.jpg)
រដ្ឋមន្ត្រីក្រសួងកសិកម្ម វេង សាខុន (ស្តាំ) ក្នុងពិធីចុះហត្ថលេខាកាលពីខែមិថុនា។ ហុង មិនា
ភ្នំពេញ: ក្រុមហ៊ុន និងសហគមន៍ស្វាយយ៉ាងហោចណាស់ ៥០ បានដាក់ពាក្យស្នើសុំទៅក្រសួងកសិកម្ម រុក្ខាប្រមាញ់ និងនេសាទ ដើម្បីទទួលបានសិទ្ធិនាំចេញស្វាយស្រស់ទៅកាន់ទីផ្សារប្រទេសចិន បន្ទាប់ពីភាគីចិនយល់ព្រមឱ្យកម្ពុជានាំចេញផ្លែស្វាយស្រស់ជាផ្លូវការទៅកាន់ទីផ្សារដ៏ធំនៅអាស៊ីមួយនេះចំនួន ៥០ ម៉ឺនតោន ក្នុង ១ ឆ្នាំៗ។
លោក កែ មុន្ធីវុធ ប្រធាននាយកដ្ឋានការពារដំណាំ អនាម័យ និងភូតគាមអនាម័យនៃក្រសួងកសិកម្មបានប្រាប់ភ្នំពេញប៉ុស្តិ៍កាលពីថ្ងៃអង្គារថា គិតត្រឹមខែកញ្ញាឆ្នាំនេះ អគ្គនាយកដ្ឋានទទួលបានពាក្យស្នើសុំចុះបញ្ជីចម្ការស្វាយ ទីតាំងវេចខ្ចប់ពីក្រុមហ៊ុន សហគមន៍កសិកម្ម ម្ចាស់ចម្ការ និងកសិដ្ឋានសរុប ៤៥ ហើយក្រុមហ៊ុន ២៣ មានបំណង និងកំពុងសាងសង់ហេដ្ឋារចនាសម្ព័ន្ធប្រព្រឹត្តិកម្មសម្លាប់ពងរុយចោះផ្លែស្វាយ។
លោកបានបន្តថា ផ្អែកតាមខ្លឹមសារនៃពិធីសារដែលកម្ពុជា-ចិន ចុះកិច្ចព្រមព្រៀងជាមួយគ្នាកាលពីខែមិថុនាកន្លងទៅបានបង្ហាញថា ផ្លែស្វាយស្រស់កម្ពុជាអាចនាំចេញទៅកាន់ប្រទេសចិនបានលុះត្រាតែចុះបញ្ជីកសិដ្ឋាន និងទីតាំងវេចខ្ចប់នៅអគ្គនាយកដ្ឋានកសិកម្មដែលទទួលស្គាល់ដោយអ្នកជំនាញគយប្រទេសចិន (GACC)។
លោកថ្លែងថា៖ «ទាំងនេះទាមទារការចូលរួមពីអ្នកវិនិយោគទាំងក្នុង និងក្រៅប្រទេសក្នុងការសាងសង់ប្រព្រឹត្តិកម្មសម្លាប់សមាសភាពចង្រៃដោយប្រើចំហាយទឹកក្តៅ និងប្រព្រឹត្តិកម្មទឹកក្តៅនេះ»។
កាលពីខែមិថុនាឆ្នាំនេះ ប្រទេសកម្ពុជា និងចិនបានចុះកិច្ចព្រមព្រៀងជាផ្លូវការនៅក្នុងការនាំចេញស្វាយស្រស់ចំនួន ៥០ ម៉ឺនតោន ក្នុង ១ ឆ្នាំដែលនេះជាការបើកផ្លូវក្នុងការជំរុញការនាំចេញកសិផលក្នុងស្រុកទៅកាន់ទីផ្សារធំជាងគេនៅអាស៊ីមួយនេះ។
លោកបន្តថា៖ «អគ្គនាយកដ្ឋានកសិកម្មបាននិងកំពុងខិតខំប្រឹងប្រែងជំរុញការអនុវត្តសកម្មភាពលើកកម្ពស់ខ្សែចង្វាក់ផលិតកម្មដំណាំស្វាយសម្រាប់នាំចេញទៅកាន់ទីផ្សារប្រទេសចិន តាមរយៈសិក្ខាសាលាផ្សព្វផ្សាយលក្ខខណ្ឌតម្រូវភូតគាមអនាម័យដល់អ្នកពាក់ព័ន្ធ»។
លោក ឈុន ដារ៉ូ ប្រធានផ្នែករដ្ឋបាលរបស់ក្រុមហ៊ុន Cam MJ Agricultural Park ដែលជាការវិនិយោគរបស់វិនិយោគិនចិនប្រាប់ ភ្នំពេញ ប៉ុស្តិ៍ កាលពីថ្ងៃអង្គារថា ក្រុមហ៊ុនលោកនៅមិនទាន់ដាក់ពាក្យស្នើសុំនៅឡើយទេ ព្រោះក្រុមហ៊ុនកំពុងដំឡើងម៉ាស៊ីនសម្លាប់សមាសភាពចង្រៃលើផ្លែឈើស្រស់។
លោកថ្លែងថា៖ «យើងមិនទាន់ដំឡើងម៉ាស៊ីនរួចរាល់ទេ ដោយសារបញ្ហាជំងឺកូវីដ ១៩ បានរាំងស្ទះដល់ដំណើរការនេះ យើងមានចំណាប់អារម្មណ៍យ៉ាងខ្លាំងចំពោះទីផ្សារនាំចេញផ្លែស្វាយស្រស់ទៅប្រទេសចិន»។
លោក ដារ៉ូ បានឱ្យដឹងថា ក្រុមហ៊ុននេះមានរោងចក្រចំនួន ២ គឺរោងចក្រកែច្នៃតំណាប់ស្វាយដែលសាងសង់លើផ្ទៃដីទំហំ ១០០ ហិកតាក្នុងស្រុកគងពិសី និងរោងចក្រដែលគ្រោងនឹងដំឡើងម៉ាស៊ីនសម្លាប់សមាសធាតុចង្រៃលើផ្លែស្វាយ និងវេចខ្ចប់នៅលើផ្ទែដី ២៤ ហិកតាក្នុងស្រុកភ្នំស្រួច។
កម្ពុជាបាននាំចេញផ្លែស្វាយស្រស់ជាង ៦២ ៩២០ តោនរយៈពេល ៩ ខែដើមឆ្នាំ ២០២០ នេះកើន ៥៨ ភាគរយធៀបនឹង ៩ ខែនៃឆ្នាំមុន។ ផ្លែស្វាយត្រូវនាំចេញទៅកាន់ទីផ្សារថៃ វៀតណាម បារាំង កូរ៉េខាងត្បូង និងហុងកុង៕ LA
