.jpg)
គេហទំព័រ Mykhmercar.com ដែលអាចឲ្យអ្នកលក់លក្ខណៈបុគ្គល និងក្រុមហ៊ុនក្នុងស្រុក អាចលក់រថយន្តរបស់ពួកគេដោយងាយស្រួល រហ័ស និងសុវត្ថិភាព។ ភ្នំពេញ ប៉ុសិ៍្ត
ភ្នំពេញៈ AsiaCarGroup ជាក្រុមហ៊ុនបង្កើតថ្មីរបស់ប្រទេស អូស្រ្តាលី បានដាក់ដំណើរការទីផ្សារអនឡាញសម្រាប់ការទិញលក់រថយន្តនៅកម្ពុជា ឈ្មោះ Mykhmercar.com ដែលអាចឲ្យអ្នកលក់លក្ខណៈបុគ្គល និងក្រុមហ៊ុនក្នុងស្រុក អាចលក់រថយន្តរបស់ពួកគេដោយងាយស្រួល រហ័ស និងសុវត្ថិភាព។ នេះបើយោងតាមសេចក្ដីប្រកាសព័ត៌មានចេញផ្សាយកាលពីថ្ងៃម្សិលមិញ។
AsiaCarGroup ជាផ្នែកមួយរបស់គេហទំព័រ Emerging Classifieds Ventures កំពុងប្រតិបត្តិការទីផ្សារអនឡាញសម្រាប់រថយន្ត និងអចលនទ្រព្យនៅក្នុងទីផ្សារកំពុងអភិវឌ្ឍន៍ក្នុងដំណាក់កាលដំបូងជុំវិញពិភពលោក ដែលគ្រប់គ្រងគេហទំព័រជាង ១០ នៅក្នុងប្រទេស ៩០ ផ្សេងៗគ្នា។
គេហទំព័រអនឡាញនេះ អាចឲ្យអ្នកលក់ជាបុគ្គល ព្រមទាំងក្រុមហ៊ុន អាចលក់រថយន្ត ម៉ូតូ និងរថយន្តដឹកទំនិញ របស់ពួកគេដោយងាយស្រួល រហ័ស និងសុវត្ថិភាព ដោយប្រើប្រាស់គេហទំព័រនេះ ហើយការស្វែងរកអ្នកទិញក៏លឿនជាងពីមុនផងដែរ។ នេះបើយោងតាមសេចក្ដីប្រកាសព័ត៌មាន។
ជាមួយនឹងបទពិសោធដែលទទួលបាននៅទីផ្សារអភិវឌ្ឍន៍ ជុំវិញពិភពលោក AsiaCarGroup កំពុងផ្ដល់ដល់ក្រុមហ៊ុនចែកចាយរថយន្តក្នុងស្រុកនូវគេហទំព័រ SaaS CRM សម្រាប់ឲ្យក្រុមហ៊ុនទាំងនោះអាចគ្រប់គ្រងស្ដុករបស់ពួកគេកាន់តែប្រសើរ។
សេចក្ដីប្រកាសព័ត៌មានដដែលបានឲ្យដឹងថា៖ «គេហទំព័រ Mykhmercar.com អាចឲ្យអ្នកលក់រថយន្តជាបុគ្គលក្នុងស្រុក ព្រមទាំងអ្នកលក់អាជីព ស្វែងរកអ្នកទិញតាមមធ្យោបាយកាន់តែមានប្រសិទ្ធភាព ដោយប្រើប្រាស់ប្រសិទ្ធភាពរបស់គេហទំព័រអនឡាញនេះ និងអេកូស៊ីស្ដែមរបស់ពួកគេ»។
ខណៈបច្វុប្បន្នមានអ្នកប្រើប្រាស់អ៊ីនធឺណិតប្រហែល ១២,៥ លាននាក់ នៅក្នុងប្រទេស កម្ពុជា ក្នុងនោះប្រជាជនជាង ៨ លាននាក់ ប្រើបណ្ដាញសង្គម ប្រជាជនកម្ពុជាកំពុងប្រើប្រាស់សេវាអនឡាញកាន់តែច្រើនឡើងៗ ដើម្បីទិញ និងលក់ទំនិញ។ នេះបើយោងតាម AsiaCarGroup។
បច្ចុប្បន្នប្រទេស កម្ពុជា មានរថយន្តយ៉ាងហោចណាស់ ៥០ ម៉ឺនគ្រឿង ចរាចរនៅតាមដងផ្លូវ និងប្រហែល ៩០ ភាគរយគឺជារថយន្តជជុះ ដែលជាអាជីវកម្មកើនឡើងខ្លាំងនៅក្នុងប្រទេសនេះ៕LA
