ភ្នំពេញៈ ក្រុមហ៊ុនវាយនភណ្ឌ Eclat Textile Co មានមូលដ្ឋាននៅតៃវ៉ាន់ ដែលផ្គត់ផ្គង់សម្លៀកបំពាក់ និងស្បែកជើងកីឡា ដល់ក្រុមហ៊ុន Nike Inc និង Lululemon Athletica Inc នឹងវិនិយោគលើរោងចក្រថ្មីនៅប្រទេសអាស៊ីអាគ្នេយ៍ ដែលរួមមានកម្ពុជា ដោយសារក្រុមហ៊ុននេះយល់ថា ខ្លួនកំពុងប្រឈមនឹងការលំបាក ដែលចាំបាច់ត្រូវពង្រីកក្រៅពីប្រទេស វៀតណាម។ នេះបើតាមប្រធានរបស់ក្រុមហ៊ុន។
ក្រុមហ៊ុននេះនឹងវិនិយោគលើរោងចក្រថ្មី នៅក្នុងប្រទេស កម្ពុជា ឬ ឥណ្ឌូនេស៊ី ជាមួយនឹងការរំពឹងថា នឹងវិនិយោគ ៨០ លានដុល្លារ លើការបង្កើតចង្វាក់ផលិត ១២០ នៅក្នុងតំបន់នេះ។
ក្នុងបទសម្ភាសមួយជាមួយ ទីភ្នាក់ងារព័ត៌មាន Bloomberg news លោក Hung Cheng-hai ប្រធានក្រុមហ៊ុននេះបានឲ្យដឹងថា ការវិនិច្ឆ័យពីស្ថានការពិភពលោក អ្វីដែលសំខាន់បំផុតនៅពេលនេះ គឺការធ្វើពិពិធកម្ម។
លោកថ្លែងថា៖ «អតិថិជនចង់ឲ្យយើងធ្វើពិពិធកម្មហានិភ័យ ហើយមិនចង់ឲ្យមូលដ្ឋានផលិតស្ថិតនៅក្នុងប្រទេសតែមួយនោះទេ»។
លោកបានបន្តថា៖ «នៅពេលនេះ ៥០ ភាគរយ នៃសម្លៀកបំពាក់របស់យើងត្រូវបានផលិតនៅក្នុងប្រទេស វៀតណាម ដូច្នេះយើងមិនបានធ្វើពិពិធកម្មឲ្យបានគ្រប់គ្រាន់នោះទេ»។
លោក ច័ន្ទ សុផល ប្រធានវិទ្យាស្ថានដើម្បីសិក្សាគោលនយោបាយបានប្រាប់ភ្នំពេញប៉ុស្តិ៍ថា ផែនការពង្រីកចង្វាក់ផលិតកម្មថ្មីរបស់ក្រុមហ៊ុន Eclat Textile Co នៅកម្ពុជាគឺជាយុទ្ធសាស្ត្រដ៏វែងឆ្ងាយរបស់ក្រុមហ៊ុនធំនេះ ខណៈកម្ពុជាស្ថិតក្នុងទីតាំងភូមិសាស្ត្រល្អ គោរពសិទ្ធិកម្មករ និងកម្រិតប្រាក់ឈ្នួលសមរម្យ។
លោកបន្តថា៖ «កម្ពុជាយើងមានចំណុចវិជ្ជមានមួយចំនួន ការគោរពសិទ្ធិកម្មករ ដែលមានអង្គការ ILO ជួយតាមដានវាយតម្លៃ ក្រោមគម្រោង រោងចក្រកាន់តែប្រសើរនៅកម្ពុជា ហើយជាទីតំាងយុទ្ធសាស្ត្រមួយ មានស្ថិរភាពនយោបាយ និងសេដ្ឋកិច្ច»។
ស្ថានភាពរបស់កម្ពុជាបច្ចុប្បន្នកំពុងប្រឈមនឹងការដកប្រព័ន្ធអនុគ្រោះពន្ធ EBA ពីសហភាពអឺរ៉ុប។
