ភ្នំពេញៈ ផែនការដាំកប្បាសសាកល្បងលើកទី ២ នៅលើផ្ទៃដីទំហំ ១៨០ ហិកតារបស់ក្រុមហ៊ុនចិន Jiangsu Lianfa អាចនឹងលេចចេញជារូបរាងនាពេលខាងមុខ ខណៈដែលដើមកប្បាសដែលបានដាំក្នុងគម្រោងសាកល្បងលើកទី ១ កំពុងលូតលាស់ល្អ។ នេះបើតាមព័ត៌មាននៅលើប្រព័ន្ធសង្គមរបស់ក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃម្សិលមិញ។
បច្ចុប្បន្ន កប្បាស ដែលក្រុមហ៊ុន Jiangsu Lianfa កំពុងដាំសាកល្បងលើកទី ១ ក្នុងខេត្តពោធិ៍សាត់លើផ្ទៃដីទំហំ ៣ អា កំពុងលូតលាស់យ៉ាងល្អសមស្របតាមគុណភាពដី និងក្សេត្របរិស្ថាននៅតំបន់នេះ ហើយសង្ឃឹមថា កប្បាស នឹងផ្តល់់ផលបានយ៉ាងល្អប្រសើរគួរជាទីគាប់ចិត្ត។
ក្នុងឱកាសចុះទៅពិនិត្យទីតាំងជាក់ស្តែង លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានវាយតម្លៃខ្ពស់ចំពោះលទ្ធផលពិសោធនេះ និងបានជំរុញឲ្យមានការសហការគ្នាដោះស្រាយបញ្ហា និងបន្តអនុវត្តផែនការសកម្មភាពសំខាន់ៗឈានទៅរកការអភិវឌ្ឍវិស័យផលិតកម្មកប្បាសជាលក្ខណៈខ្សែចង្វាក់ផលិតកម្ម។
ថ្នាក់ដឹកនាំក្រុមហ៊ុន Jiangsu Lianfa បានឲ្យដឹងថា បើការដាំសាកល្បងលើកទី ១ ទទួលបានទិន្នផលដូចដែលក្រុមហ៊ុនចង់បាន ក្រុមហ៊ុននឹងដាំសាកល្បងលើកទី ២ លើផ្ទៃដីចំនួន ១៨០ ហិកតាបន្ថែមទៀត។
ផែនការរបស់ក្រុមហ៊ុន Jiangsu Lianfa នឹងធ្វើការកែច្នៃផលិតផលកប្បាសនេះជាអំបោះសម្រាប់ផ្គត់ផ្គង់ឲ្យរោងចក្រវាយនភណ្ឌធ្វើជាក្រណាត់រួចផ្គត់ផ្គង់ឲ្យរោងចក្រកាត់ដេរសម្លៀកបំពាក់របស់ខ្លួន ដែលមានចំនួន ១២ នៅទូទាំងពិភពលោក ដោយក្នុងនោះមាន ២ ដែលកំពុងដំណើរការនៅកម្ពុជាគឺរោងចក្រ Jincheng Garment Factory និង Hengyu Garment Factory ស្ថិតក្នុងខេត្តពោធិ៍សាត់។
ក្រុមហ៊ុន Jiangsu Lianfa កាលពីខែវិច្ឆិកា ឆ្នាំ ២០១៨ បានចុះអនុស្សរណៈយោគយល់គ្នាជាមួយក្រសួងកសិកម្ម រុក្ខាប្រមាញ់ និងនេសាទ ដើម្បីអភិវឌ្ឍវិស័យផលិតកម្ម និងកែច្នៃកប្បាសនៅកម្ពុជា៕