ក្រុមហ៊ុន MERIDIAN INTERNATIONAL HOLDING និងក្រុមហ៊ុនបដិសណ្ឋារកិច្ច THALIAS បានបើកទំព័រថ្មីក្នុងឆ្នាំ ២០២១ ដោយប្រកាសយុទ្ធសាស្ត្រដៃគូសហការជាមួយគ្នាជាផ្លូវការ។ ផ្លែផ្កានៃកិច្ចសហការនេះគឺជាបទពិសោធនៃការទទួលទានអាហារប្រណីតដែលនឹងមានវត្តមាននៅក្នុងអគារ Flatiron by Meridian ។
Flatiron by Meridian នឹងក្លាយទៅជាទីតាំងដ៏ល្អក្នុងការផ្តល់ជូនជម្រើសម្ហូបអាហារយ៉ាងសម្បូរបែបដែលនឹងត្រូវផ្តល់ជូនដោយផ្ទាល់ពីក្រុមហ៊ុនបដិសណ្ឋារកិច្ច THALIAS ដែលនឹងនាំមកនូវបទពិសោធបរិភោគអាហារថ្មីសម្រាប់អតិថិជននៅក្នុងអគារនេះ។ យើងសន្យាថា អាហារ និងភេសជ្ជៈផ្តល់ជូននៅក្នុងអគារ Flatiron by Meridian ដោយក្រុមហ៊ុន THALIAS នឹងផ្តល់ជូនអតិថិជននូវជម្រើសម្ហូបអាហារជាច្រើន និងសេវាកម្មល្អបំផុតមិនធ្លាប់មាន។
យីហោល្បីៗជាច្រើននៅក្រោមក្រុមហ៊ុនមេនេះនឹងត្រូវបានផ្តល់ជូននៅអគារ Flatiron by Meridian ដូចជាភោជនីយដ្ឋាន Khéma ក៏ ដូច ជា Khéma Go ដែលនឹងផ្តល់ជូននូវនំដុតបែបអឺរ៉ុបចម្រុះមុខ និងភេសជ្ជៈជាច្រើនមុខទៀត។
ក្រុមហ៊ុននេះក៏បានបង្កើតគំនិតភោជនីយដ្ឋានថ្មីមួយទៀតផងដែរគឺ Siena Restaurant Wine & Bar ដែលត្រូវបានរៀបចំឡើងនៅក្នុងគម្រោងអភិវឌ្ឍន៍សំខាន់មួយនេះដែលមានទីតាំងស្ថិតនៅក្នុងមជ្ឈមណ្ឌលទីក្រុងភ្នំពេញ។ ការប្រមូលផ្តុំជម្រើសអាហារថ្មីៗជាច្រើននេះប្រាកដជានឹងក្លាយទៅជាជម្រើសលំដាប់កំពូលសម្រាប់អ្នកទទួលទានអាហារពេលល្ងាចដែលកំពុងស្វែងរកអាហារដែលមានគុណភាពខ្ពស់នៅក្នុងបរិយាកាសសង្គមបែបលំហែកាយ។
ការផ្តល់ជូនរបស់ក្រុមហ៊ុនបដិសណ្ឋារកិច្ច Thalias មិនកំណត់ត្រឹមតែចំពោះអ្នកមកទទួលទាននៅទីតាំងរបស់ខ្លួននៅ Flatiron by Meridian តែប៉ុណ្ណោះទេ។ ភ្ញៀវដែលស្នាក់នៅអាផាតមិនដែលគ្រប់គ្រងដោយក្រុមហ៊ុន Citadines ក៏នឹងរីករាយក្នុងការទទួលបានសេវាកម្មដែលផ្តល់ដោយក្រុមហ៊ុន Thalias នេះក្នុងទម្រង់ជាអាហារពេលព្រឹក និងជម្រើសទទួលទានអាហារក្នុងបន្ទប់ផងដែរ។
នាយកប្រត្តិបត្តិនៃក្រុមហ៊ុន Meridian លោក Murray KO មានប្រសាសន៍ថា៖ “ការដែលមានក្រុមហ៊ុន F&B ដ៏ល្បីល្បាញដូចជាក្រុមហ៊ុន Thalias ជាដៃគូសហការជាមួយយើងគឺជាការបញ្ជាក់បន្ថែមទៀតទៅលើកេរ្តិ៍ឈ្មោះដ៏ល្អរបស់ Flatiron by Meridian ដែលមានកន្លងមក។ ជាពិសេសនៅក្នុងបរិយាកាសសព្វថ្ងៃនេះយើងឃើញថាវាបានផ្តល់ភាពស្រស់ស្រាយបែបថ្មីមួយដល់ក្រុមហ៊ុនទាំង ២ ក្នុងការពិចារណាពីវិធីដើម្បីលើកកម្ពស់ និងគាំទ្រគ្នាទៅវិញទៅមកតាមរយៈការប្រើប្រាស់កម្លាំងច្របាច់បញ្ចូលគ្នាជំនាញ និងធនធានរបស់យើងដើម្បីចែកចាយ និងបង្កើនបទពិសោធជូនដល់ភ្ញៀវក្នុងជម្រើសបរិភោគអាហារដែលផ្តល់ជូនដោយក្រុមហ៊ុន Thalias នៅក្នុងអគារ Flatiron by Meridian។
