.jpg)
ភ្ញៀវកិត្តិយស និងថ្នាក់ដឹកនាំពិសេសៗចូលរួមពិធីសម្ពោធ ៣ សាខាក្នុងថ្ងៃតែ១។ ហ៊ាន រង្សី
ក្រុមហ៊ុនធានារ៉ាប់រងអាយុជីវិត AIA Cambodia បានសម្ពោធ ៣សាខា ក្នុងថ្ងៃតែមួយ ដើម្បីជួយប្រជាជនកម្ពុជាកាន់តែច្រើនឲ្យរស់នៅមានសុខភាពល្អ អាយុវែងយូរអង្វែង និងការរស់នៅកាន់តែល្អប្រសើរ។
ពិធីសម្ពោធនេះត្រូរបានប្រារព្វឡើងនៅថ្ងៃទី ៧ ខែ តុលា ឆ្នាំ ២០២០ នៅសណ្ឋាគារ៉ូសវូដ រាជធានីភ្នំពេញ។ សាខា AIA ទាំង ៣ នោះ រួមមាននៅខេត្តកំពង់ចាម កំពត និង បាត់ដំបង ដោយរំពឹងថា នឹងបង្កើតការងារប្រកបដោយគុណភាពខ្ពស់ជាច្រើន និង ចូលរួមចំណែកយ៉ាងសំខាន់ដល់សេដ្ឋកិច្ចក្នុងតំបន់នីមួយៗ។
លោក Tan HakLeh អគ្គនាយកប្រចាំតំបន់ មានប្រសាសន៍ថា «ប្រវត្តិជាង ១០០ ឆ្នាំនិងវត្តមានរបស់យើងនៅក្នុងតំបន់បានបង្រៀនឲ្យយើងចេះប្រឈមទៅនឹងពេលវេលាលំបាកផ្សេងៗ ចេះឆ្លើយតបពេលវេលាដែលត្រូវឆ្លងកាត់ និង ស្វាគមន៍ពេលវេលាដ៏ប្រសើរទៅចំពោះមុខ»។
លោកបន្តថា ទោះបីជាយើងកំពុងរងប៉ះពាល់បណ្តាលមកពីជំងឺកូវីដ-១៩ យើងនៅតែបន្តគំនិតវិជ្ជមានប្រកបដោយសុទិដ្ឋិនិយមជានិច្ចចំពោះអនាគតនៃប្រទេសកម្ពុជា និងវត្តមានរបស់អេអាយអេ នៅទីនោះ។
លោកស្រី Pauline Teoh អគ្គនាយិកាប្រតិបត្តិ អេអាយអេ ខេមបូឌា បានមានប្រសាសន៍ថា «យើងខ្ញុំពិតជាមានសេចក្តីសោមនស្សរីករាយក្រៃលែងចំពោះការបើកសម្ពោធសាខាថ្មីចំនួន ៣ បន្ថែមនៅកម្ពុជាដែលព្រឹត្តិការណ៍ដ៏សំខាន់មួយនេះបង្ហាញពីដំណើររីកលូតលាស់យ៉ាងឆាប់ រហ័សរបស់យើង។ បន្ទាប់ពីមានបញ្ហាប្រឈមដែលមិនធ្លាប់មានពីមុន ក្នុងឆ្នាំ ២០២០ នេះ ដោយសារជំងឺរាតត្បាតកូវីដ-១៩ យើងប្រកាន់ជំហរយ៉ាងមុតមាំក្នុងការចាប់ផ្តើមដំណើរការអាជីវកម្មឡើងវិញដើម្បីបន្តផ្តល់ជូននូវដំណោះស្រាយសេវាធានារ៉ាប់រងអាយុជីវិតឈានមុខគេលើទីផ្សារដល់ប្រជាជននៅខេត្ត កំពង់ចាម បាត់ដំបង និងកំពត។
AIA Cambodia សម្ពោធ ៣ សាខាក្នុងថ្ងៃតែ ១ កំពង់ចាម កំពត បាត់ដំបង។ហ៊ាន រង្សី
ជាមួយគ្នានេះដែរ ឯកឧត្តម ម៉ី វ៉ាន់ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានឧស្សាហកម្មហិរញ្ញវត្ថុ ដែលបានចូលរួមក្នុងកម្មវិធីសម្ពោធនេះ បានវាយតម្លៃខ្ពស់ចំពោះការសម្ពោធសាខា អេអាយអេ ទាំងបីនេះ ក្នុងការចូលរួមអភិវឌ្ឍន៍វិស័យធានារ៉ាប់រងនៅកម្ពុជា ខណៈវិស័យមួយនេះបានកំពុងក្លាយជាសសរស្តម្ភមួយទៀតនៃវិស័យហិរញ្ញវត្ថុ និង ធនាគារ។
