.jpg)
ក្រុមហ៊ុន Amazon កាលពីថ្ងៃពុធបានបង្ហាញប្រាក់ពន្ធបង់ឲ្យបារាំង ក្រោយមានការចោទប្រកាន់ថាបង់មិនគ្រប់គ្រាន់។ រូបថត AFP
ក្រុងប៉ារីសៈ ក្រុមហ៊ុន Amazon កាលពីថ្ងៃពុធបានចេញផ្សាយទឹកប្រាក់ពន្ធដែលក្រុមហ៊ុនបានបង់ទៅឲ្យអាជ្ញាធរបារាំងដែលបង្ហាញថា ក្រុមហ៊ុននេះបានចូលរួមវិភាគទានទាំងលើពន្ធ និងមិនមែនពន្ធចំនួន ២៥០ លានអឺរ៉ូ កាលពីឆ្នាំមុន បន្ទាប់ពីមានការចោទប្រកាន់ថា ក្រុមហ៊ុនពាណិជ្ជកម្មអេឡិចត្រូនិករបស់អាមេរិកមួយនេះមិនបង់ពន្ធគ្រប់គ្រាន់ទៅក្នុងថវិកាជាតិរបស់បារាំង។
ប្រទេសបារាំងកំពុងស្ថិតនៅជួរមុខក្នុងកិច្ចប្រឹងប្រែងរឹតបន្តឹងការដកហូតពន្ធលើក្រុមហ៊ុនឌីជីថលអន្តរជាតិ ហើយសភាបារាំងបានធ្វើឲ្យរដ្ឋាភិបាលរបស់លោកប្រធានាធិបតីអាមេរិក ដូណាល់ ត្រាំ ខឹងសម្បាកាលពីខែកក្កដា ដោយសារការអនុម័តច្បាប់ពន្ធឌីជីថលនេះដែលនឹងដកហូតលើក្រុមហ៊ុននានាដូចជា Google, Apple, Facebook និង Amazon ជាដើមទៅលើប្រាក់ចំណូលដែលក្រុមហ៊ុនទាំងនេះរកបានក្នុងប្រទេស បារាំង។
ប្រទេស បារាំង និងប្រទេសផ្សេងទៀតលើកឡើងថា ក្រុមហ៊ុនឌីជីថលអន្តរជាតិបែបនេះត្រូវតែបង់ពន្ធលើប្រាក់ចំណូលដែលពួកគេរកបាននៅក្នុងប្រទេសមួយ បើទោះជាការិយាល័យសាជីវកម្ម ឬពន្ធរបស់ក្រុមហ៊ុនទាំងនោះស្ថិតនៅទីកន្លែងណាក៏ដោយ ដូចជានៅប្រទេសអៀរឡង់ ឬលុចសំបួ ជាទីដែលប្រាក់ចំណេញរបស់ក្រុមហ៊ុនត្រូវបានដកហូតពន្ធក្នុងអត្រាទាបបើធៀបនឹងប្រទេសផ្សេងទៀត។
លោក Frederic Duval ប្រធានក្រុមហ៊ុន Amazon France បានថ្លែងថា៖ «ក្រុមហ៊ុន Amazon កំពុងរីកលូតលាស់ក្នុងប្រទេស បារាំង ហើយខណៈដែលកំណើនលូតលាស់នោះកើនឡើង ក្រុមហ៊ុនក៏ផ្តល់វិភាគទានដល់សេវាសាធារណៈដល់គំរូសង្គមបារាំង»។
ក្រុមហ៊ុនឲ្យដឹងក្នុងសេចក្តីថ្លែងការណ៍មួយថា ក្នុងឆ្នាំ ២០១៨ «ការកាត់ទឹកប្រាក់កាតព្វកិច្ចដែលមានទំនាក់ទំនងនឹងសកម្មភាពរបស់ក្រុមហ៊ុន Amazon ក្នុងប្រទេសបារាំងមានចំនួនជាង ២៥០ លានអឺរ៉ូ»។ ក្នុងចំណោមទឹកប្រាក់ទាំងនោះទឹកប្រាក់ប្រហែល ១៥០ លានអឺរ៉ូត្រូវបានចាត់ចូលជា «ការកាត់ផ្ទាល់» ដូចជា ពន្ធសាជីវកម្ម និងវិភាគទានរបស់និយោជក។ ទឹកប្រាក់ដែលនៅសល់ត្រូវបានចុះបញ្ជីថាជាពន្ធដែលប្រមូលក្នុងនាមឲ្យរដ្ឋ ដូចជាពន្ធលើតម្លៃបន្ថែម និងសន្តិសុខសង្គមជាដើម។
លោក Duval បានថ្លែងថា ការបង្ហាញតួលេខនេះគឺដោយសារមានការសួរនាំញឹកញាប់ពេក៕ KC
