The Phnom Penh Post Search

Search form

Logo of Phnom Penh Post newspaper Phnom Penh Post - ក្រុមហ៊ុន KPMG ទិញ​យក​ក្រុមហ៊ុន​សវនកម្ម Premier Consulting

ក្រុមហ៊ុន KPMG ទិញ​យក​ក្រុមហ៊ុន​សវនកម្ម Premier Consulting

ក្រុមហ៊ុន KPMG ទិញ​យក​ក្រុមហ៊ុន​សវនកម្ម Premier Consulting

ភ្នំពេញៈ ក្រុមហ៊ុន KPMG Cambodia Limited ដែល​ជា​ក្រុមហ៊ុន​សវនកម្ម ពន្ធ និង​ប្រឹក្សា​យោបល់​ឈាន​មុខ​គេ​មួយ​នៅ​កម្ពុជា​បាន​ទិញ​យក​ក្រុមហ៊ុន​សវនកម្ម Premier Consulting (Cambodia) Limited ក្នុង​គោលបំណង​ពង្រីក​ពាណិជ្ជកម្ម​នៅក្នុង​ប្រទេស​កម្ពុជា​។

យោងតាម​សេចក្ដី​ប្រកាស​ព័ត៌មាន​បាន​ពី KPMG ដែល ​ភ្នំពេញ ​ប៉ុស្ដិ៍​ ទទួល​បាន​កាលពី​ថ្ងៃ​អង្គារ លោក Warrick Cleine ប្រធាន KPMG ប្រចាំ​នៅ​ប្រទេស​វៀតណាម និង​កម្ពុជា​បាន​ថ្លែង​ថា ជាមួយ​នឹង​ទំនុកចិត្ត​របស់ KPMG នៅក្នុង​បរិយាកាស​ពាណិជ្ជកម្ម​របស់​ខ្លួន​នៅ​កម្ពុជា ពិសេស​ដោយសារ​សហគមន៍​សេដ្ឋកិច្ច​អាស៊ាន​ (AEC)​ ឆ្នាំ​ ២០១៥ បាន​ជំរុញ​ឲ្យ​ក្រុមហ៊ុន​លោក​សម្រេច​ការ​ទិញ​យក​ក្រុមហ៊ុន Premier Consulting​។

លោក​ថ្លែង​ថា៖ «KPMG ធ្វើ​ការងារ​ជាមួយ​ក្រុមហ៊ុន​ឈាន​មុខ​គេ​ជាច្រើន​នៅ​តំបន់​អាស៊ីអាគ្នេយ៍​តាមរយៈ​ការិយាល័យ​របស់​យើង​នៅក្នុង​ទីក្រុង​ធំៗ​នៅក្នុង​តំបន់​អាស៊ាន។​ ការ​ធ្វើ​សមាហរណកម្ម​របស់​ក្រុមហ៊ុន Premier Consulting នៅ​ទីក្រុង​ភ្នំពេញ លើក​កម្ពស់​សមត្ថភាព​របស់​យើង​ដើម្បី​បម្រើ​អតិថិជន​នៅក្នុង​សេដ្ឋកិច្ច​មួយ​ដែល​មាន​ថាមពល​ខ្លាំង​បំផុត​របស់​អាស៊ីអាគ្នេយ៍​»​។

លោក​បន្ត​ថា៖ «កិច្ចព្រមព្រៀង​នេះ​គឺជា​ការ​បង្ហាញ​ឥទ្ធិពល​នៃ​ការ​ពង្រីក​ភាព​ខ្លាំង និង​ការ​ប្ដេជ្ញា​ចិត្ត​របស់ KPMG ក្នុង​ការ​បម្រើ​អតិថិជន​របស់​យើង នៅ​ប្រទេស​វៀតណាម​និង​កម្ពុជា​។ ការ​បន្ថែម​ក្រុម​ការងារ​របស់​ក្រុមហ៊ុន Premier ដើម្បី​លើក​កម្ពស់​ក្នុង​ការ​ផ្ដល់​សេវា​ដ៏សំខាន់​របស់ KPMG យើង​នឹង​អាច​ផ្ដល់​ដល់​អតិថិជន​របស់​យើង​គ្រប់​ទំហំ និង​គ្រប់​ដំណាក់កាល​នៃ​វដ្ដពាណិជ្ជកម្ម​»​។

