ភ្នំពេញៈ Cellcard ជាប្រតិបត្តិករទូរស័ព្ទចល័តឈានមុខគេមួយរបស់កម្ពុជា បានសហការជាមួយក្រុមហ៊ុន Electroneum (ETN) ជារូបិយប័ណ្ណឌីជីថល មានមូលដ្ឋាននៅចក្រភពអង់គ្លេស ដើម្បីផ្ដល់ឲ្យអ្នកប្រើកាន់តែងាយស្រួលបញ្ចូលទឹកប្រាក់តាមកម្មវិធីឌីជីថល ETN។
សេចក្ដីប្រកាសរបស់ ETN កាលពីថ្ងៃទី ៣១ ខែមករា ស្ថិតក្រោមភាពជាដៃគូនេះនឹងអាចឲ្យអ្នកប្រើប្រាស់កម្មវិធី ETN បញ្ចូលទឹកប្រាក់ក្នុងទូរស័ព្ទចល័តពួកគេតាមរយៈកម្មវិធី ETN ដែលប្រើប្រាស់ ETN Rewards។ សម្រាប់ Cellcard អ្នកប្រើប្រាស់អាចបញ្ចូលទឹកប្រាក់ក្នុងទូរស័ព្ទរបស់ពួកគេតាមប្រព័ន្ធអ៊ីនធឺណិត និងទិន្នន័យជាមួយនឹងរូបិយប័ណ្ណឌីជីថលរបស់ក្រុមហ៊ុន ETN។
លោក Richard Ells ស្ថាបនិក និងជាអគ្គនាយក Electroneum បានឲ្យដឹងនៅក្នុងសេចក្ដីប្រកាសនេះថា ប្រទេសកម្ពុជាគឺជាយុទ្ធសាស្ដ្រការពង្រីកអាជីវកម្មរបស់ក្រុមហ៊ុននេះទៅក្នុងតំបន់អាស៊ីអាគ្នេយ៍ ខណៈប្រជាជនវ័យក្មេងគឺជាទ្រព្យសកម្មដ៏សំខាន់សម្រាប់ក្រុមហ៊ុននេះក្នុងការនាំយកបច្ចេកវិទ្យាថ្មីនេះ។
លោក Rechard ថ្លែងថា៖ «យើងទើបនឹងចាប់ផ្ដើមសហការជាមួយប្រតិបត្តិករទូរស័ព្ទចល័តឈានមុខគេរបស់ប្រទេសកម្ពុជា Cellcard។ នៅពេលនេះកម្ពុជាមានសារៈសំខាន់ខ្លាំងបំផុតចំពោះពួកយើងនៅអាស៊ីអាគ្នេយ៍ និងជាទីផ្សារដ៏ធំមួយសម្រាប់ពួកយើង»។
លោកបន្តថា៖ «កម្ពុជាគឺជាប្រទេសរីកចម្រើនរហ័សទី ៦ លើពិភពលោក ហើយកម្ពុជាមានប្រជាជនវ័យក្មេង និងចាប់អារម្មណ៍ជាមួយបច្ចេកវិទ្យាថ្មី។ កម្ពុជា គឺជាទីតាំងឈរជើងលើកដំបូងរបស់ពួកយើងនៅក្នុងតំបន់ ហើយខ្ញុំចង់និយាយថា ក្រុមហ៊ុន Electroneum គឺជាក្រុមហ៊ុនបច្ចេកវិទ្យាមួយដែលអាចផ្លាស់ប្តូរ និងលើកកម្ពស់ជីវភាពប្រជាជាតិទូទាំងតំបន់អាស៊ីអាគ្នេយ៍ ជាពិសេសស្របជាមួយនឹងកម្មវិធីដែលយើងទើបនឹងបាននាំចូលទីផ្សារនេះ»។
សេចក្ដីប្រកាសរបស់ Cellcard កាលពីថ្ងៃចន្ទបានឲ្យដឹងថា ជាមួយនឹងកម្មវិធីរបស់ក្រុមហ៊ុន Electroneum អ្នកប្រើប្រាស់របស់ក្រុមហ៊ុន Cellcard អាចទទួលបាន ETN Reward និងបំប្លែងទៅជាការបញ្ចូលទឹកប្រាក់នៅលើគណនី Cellcard របស់អ្នក។
ការសិក្សាមួយពីក្រុមហ៊ុន Visa ជាក្រុមហ៊ុននាំមុខគេរបស់ពិភពលោកផ្នែកទូទាត់ឌីជីថលដែលបានចេញផ្សាយកាលពីខែកក្កដាឆ្នាំមុនបានបង្ហាញថា ប្រជាជនកម្ពុជាកំពុងចាប់យកការទូទាត់តាមឌីជីថលដោយកើនឡើង ៤៣ ភាគរយធៀបនឹងរយៈពេលដូចគ្នាកាលពីឆ្នាំ ២០១៨។
ការសិក្សាបង្ហាញថា ប្រជាជនកម្ពុជា ២៤ ភាគរយ ក្នុងចំណោមអ្នកទាំងនោះ ដែលបានស្ទង់មតិបានចាប់អារម្មណ៍លើការទូទាត់តាមទូរស័ព្ទចល័ត ខណៈប្រហែល ១ ភាគ ៣ ចាប់អារម្មណ៍លើការទូទាត់តាមអ៊ីនធឺណិត។
ចំនួនស៊ីមកាតទូរស័ព្ទចល័តដែលចុះបញ្ជីមានចំនួន ១៩,៧ លាន ខណៈការប្រើប្រាស់អ៊ីនធឺណិតចល័តមានចំនួន ១៣,៩ លាននៅរយៈពេល ៣ ខែដំបូងឆ្នាំ ២០១៩។ នេះបើតាមរបាយការណ៍បានពីនិយតករទូរគមនាគមន៍កម្ពុជា (TRC) កាលពីខែកក្កដាឆ្នាំមុន៕LA