ភ្នំពេញៈ ប្រព័ន្ធព័ត៌មាន Media Mernama របស់ប្រទេសម៉ាឡេស៊ី បានឱ្យដឹងកាលពីថ្ងៃទី ៣ ខែមីនាថា Tealive ជាយីហោ «តែ» ឈានមុខគេនៅអាស៊ីអាគ្នេយ៍ត្រៀមខ្លួនរួចរាល់ ដើម្បីចូលទីផ្សារប្រទេសកម្ពុជា និងបង្កើតហាងលក់ឱ្យបាន ២៥ ក្នុងរយៈពេល ៥ ឆ្នាំ។
ក្រុមហ៊ុន Loob Holding Sdn Bhd (LHSB) បានចុះកិច្ចព្រមព្រៀងយីហោពាណិជ្ជសញ្ញាជាមួយ HSC Group ជាឧស្សាហកម្មអាហារ និងភេសជ្ជៈ (F&B) នៅកម្ពុជា។
ក្រុមហ៊ុនមួយនេះបានឱ្យដឹងថា កម្ពុជានឹងក្លាយជាទីផ្សារទី ៨ បន្ទាប់ពីម៉ាឡេស៊ី វៀតណាម មីយ៉ាន់ម៉ា ប្រ៊ុយណេ ហ្វីលីពីន អូស្ដ្រាលី និងចក្រភពអង់គ្លេស។ នេះបើយោងតាមសេចក្ដីរាយការណ៍។
លោក Bryan Loo ស្ថាបនិក និងអគ្គនាយកក្រុមហ៊ុន Loob Holding បានឱ្យដឹងថា ក្រុមហ៊ុន HSC យល់ឃើញថា យីហោក្រុមហ៊ុន Tealive គឺពិតជាល្អ ដោយសារតែក្រុមហ៊ុននេះបានគ្រប់គ្រងយីហោអន្តរជាតិផ្សេងៗនៅក្នុងឧស្សាហកម្ម F&B។
លោកថ្លែងថា៖ «តាមទិសដៅរបស់យើង យើងនឹងនាំយកមកនូវប្រភេទអាជីវកម្ម Tealive 3.0 ដែលឆ្លើយតបតាមលក្ខខណ្ឌនៃការរស់នៅតាមគន្លងថ្មី ដូចជាការបញ្ជាទិញ និងការបង់ប្រាក់ដោយមិនចាំបាច់ធ្វើដោយផ្ទាល់ ដោយមិនចាំបាច់ចុះពីរថយន្ត និងការបើករថយន្តចូលគួបផ្សំនឹងអាហារសម្រន់ច្រើនទៀត»។
លោក សុខ ហុង ប្រធានក្រុមហ៊ុន HSC Group បានឱ្យដឹង ថានេះជាពេលវេលាល្អបំផុត ដោយសារតែប្រជាជនកម្ពុជាត្រៀមខ្លួនរួចរាល់ក្នុងការទទួលយកវប្បធម៌តែទំនើប ដែលយីហោអន្តរជាតិផ្សេងៗបានចូលក្នុងទីផ្សារនេះក្នុងរយៈពេលជាច្រើនឆ្នាំមកហើយ។
លោកបន្ត៖ «យើងមានមោទនភាព និងរីករាយក្នុងការបង្ហាញយីហោ Tealive ដល់ប្រជាជនកម្ពុជា ដែលជាយីហោផលិតផលប្រណីត និងនវានុវត្តន៍តម្លៃទាប ពិតជាអ្វីដែលប្រជាជនកម្ពុជាវ័យក្មេងចង់បាន»៕ LA