្រុមហ៊ុននេះយកមកពីក្រុងព្រះសីហនុ និងទីក្រុងភ្នំពេញនេះគឺជាការរួមចំណែកដ៏ធំក្នុងការរក្សាភាពស្អាត និងបរិស្ថានរបស់ប្រទេសយើង»។
លោកបានបន្តថា៖ «ខ្ញុំពិតជាសង្ឃឹមថា រោងចក្រស៊ីម៉ងត៍ផ្សេងទៀតនឹងធ្វើតាមគំរូរបស់ជីបម៉ុង»។ ក្រុមហ៊ុនឲ្យដឹងថា ជីបម៉ុង អេកូសាយខល មានសមត្ថភាពក្នុងការកែច្នៃកាកសំណល់ឧស្សាហកម្មប្រហែល ១០ តោនក្នុង ១ ម៉ោងស្មើនឹងប្រហែល ៧ ០០០ តោន ក្នុង ១ ខែ។ រោងចក្រកែច្នៃកាកសំណល់នេះមានការញែក និងកែច្នៃកាកសំណល់រឹងដែលផ្ដល់ដំណោះស្រាយដល់ឧស្សាហកម្មកាត់ដេរ និងស្បែកជើង និងវិស័យផ្សេងទៀត។
CMIC បានដាក់ឲ្យដំណើរការកាលពីខែកុម្ភៈ ឆ្នាំ ២០១៨ អាចផលិតស៊ីម៉ងត៍ ៥ ៥០០ តោន ក្នុង ១ ថ្ងៃ៕LA