ប៉ុន្តែលោក ច័ន្ទ សុផល បានឲ្យដឹងថា ក្រុមហ៊ុនធំៗនឹងមិនបារម្ភពីបញ្ហា EBA ដែលកម្ពុជាអាចប្រឈមនឹងការបាត់បង់នោះទេ។ លោកថ្លែងថា៖ «រឿង EBA ខ្ញុំចង់ឆ្លើយថា សម្រាប់ក្រុមហ៊ុនធំៗ គេមិនមែននំាចេញតែទៅទីផ្សារអឺរ៉ុបទេ គេនាំចេញទៅទីផ្សារអាមេរិកផងដែរ ក្រុមហ៊ុនទាំងនោះបានបង់ពន្ធពេញលេញរួចទៅហើយ [ចេញពីទីតាំងផលិតក្រៅពីកម្ពុជា] ទៅទីផ្សារអន្តរជាតិ»។
ក្រុមហ៊ុន Eclat Textile Co បានចាកចេញពីប្រទេស ចិន កាលពីឆ្នាំ ២០១៦ ដោយសារតែលក្ខខណ្ឌមិនល្អសម្រាប់ការផលិត ហើយសម្រេចចិត្តជំនួសការពង្រីកនៅក្នុងប្រទេស វៀតណាម។
ពេលនេះសង្គ្រាមពាណិជ្ជកម្មពិភពលោកឡើងកម្ដៅ ក្រុមហ៊ុន Eclat យល់ថា ខ្លួនឯងងាយទទួលរងគ្រោះជាថ្មី និងចាំបាច់ត្រូវទៅហួសពីប្រទេស វៀតណាម។
នៅពេលនេះក្រុមហ៊ុន Eclat កំពុងស្វែងរកក្នុងការបង្កើតមជ្ឈមណ្ឌលការផលិតក្នុងតំបន់តូចៗកាន់តែច្រើន ដែលអាចមានភាពរហ័សក្នុងការបម្រើអតិថិជន។
លោក Hung បានប្រាប់ទីភ្នាក់ងារព័ត៌មាន Bloomberg ថា ក្រុមហ៊ុនផលិតវាយនភណ្ឌមួយនេះ នឹងមិនបន្ថែមរោងចក្រ ឬការពង្រីកនៅក្នុងប្រទេស វៀតណាម នៅក្នុងរយៈពេល ៣ ឆ្នាំបន្ទាប់ទេ។
ក្រុមហ៊ុន Eclat Textile មានរោងចក្ររួចហើយនៅក្នុងប្រទេស កម្ពុជា ដែលផលិតស្បែកជើង និងអាវចាក់។
ប៉ុន្តែក្រុមប្រឹក្សាភិបាលរបស់ក្រុមហ៊ុនមួយនេះ នឹងសម្រេចទីតាំងជាក់លាក់សម្រាប់ការវិនិយោគថ្មីនេះនៅឆ្នាំនេះថាតើនៅកម្ពុជា ឬឥណ្ឌូនេស៊ី។ នេះបើតាមលោក Hung Cheng-hai Hung។
ភាពតានតឹងផ្នែកពាណិជ្ជកម្មរវាងអាមេរិក និងប្រទេស ចិន បានបង្ខំឲ្យក្រុមហ៊ុនជាច្រើនត្រូវរកទីតាំងផលិតថ្មី នៅក្រៅប្រទេស ចិន ទៅបណ្ដាប្រទេសផ្សេងទៀត ដូចជាកោះតៃវ៉ាន់ វៀតណាម និងបង់ក្លាដែស។
ប៉ុន្តែ លោក ដូណាល់ ត្រាំ កាលពីខែមុនបានរិះគន់ប្រទេស វៀតណាម ដែលទទួលបានអត្ថប្រយោជន៍ដោយសារតែសង្គ្រាមពាណិជ្ជកម្មនេះ ដែលហៅប្រទេសនេះថា ជាប្រទេសរំលោភពាណិជ្ជកម្មដ៏ធំ និងហូតពន្ធនាំចូលកាន់តែខ្ពស់លើដែកថែប។
ក្រុមប្រឹក្សាអភិវឌ្ឍន៍កម្ពុជាជារឿយៗបានបង្ហាញពីការអនុម័តគម្រោងវិនិយោគជាច្រើនរបស់ក្រុមហ៊ុនចិន ប៉ុន្តែមិនបានបង្ហាញថា ការចូលមករបស់ក្រុមហ៊ុនទាំងនោះដោយសារការគេចចេញពីជម្លោះពាណិជ្ជកម្មរវាងចិន និងអាមរិក ឬយ៉ាងណានោះទេ៕ LA