.jpg)
យុវនារី ២ រូបកំពុងផលិតផលិតផលអនុស្សាវរីយ៍ធ្វើពីដីឥដ្ឋនៅខេត្តកំពង់ឆ្នាំង។ រូបថត facebook
ភ្នំពេញៈ ក្រសួងពាណិជ្ជកម្ម និងក្រុមហ៊ុនឯកជន ២ បានចុះអនុស្សរណៈយោគយល់គ្នា (MoU) ដើម្បីជំរុញសកម្មភាពពាណិជ្ជកម្ម និងលើកកម្ពស់ការប្រើប្រាស់ផលិតផលក្នុងស្រុក ព្រមទាំងអភិវឌ្ឍផលិតផលកុលាលភាជន៍ដែលជាផលិតផលប្រពៃណីបុរាណនៅក្នុងខេត្តកំពង់ឆ្នាំង។
ក្រុមហ៊ុន ខេមបូឌា បេវេរេដ ខមប៉ានី លីមីធីត (កូកា កូឡា) និងក្រុមហ៊ុន ប៊ីយ៉ន រីថេល ប៊ីហ្សនេស (ខេមបូឌា) ឯ.ក ដែលជាក្រុមហ៊ុនផ្តល់ប្រឹក្សាផ្នែកពាណិជ្ជកម្ម សេវាកម្ម និងលក់រាយបានចុះហត្ថលេខាជាមួយអគ្គនាយកដ្ឋានជំរុញពាណិជ្ជកម្មនៃក្រសួងពាណិជ្ជកម្មកាលពីថ្ងៃទី ១១ ខែមករា ដោយមន្ត្រីក្រសួងនេះអះអាងថា វានឹងជំរុញការលើកកម្ពស់ផលិតផលក្នុងស្រុកតាមរយៈសកម្មភាពពិព័រណ៍នានា។
សេចក្តីប្រកាសក្រសួងពាណិជ្ជកម្មឱ្យដឹងថា MoU នេះនឹងបង្កើតឱកាសគ្រប់គ្រងធុរកិច្ចដល់ស្ត្រីក្នុងការចូលរួមអភិវឌ្ឍវិស័យពាណិជ្ជកម្ម និងលើកស្ទួយសេដ្ឋកិច្ចសង្គមដែលធ្វើឱ្យប្រជាជនទទួលផលប្រយោជន៍។
ការចុះ MoU រវាងអគ្គនាយកដ្ឋានជំរុញពាណិជ្ជកម្ម និងក្រុមហ៊ុន ប៊ីយ៉ន រីថេល ប៊ីហ្សនេស (ខេមបូឌា) ឯ.ក នឹងអនុញ្ញាតឱ្យភាគីទាំង ២ សហការជំរុញពាណិជ្ជកម្មលើផលិតផលសិប្បកម្ម ដោយក្នុងនោះមានការរៀបចំកម្មវិធីជំរុញពាណិជ្ជកម្មលើផលិតផលសិប្បកម្មសំដៅការអភិវឌ្ឍផលិតផលកុលាលភាជន៍កម្ពុជានៅខេត្តកំពង់ឆ្នាំង។ នេះបើតាមសេចក្តីប្រកាសរបស់ក្រសួង។
បច្ចុប្បន្នខេត្តកំពង់ឆ្នាំងមានសិប្បកម្មស្មូនដីនៅក្នុង ២ ឃុំ គឺឃុំជ្រៃបាក់ និងឃុំស្រែថ្មីក្នុងស្រុករលាប្អៀរ និងសង្កាត់ខ្សាមក្រុងកំពង់ឆ្នាំង ដែលបានផលិតចង្ក្រាន ក្អម ឆ្នាំងដី ផើង និងកុលាលភាជន៍ជាវត្ថុអនុស្សាវរីយ៍ និងសម្ភារប្រើប្រាស់ពីដី។ នេះបើតាមមន្ទីរពាណិជ្ជកម្មខេត្តកំពង់ឆ្នាំង។
MoU នេះក៏នឹងរៀបចំរចនាសម្ព័ន្ធផលិតកម្ម និងពង្រឹងសហគមន៍ផលិត បណ្តុះបណ្តាលធនធានមនុស្ស អភិវឌ្ឍផលិតផល អភិវឌ្ឍទីផ្សារ និងជំរុញការប្រើប្រាស់ផលិតផលកុលាលភាជន៍កម្ពុជាឱ្យបានទូលំទូលាយក្នុងទិសដៅលើកកម្ពស់ការប្រើប្រាស់ផលិតផលក្នុងស្រុក និងរួមចំណែកដោះស្រាយបញ្ហាប្រឈមនានាក្នុងខ្សែចង្វាក់តម្លៃ ពង្រឹងផលិតភាព និងគុណភាពផលិតផល។
លោក ស៊ាង ថៃ អ្នកនាំពាក្យក្រសួងពាណិជ្ជកម្មប្រាប់ ភ្នំពេញ ប៉ុស្តិ៍ថា ក្រសួងកំពុងខិតខំជំរុញការប្រើប្រាស់ផលិតផលក្នុងស្រុកតាមរយៈការបង្កើតកម្មវិធីតាំងពិព័រណ៍ផលិតផលខ្មែរដែលក្នុង ១ ឆ្នាំចន្លោះពី ៥-៦ លើកនៅតាមបណ្តាខេត្តមួយចំនួន។
លោកបញ្ជាក់ថា៖ «តាមរយៈការចុះអនុស្សរណៈនេះ យើងនឹងសហការគ្នាជំរុញផ្សព្វផ្សាយផលិតផលខ្មែរដើម្បីឱ្យប្រជាជនកម្ពុជាកាន់តែស្រឡាញ់ផលិតផលយើងបន្ថែមទៀត។ ចំណែកក្រុមហ៊ុន កូកា កូឡា នឹងសហការផ្តល់នូវការរៀបចំកម្មវិធីក្រសួងពាណិជ្ជកម្មទាំងការផ្សព្វផ្សាយ និងការផ្តល់វគ្គបណ្តុះបណ្តាល គាត់អាចធ្វើជាវាគ្មិននិយាយពីអាជីវកម្មបង្ហាញដល់សហគ្រាសទើបបង្កើតថ្មី»៕ LA
