ភ្នំពេញៈ GreenFeed (Cambodia) Co., Ltd ដែលជាក្រុមហ៊ុនផលិត និងផ្គត់ផ្គង់ចំណីសត្វ និងចំណីជ្រូកបាននាំចូលជ្រូកពូជរបស់ក្រុមហ៊ុន PIC ជិត ២ ៥០០ ក្បាល ជាលើកដំបូងពីប្រទេសវៀតណាម មកកម្ពុជា បន្ទាប់ពីក្រុមហ៊ុននេះបានប្រតិបត្តិការជាផ្លូវការកសិដ្ឋានចិញ្ចឹមជ្រូករបស់ខ្លួននៅកម្ពុជា កាលពីខែមេសា។
សារព័ត៌មាន Vietnam Investment Review បានឱ្យដឹងកាលពីថ្ងៃទី ១៥ ខែឧសភាថា ក្រុមហ៊ុន GreenFeed Vietnam JSC បានប្រកាសកាលពីថ្ងៃទី ១៩ ខែមេសាថា ខ្លួនបាននាំចេញជ្រូកពូជរបស់ក្រុមហ៊ុន PIC ជំហានដំបូង ២ ៤០០ ក្បាល ចូលមកទីផ្សារប្រទេសកម្ពុជាពីកសិដ្ឋាន Cu Jut នៅខេត្ត Dak Nong ខ្ពង់រាបភាគកណ្ដាលរបស់ប្រទេសវៀតណាម។
ចំពោះការចិញ្ចឹមរបស់ក្រុមហ៊ុន GreenFeed នៅកម្ពុជាត្រូវបានរំពឹងថា នឹងផលិតជ្រូកបាន ២ ២០០ ក្បាល ជ្រូកពូជ 300 GF24 និងជ្រូក ២ ២០០ ក្បាលក្នុង ១ ខែ សម្រាប់លក់លើទីផ្សារកម្ពុជា។
កាលពីថ្ងៃទី ៩ ខែមេសា ក្រុមហ៊ុន GreenFeed Cambodia បានបើកដំណើរការជាផ្លូវការកសិដ្ឋានចិញ្ចឹមជ្រូក ដែលបានបំពាក់ដោយបច្ចេកវិទ្យាចុងក្រោយបំផុតនៅក្នុងស្រុកមេមត់ ខេត្តត្បូងឃ្មុំ។
ក្រុមហ៊ុនបានសរសេរនៅលើទំព័រហ្វេសប៊ុកថា៖ «យើងបានត្រៀមខ្លួនជាស្រេចក្នុងការផលិត ដើម្បីផ្គត់ផ្គង់ជ្រូកពូជមានគុណភាពខ្ពស់ដល់កសិករកម្ពុជាក្នុងពេលឆាប់ៗនេះ»។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានកត់សម្គាល់ថា បច្ចុប្បន្នប្រទេសកម្ពុជាបាននាំចូលជ្រូកក្នុងចំនួនច្រើនពីប្រទេសវៀតណាម និងថៃ ខណៈដែលផលិតផលក្នុងស្រុកនៅមិនអាចឆ្លើយតបបានតាមតម្រូវការក្នុងស្រុក។
លោកថ្លែងថា៖ «យើងស្វាគមន៍ចំពោះការនាំចូលកូនជ្រូកពូជរបស់ក្រុមហ៊ុនមកកាន់ប្រទេសយើង ប៉ុន្តែក្រុមហ៊ុនត្រូវធានាឱ្យប្រាកដថា ជ្រូកពូជនេះមិនមានជំងឺប៉េស្ដជ្រូក ប្រសិនបើមិនប្រាកដទេ វានឹងឆ្លងដល់សត្វជាច្រើននៅក្នុងប្រទេសកម្ពុជា»។
ប្រព័ន្ធព័ត៌មានវៀតណាមក៏បានឱ្យដឹងថា នៅក្នុងប្រទេសកម្ពុជា ជ្រូកពូជ GF24 នឹងត្រូវចិញ្ចឹមនៅក្នុងកសិដ្ឋានមួយមានផ្ទៃដីទំហំ ៨៣ ហិកតា ដែលប្រតិបត្តិការដោយក្រុមហ៊ុន GreenFeed ជាមួយនឹងទ្រុងដ៏ទំនើបបំពាក់ដោយឧបករណ៍ល្អៗដែលអនុវត្តតាមគំរូការចិញ្ចឹមរបស់ក្រុមហ៊ុន និងស្ដង់ដារបស់ក្រុមហ៊ុន PIC៕ LA