ភ្នំពេញៈ ក្រុមហ៊ុនផលិតនំស្រួយ លីលី ដែលជាក្រុមហ៊ុនផលិតអាហារក្នុងស្រុកបានប្រកាសពីការវិនិយោគរួម ១៦ លានដុល្លារជាមួយក្រុមហ៊ុនជប៉ុន ដើម្បីបង្កើតក្រុមហ៊ុនថ្មីមួយឈ្មោះ លីលីខាមេដា ដើម្បីបង្កើនការនាំចេញរបស់ខ្លួន ៣ ដងលើការនាំចេញបច្ចុប្បន្នរបស់ក្រុមហ៊ុន។
ក្រុមហ៊ុន លីលី កាលពីចុងខែមីនាបានចុះហត្ថលេខាលើការវិនិយោគរួមជាមួយក្រុមហ៊ុនជប៉ុន Kameda Seika ដោយមានការវិនិយោគសរុបជាង ១៦,១ លានដុល្លារអាមេរិក ក្នុងនោះ ៥១ ភាគរយគ្រប់គ្រងដោយក្រុមហ៊ុន Kameda Seika និង ៤៩ ភាគរយគ្រប់គ្រងដោយក្រុមហ៊ុន លីលី ។ នេះបើយោងតាម លោក អៀង ម៉ុង នាយកគ្រប់គ្រងក្រុមហ៊ុន Ly Ly Food industry Co.,Ltd ។
អ្នកស្រី កែវ មុំ អគ្គនាយកក្រុមហ៊ុន លីលី បានថ្លែងថាក្នុងចំណោមទឹកប្រាក់ជាង ១៦ លានដុល្លារនេះក្រុមហ៊ុន លីលី មានទុន ១,៥ លានដុល្លារ ខណៈអ្នកស្រីផ្ទាល់បានដាក់មូលធនខ្លួនឯងជាង ៦,៤ លានដុល្លារដែលសរុបទុនពីខាងភាគីក្នុងស្រុក ៧,៩ លានដុល្លារ។ ក្នុងហ៊ុនវិនិយោគរួមថ្មីនេះនឹងចាប់ផ្ដើមនៅខែឧសភា។
លោក អៀង ម៉ុង បានថ្លែងថាក្រុមហ៊ុនថ្មីនេះនឹងចាប់ផ្ដើមការផលិតលើកដំបូងរបស់ខ្លួននៅដើមឆ្នាំក្រោយ ខណៈឯកសារបានដាក់ទៅក្រុមប្រឹក្សាអភិវឌ្ឍន៍កម្ពុជា (CDC) រួចហើយ ហើយនឹងរៀបចំឯកសារដើម្បីដាក់ជូនទៅក្រសួងពាណិជ្ជកម្មនៅថ្ងៃនេះ។
លោកថ្លែងថា៖ «ទោះបីជាយើងបាននាំចេញផលិតផលរបស់យើងទៅកាន់ ១០ ប្រទេសរួចហើយក៏ដោយ ក៏វានៅតែនៅមានកម្រិត វាជាទីផ្សារមានសក្ដានុពលល្អ សម្រាប់ពួកយើងក្នុងការចូលរួមការវិនិយោគរួមជាមួយក្រុមហ៊ុនស្ដង់ដារ និងល្បីឈ្មោះមកពីប្រទេសជប៉ុន»។ លោកបន្តថា៖ «យើងចង់ពង្រីកការផលិតរបស់យើង និងបង្កើនការនាំចេញបន្ថែមទៀត វានឹងធ្វើឲ្យកេរ្ដិ៍ឈ្មោះអាហារខ្មែរកាន់តែល្បី»។
ខណៈដែលក្រុមហ៊ុន Ly Ly Food industry Co.,Ltd បច្ចុប្បន្ននាំចេញជាមធ្យមពី ៤ ទៅ ៦ កុងតឺន័រ (ទំហំ ៤០ ហ្វីត) ក្នុងមួយខែលោក អៀង ម៉ុង ថ្លែងថា ក្រុមហ៊ុនគ្រោងនឹងនាំចេញទៅអតិថិជនធំៗនៃក្រុមហ៊ុន Kameda របស់ខ្លួន នៅជុំវិញពិភពលោកដោយធ្វើការព្យាករថានឹងកើនឡើងពី ៣០ ទៅដល់ ៤០ កុងតឺន័រក្នុងមួយខែ។
លោក ឡុង កែមវិចិត្រ អ្នកនាំពាក្យនៅក្រសួងពាណិជ្ជកម្ម ស្វាគមន៍ការវិនិយោគរួមរបស់ក្រុមហ៊ុន លីលី ជាមួយក្រុមហ៊ុនជប៉ុនដែលនឹងធ្វើឲ្យមានទំនុកចិត្តបន្ថែមទៀតលើស្ដង់ដារ និងសុវត្ថិភាពអាហារទៅទីផ្សារអន្តរជាតិ។
លោកថ្លែងថា៖ «ក្រុមហ៊ុននេះនឹងបន្ថែមតម្លៃដល់ផលិតផលរបស់យើង និងប្រើប្រាស់សម្ភារថ្មីៗកាន់តែច្រើនមកពីឧស្សាហកម្មរបស់ពួកយើងនេះគឺជាគោលនយោបាយរបស់រដ្ឋាភិបាលក្នុងការជំរុញសហគ្រាសក្នុងស្រុកឲ្យផលិតផលិតផលសម្រេចជាជាងនាំចេញវត្ថុធាតុដើម»។
លោក តែ តាំងប៉ ប្រធានសហព័ន្ធសហគ្រាសធុនតូច និងមធ្យមកម្ពុជាបានឲ្យដឹងថា សមិទ្ធផលនៃកិច្ចសហការពីក្រុមហ៊ុន លីលី ជាឧទាហរណ៍ដ៏ល្អសម្រាប់ឧស្សាហកម្ម SME ក្នុងការបង្កើនសមត្ថភាពរបស់ពួកគេ ខណៈវានឹងនាំយកបច្ចេកវិទ្យាខ្ពស់ និងស្ដង់ដារ ព្រមទាំងជំនាញមកកម្ពុជាផងដែរ។
លោកថ្លែងថា៖ «កិច្ចសហការរវាងក្រុមហ៊ុន លីលី និងក្រុមហ៊ុនជប៉ុននឹងនាំយកបច្ចេកវិទ្យាខ្ពស់ ស្ដង់ដារ និងជំនាញឲ្យឧស្សាហកម្មកម្ពុជា»។ លោកបន្ថែមថា៖ «យើងអាចទាក់ទាញវិនិយោគិនបានកាន់តែច្រើន យើងបង្កើនសមត្ថភាពរបស់យើង និងកាត់បន្ថយការនាំចូលកាន់តែច្រើន ហើយវានឹងទៅដល់ទីផ្សារអន្តរជាតិផងដែរ ខណៈយើងមានវត្ថុធាតុដើមដែលមានសក្ដានុពលជាច្រើន»៕ LA