The Phnom Penh Post Search

Search form




Logo of Phnom Penh Post newspaper Phnom Penh Post - ក្រុមហ៊ុន​ Lipp កំពុង​ស្វែងរក​ការវិនិយោគ​លើ​ការកែច្នៃ​ឫស្សី​នៅ​កម្ពុជា




ក្រុមហ៊ុន​ Lipp កំពុង​ស្វែងរក​ការវិនិយោគ​លើ​ការកែច្នៃ​ឫស្សី​នៅ​កម្ពុជា

Content image - Phnom Penh Post
ក្រុមហ៊ុន​មកពី​ម៉ាឡេស៊ី Lipp Engineering Sdn. Bhd. កំពុង​ស្វែងរក​ឱកាស​វិនិយោគ​ក្នុង​ការបង្កើត​រោងចក្រ​កែច្នៃ​ផលិតផល​ពី​ឫស្សី​នៅ​កម្ពុជា ដែល​គ្រោង​នឹង​បោះទុន​វិនិយោគ​ប្រមាណ ៧៥០ លាន​ដុល្លារ​។ សហការី

ក្រុមហ៊ុន​ Lipp កំពុង​ស្វែងរក​ការវិនិយោគ​លើ​ការកែច្នៃ​ឫស្សី​នៅ​កម្ពុជា

ភ្នំពេញ: ក្រុមហ៊ុន​មកពី​ម៉ាឡេស៊ី Lipp Engineering Sdn. Bhd. កំពុង​ស្វែងរក​ឱកាស​វិនិយោគ​ក្នុង​ការបង្កើត​រោងចក្រ​កែច្នៃ​ផលិតផល​ពី​ឫស្សី​នៅ​កម្ពុជា ដែល​គ្រោង​នឹង​បោះទុន​វិនិយោគ​ប្រមាណ ៧៥០ លាន​ដុល្លារ​។

ក្រុមហ៊ុន​កំពុង​ស្នើសុំ​ដីសម្បទាន​ពី​រដ្ឋាភិបាល​ក្នុង​ការដាំដុះ​ឫស្សី​នេះ​។ នេះ​បើតាម​អគ្គនាយក​ក្រុមហ៊ុន​។

លោក Datuk Thureign ប្រធាន និង​អគ្គនាយក​ក្រុមហ៊ុន Lipp Engineering Sdn. Bhd. បាន​ថ្លែង​ក្នុង​សន្និសីទ​សារព័ត៌មាន​កាលពី​ថ្ងៃ​ព្រហស្បតិ៍​ថា បន្ទាប់ពី​ទទួល​បាន​ភ្លើង​ខៀវ​ពី​ក្រសួង​កសិកម្ម រុក្ខាប្រមាញ់ និង​នេសាទ​ថា ក្រុមហ៊ុន​នឹង​បង្កើត​រោងចក្រ​កែច្នៃ​ផលិតផល​ពី​ឫស្សី​ដែល​ជា​បច្ចេកវិទ្យា​របស់​អាលឺ្លម៉ង់ ដើម្បី​នាំចេញ​ទៅ​ទីផ្សារ​អន្តរជាតិ​។

លោក​បន្តថា ក្រុមហ៊ុន​លោក​នឹង​បង្កើត​រោងចក្រ និង​ដាំ​ឫស្សី​នៅលើ​​ផ្ទៃដី ២៥ ០០០ ​ហិកតា​ ក្នុង​ដំណាក់កាល​ដំបូង​ដោយ​គ្រោង​នឹង​ចំណាយ​ទុនវិនិយោគ ៧៥០ ​លាន​ដុល្លារ​។ លោក​បន្ថែម​ថា ផលិតផល​កែច្នៃ​ពី​ឫស្សី​ចំនួន​ ៤ រួមមាន Bio-Activated Carbon, BambooPulp Bio-oil និង Bamboo Fiber​។

លោក​បាន​បន្តថា​៖ «​យើង​នឹង​បង្កើត​រោងចក្រ​កែច្នៃ​ផលិតផល​ពី​ឫស្សី​សម្រាប់​នាំចេញ​ទៅ​ទីផ្សារ​អន្តរជាតិ​ដែល​យើង​មាន​ទីផ្សារ​រួច​ស្រាប់​ហើយ​នៅក្រៅ​ប្រទេស​។ ការវិនិយោគ​នេះ​អាច​ចាប់ផ្តើម​នៅក្នុង​ឆ្នាំ​ ២០២០»​។

លោក​បន្ថែម​ថា គម្រោង​វិនិយោគ​នេះ​នឹង​ផ្តល់​ការងារ​ប្រមាណ​ ៥ ​ម៉ឺន​កន្លែង​ដល់​ប្រជាពលរដ្ឋ​កម្ពុជា និង​ចូលរួម​ចំណែក​អភិវឌ្ឍ​ប្រទេស​កម្ពុជា​។

លោក​បញ្ជាក់ថា​៖ «​ក្រៅពី​បង្កើត​រោងចក្រ និង​ដាំដុះ​ដើម​ឫស្សី ក្រុមហ៊ុន​នឹង​សាងសង់​មន្ទីរពេទ្យ សាលារៀន ផ្ទះ​ស្នាក់នៅ​សម្រាប់​កម្មករ និង​ការចំណាយ​លើទឹក​ភ្លើង​របស់​កម្មករ​ជា​បន្ទុក​របស់​ក្រុមហ៊ុន ហើយ​កម្មករ​ក៏​នឹង​ទទួល​បាន​ការធានារ៉ាប់រង​អាយុជីវិត​ផងដែរ​»​។