ឯកឧត្តមបានគូសបញ្ជាក់ថា ការបើកសម្ពោធសាខាទាំងបីនេះ បង្ហាញថា នៅកម្ពុជានៅតែជាទិសដៅដ៏សំខាន់សម្រាប់ការវិនិយោគបរទេស។ «ទោះបីជាជំងឺរាតត្បាតកូវីដ១៩ បានបង្កើតឧបសគ្គជាច្រើនក៏ដោយ ក៏កម្ពុជាត្រូវបានសម្លឹងមើលឃើញ និងជំរុញក្រុមហ៊ុនអន្តរជាតិ ដូចជា ក្រុមហ៊ុន អេអាយអេ បន្តវិនិយោគជាមួយអនាគតប្រទេសកម្ពុជា ដោយជួយបង្កើនការងារជាច្រើន និងរួមចំណែកដល់ការអភិវឌ្ឍប្រទេសកម្ពុជា»។
បើតាម ឯកឧត្តម ម៉ី វ៉ាន់ បច្ចុប្បន្នមានក្រុមហ៊ុនធានារ៉ាប់រងចំនួន ៣៨ ក្នុងនោះមានក្រុមហ៊ុនធានារ៉ាប់រងទូទៅចំនួន ១៨ ក្រុមហ៊ុនធានារ៉ាប់រងអាយុជីវិត ១៤ ក្រុមហ៊ុនធានារ៉ាប់រងខ្នាតតូចចំនួន ៦ ។ ជាមួយគ្នានេះ បុព្វលាភធានារ៉ាប់រងដល់សរុបមានចំនួន ២៥២ លានដុល្លារអាមេរិកក្នុងឆ្នាំ ២០១៩ ដែលតួរលេខនេះមានការកើនឡើងប្រមាណ ៣០ ភាគរយ បើធៀបទៅនឹងឆ្នាំ ២០១៨ ខណៈ ការទូទាត់សំណងជូនអតិថិជនប្រមាណ ៣៦ លានដុល្លារ។
គិតត្រឹមឆមាសទី១ ឆ្នាំ ២០២០ នេះ ទីផ្សារធានារ៉ាប់រងសរុបប្រមាណ ១២៨ លានដុល្លារអាមេរិក ដែលក្នុងនោះបុព្វលាភធានារ៉ាប់រងទូទៅមានចំនួន ៥៧ លានដុល្លារ និង បុព្វលាភធានារ៉ាប់រងអាយុជីវិតមានចំនួន ៧១ លានដុល្លារ ដែលតួលេខនេះបង្ហាញឱ្យឃើញថា ទីផ្សារធានារ៉ាប់រងកម្ពុជា មិនទទួលផលប៉ះពាល់បណ្តាលមកពីជំងឺកូវីដ ១៩ នោះទេ។
ពិធីសម្ពោធនេះបានបន្ថែមចំនួនសាខា អេអាយអេ ខេមបូឌា សរុបចំនួន ៤ បន្ទាប់ពីការដាក់បើកដំណើរការសាខាខេត្តសៀមរាប កាលពីឆ្នាំមុន។ កំណើនដ៏គួរឱ្យកត់សម្គាល់នេះបានកើតឡើងក្នុងរយៈពេលត្រឹម ៣ ឆ្នាំ បន្ទាប់ពីចាប់ផ្តើមដំណើរការជាផ្លូវការក្នុងឆ្នាំ ២០១៧ ។
ក្រុមហ៊ុន អេអាយអេ នឹងផ្តល់ជូនដំណោះស្រាយធានារ៉ាប់រងអាយុជីវិតឈានមុខគេលើទីផ្សារដល់ ប្រជាជនកម្ពុជាល្អជាងពេលណាៗទាំងអស់។ ក្រុមហ៊ុនយល់ថា វេលានេះ គឺជាពេលវេលាដ៏ល្អប្រសើរជាងពេលណាទាំងអស់ ដើម្បីពង្រីកវិសាលភាព និង ផ្លាស់ប្តូរសេវាធានារ៉ាប់រងអាយុជីវិតទៅជាវិធីចម្បងមួយ ដើម្បីផ្តល់សន្តិភាពផ្លូវចិត្ត និង ប្រឆាំងការពារនឹងជំងឺផ្សេងៗដូចជា ជំងឺកូវីដ-១៩ ជាដើម៕