យោងតាម​សេចក្ដី​ប្រកាសព័ត៌​មាន ប្រតិបត្តិការ​នេះ​បាន​ចូល​ជា​ធរមាន​ចាប់ពី​ថ្ងៃ​ទី ​១ ខែ​មករា ឆ្នាំ​២០១៥ ប៉ុន្តែ ​លក្ខខណ្ឌ​ដែល​ជាប់​ទាក់ទង​ទៅ​នឹង​បញ្ហា​ហិរញ្ញវត្ថុ​នៃ​កិច្ចព្រមព្រៀង​នេះ​គឺ​មិន​ត្រូវ​បាន​បង្ហាញ​ឲ្យ​ដឹង​នោះ​ទេ ហើយ​ពាណិជ្ជកម្ម​រួម​បញ្ចូល​គ្នា​នេះ​នឹង​ផ្ដល់​ការងារ​អាជីព​ជិត​២០០​នាក់​ដែល​ផ្ដល់​សេវា​ដល់​ក្រុមហ៊ុន អង្គការ​មិនមែន​រដ្ឋាភិបាល និង​វិស័យ​នានា​របស់​រដ្ឋាភិបាល​ប្រទេស​កម្ពុជា​។

ក្រុមហ៊ុន KPMG នៅក្នុង​ប្រទេស​កម្ពុជា​នឹង​បន្ត​ដឹកនាំ​ដោយ​លោក Michael Gordon ជា​ដៃគូ​ជាន់ខ្ពស់ រួម​ជាមួយ​នឹង​លោក Nge Huy លោក Lim Chew Teng​។

លោក James Roberts មកពី​ក្រុមហ៊ុន Premier នឹង​ចូលរួម​ជាមួយ KPMG ជា​ដៃគូ​មួយ​ផង​ដែរ ហើយ​លោក Dary So នឹង​ចូលរួម​ធ្វើ​ជា​នាយក​ដឹកនាំ​ក្រុមហ៊ុន​ផ្ដល់​សេវា​ពាណិជ្ជកម្ម​ដែល​ទើប​នឹង​បាន​បង្កើត​ឡើង​របស់​ក្រុមហ៊ុន​នេះ​។

លោក Roberts ថ្លែង​ថា៖ «​យើង​រីករាយ​ក្នុង​ការ​ចូលរួម​ជាមួយ​កិច្ចខិតខំប្រឹងប្រែង​របស់ KPMG ដល់​កំណើន​សមត្ថភាព​ជា​បន្តបន្ទាប់ និង​ធនធាន​នៅក្នុង​ទីផ្សារ​ក្នុង​ស្រុក​»។

KPMG ត្រូវ​បាន​បង្កើតឡើង​នៅ​កម្ពុជា​កាលពី​ឆ្នាំ​១៩៩៤​។ បច្ចុប្បន្ន​ក្រុមហ៊ុន​មាន​ក្រុម​ការងារ​ជាង​ ១៣០​ នាក់ ហើយ KPMG ជា​ក្រុមហ៊ុន​ផ្ដល់​សេវា​មួយ​ក្នុង​ចំណោម​ក្រុមហ៊ុន​ផ្ដល់​សេវា​ឈាន​មុខ​គេ​នៅ​កម្ពុជា​ដោយ​មាន​ទាំង​អតិថិជន​ក្នុង​ស្រុក និង​អតិថិជន​អន្តរជាតិ​ផង​ដែរ​។

ក្រុមហ៊ុន Premier ដែល​ត្រូវ​បាន​បង្កើតឡើង​កាលពី​ឆ្នាំ​២០០៦ ហើយ​ពឹងផ្អែក​លើ​មូលដ្ឋាន​សេវា​ការងារ​អាជីព​មាន​គុណភាព បាន​កើនឡើង​យ៉ាងរហ័ស​ក្នុង​ការ​ក្លាយ​ជា​ក្រុមហ៊ុន​ប្រឹក្សា​យោបល់​គណនី និង​ពាណិជ្ជកម្ម​ឈាន​មុខ​គេ​របស់​កម្ពុជា​នៅ​ពី​ក្រោយ​ក្រុមហ៊ុន​ប្រឹក្សា​ធំៗ​ចំនួន​៤​៕PB

អត្ថបទគួរចាប់អារម្មណ៍