លោក វេង សាខុន រដ្ឋមន្ត្រី​ក្រសួង​កសិកម្ម រុក្ខាប្រមាញ់ និង​នេសាទ​បាន​ស្វាគមន៍​ពី​គម្រោង​វិនិយោគ​ដាំ​ឫស្សី​របស់​ក្រុមហ៊ុន​នេះ​។ ការគាំទ្រ​គម្រោង​វិនិយោគ​នេះ​ធ្វើ​ឡើង​នៅ​ជំនួប​ជាមួយ​ក្រុមហ៊ុន​នេះ​កាលពី​ថ្ងៃ​ពុធ​នៅ​ក្រសួងកសិកម្ម​។

លោក​ថ្លែងថា​៖ «​ខ្ញុំ​សង្ឃឹម​ថា គម្រោង​នេះ​នឹង​ចូលរួម​ចំណែក​អភិវឌ្ឍ​សេដ្ឋកិច្ច​កម្ពុជា​តាមរយៈ​បង្កើន​ប្រាក់​ចំណូល​ដល់​ប្រជាពលរដ្ឋ​»​។​ លោក​ សាខុន បន្ថែម​ថា​កម្ពុជា​មាន​ធនធាន​គ្រប់គ្រាន់ និង​អាកាសធាតុ​អំណោយផល​ដល់​ដំណាំ​ឧស្សាហកម្ម​ឫស្សី​។

លោក​បន្តថា​៖ «​គម្រោង​នេះ​នឹង​ជួយ​ទាក់ទាញ​ដល់​ផលិតកម្ម​ឫស្សី និង​ចូលរួម​អភិវឌ្ឍ​សហគមន៍​តាមរយៈ​ការលើក​កម្ពស់​ផលិតផល​ពី​ឫស្សី បង្កើត​ការងារ បណ្តុះបណ្តាល​ធនធានមនុស្ស​»​។ លោក​បាន​បញ្ជាក់ថា​៖ «​ក្រសួង​នឹង​ផ្តល់​កិច្ចសហការ​ជាមួយ​ក្រុមហ៊ុន​ធ្វើ​យ៉ាងណា​ឲ្យ​ក្រុមហ៊ុន​ទទួល​បាន​ជោគជ័យ​លើ​គម្រោង​នេះ​»​។

បើតាម​លោក Thureign ដំណាំ​ឫស្សី​នឹង​ទទួល​បាន​ផល​ក្នុង​រយៈពេល​ ៤ ​ឆ្នាំ ក្រោយពី​ដាំ​ដុះ​ដែល​ក្រុមហ៊ុន​នេះ​រំពឹង​ថា​នឹង​ទទួលបាន​ចំណូល​ប្រមាណ​ ៥ ​ពាន់​លាន​ដុល្លារ​ក្នុង​រយៈពេល​ ៥ ​ឆ្នាំ​ដំបូង​។

លោក​និយាយថា ក្រៅពី​ស្វែងរក​ការវិនិយោគ​លើ​ដំណាំ​ឫស្សី ក្រុមហ៊ុន​ក៏​កំពុង​ស្វែងរក​ការវិនិយោគ​លើ​ការចិញ្ចឹម​ពពែ​នៅ​កម្ពុជា សម្រាប់​នាំចេញ​ទៅ​ក្រៅប្រទេស​ផង​ដែរ​។

លោក​បន្តថា​៖ «​ការជ្រើសរើស​កម្ពុជា​ជា​គោលដៅ​វិនិយោគ​ព្រោះ​ជា​ប្រទេស​កំពុងអភិវឌ្ឍន៍ ហើយ​មាន​ដី​ទំនេរ​ច្រើន អាកាសធាតុ​អំណោយផល​ដល់​ការដាំ​ឫស្សី​»​។

ប្រទេស​​ កម្ពុជា​ បាន​អនុម័ត​សេចក្តី​ព្រាងច្បាប់​ស្តីពី​ការយល់ព្រម​លើ​កិច្ចព្រមព្រៀង​បង្កើត​អង្គការ​បណ្តាញ​អន្តរជាតិ​សម្រាប់​ឫស្សី និង​ផ្តៅ​ដែល​គេ​រំពឹងថា​កម្ពុជា​នឹង​ក្លាយជា​សមាជិក​នៃ​បណ្តាញ​នេះ​។

បណ្តាញ​អន្តរជាតិ​សម្រាប់​ឫស្សី និង​ផ្តៅ​ជា​អង្គការ​អន្តររដ្ឋាភិបាល​មួយ​ដែល​បាន​បង្កើតឡើង​ក្នុង​ឆ្នាំ​ ១៩៩៧ ដែល​មាន​ទីស្នាក់ការ​កណ្តាល​នៅ​ប្រទេស​ចិន និង​មាន​ការិយាល័យ​ថ្នាក់​តំបន់​ចំនួន ៤ ​រួមមាន​ប្រទេស​ឥណ្ឌា ហ្គាណា អេត្យូពី និង​អេក្វាទ័រ​។

គិត​ត្រឹម​ខែ​កញ្ញា ឆ្នាំ​ ២០១៨ អង្គការ​នេះ​មាន​ប្រទេស​ជា​សមាជិក​ចំនួន ៤៣​។ បច្ចុប្បន្ន​ប្រទេស​តំបន់​អាស៊ាន​ដែល​មិនទាន់​បាន​ចូល​ជា​សមាជិក​នៃ​អង្គការ​នេះ រួមមាន​កម្ពុជា ប្រ៊ុយណេ សិង្ហបុរី និង​ឡាវ​៕LA

អត្ថបទគួរចាប់អារម្មណ៍