យើងមានសេចក្តីសោមនស្សរីករាយក្នុងការឈានទៅរកព្រឹត្តិការណ៍ថ្មីរួមគ្នាដោយចែករំលែកផែនការយុទ្ធសាស្ត្រដូចគ្នាដែលបានធ្វើឱ្យកិច្ចសហប្រតិបត្តិការរបស់យើងកាន់តែស៊ីជម្រៅនាពេលបច្ចុប្បន្ន និងនាពេលអនាគត។ វាពិតជាជួយដល់យើងក្នុងការធ្វើឱ្យអាជីវកម្មរបស់យើងកាន់តែប្រសើរក៏ដូចជាផ្តល់នូវសេវាកម្មថ្មីៗរួមគ្នាតាមរយៈការពង្រឹងគុណភាពប្រកួតប្រជែងរបស់ក្រុមហ៊ុន Meridian International Holding នៅក្នុងប្រទេសកម្ពុជា និងអនុញ្ញាតឱ្យយើងចូលរួមចំណែកក្នុងការបន្តកំណើនសេដ្ឋកិច្ចនៅក្នុងព្រះរាជាណាចក្រកម្ពុជា។
លោក Arnaud DARC នាយកប្រតិបត្តិនៃក្រុមហ៊ុនបដិសណ្ឋារកិច្ច Thalias មានប្រសាសន៍ថា៖ “លោក Murray និងខ្ញុំសម្រេចចិត្តចាប់ដៃគូជាមួយគ្នាតាមរយៈគម្រោង Flatiron by Meridian គឺស្តែងឡើងស្ទើរតែចាប់តាំងពីថ្ងៃដំបូងដែលយើងបានជួបគ្នា។ យើងជឿជាក់ថា កិច្ចសហការរបស់យើងនឹងផ្តល់នូវភាពរីករាយចំពោះអ្នកធ្វើដំណើរ និងភ្ញៀវដែលចង់ទទួលបានការបរិភោគល្អបំផុតជាមួយនឹងការធ្វើបដិសណ្ឋារកិច្ចដែលមានភាពខុសប្លែកពីអ្នកដទៃ។ ជាទូទៅខ្ញុំជឿជាក់ថា ភាពជាដៃគូថ្មីនេះនឹងរីកដុះដាលឡើងជាមួយនឹងឱកាសថ្មីសម្រាប់ក្រុមហ៊ុនរបស់យើងទាំង ២”។
ក្រុមហ៊ុនបដិសណ្ឋារកិច្ច Thalias បានបង្កើតឡើងតាំងពីឆ្នាំ ១៩៩៧ ដោយបានបង្កើតនូវភោជនីយដ្ឋានដ៏ល្បីឈ្មោះ និងហាងនំល្បីៗមួយចំនួននៅរាជធានីភ្នំពេញដែលបម្រើម្ហូបអាហារដ៏ប្រណីត និងបដិសណ្ឋារកិច្ចល្អឥតខ្ចោះ ត្រូវបានបង្កើតឡើងដោយនាយកប្រតិបត្តិលោក Arnaud DARC កាលពី ២៤ ឆ្នាំមុនដែលដំបូងបង្អស់បានបើកភោជនីយដ្ឋាន Topaz ហើយឥឡូវនេះក្រុមហ៊ុនបានពង្រីកការផ្តោតអារម្មណ៍របស់ខ្លួនលើសពីម្ហូបអាហារ។
បន្ថែមពីលើការបង្កើតភោជនីយដ្ឋាន Malis និង Khéma ក្រុមហ៊ុនបដិសណ្ឋារកិច្ច Thalias ផ្តល់ជូននូវការពិគ្រោះយោបល់ផ្នែកប្រតិបត្ដិការ និងបើកអាជីវកម្មផ្នែកអាហារ និងផ្តល់សេវាកម្មលើព្រឹត្តិការណ៍ផ្សេងៗ។ ក្រុមហ៊ុន Thalias ក៏ទទួលបានពានរង្វាន់ជាច្រើនក្នុងរយៈពេលជាច្រើនឆ្នាំមកនេះ រួមមានពានរង្វាន់ “ភោជនីយដ្ឋានល្អដាច់គេប្រចាំឆ្នាំនៅកម្ពុជា ”ផ្តល់ដោយពិព័រណ៍ទេសចរណ៍អន្តរជាតិពានរង្វាន់ “ការប្រកួតរៀបចំតុអាហារ” ផ្តល់ដោយសមាគមភោជនីយដ្ឋានកម្ពុជា និងពានរង្វាន់ “បដិសណ្ឋារកិច្ចល្អបំផុត” ផ្តល់ដោយក្រសួងទេសចរណ៍កម្ពុជា។
ក្រុមហ៊ុន Meridian International Holding បានប្រកាសវត្តមានរបស់ខ្លួននៅកម្ពុជាតាមរយៈមធ្យោបាយដ៏ធំមួយ គឺការបណ្តាក់ទុនរបស់ខ្លួននៅក្នុងវិស័យឧស្សាហកម្មវាយនភណ្ឌ និងកាត់ដេរមុនពេលធ្វើពិពិធកម្មទៅក្នុងការអភិវឌ្ឍនិងការវិនិយោគអចលនទ្រព្យ។ Casa by Meridian និង Skylar by Meridian គឺជាគម្រោងដំបូងបង្អស់របស់ក្រុមហ៊ុនក្នុងការអភិវឌ្ឍក្នុងវិស័យអចលនទ្រព្យ និងលំនៅឋានលំដាប់ពិភពលោកនៅកម្ពុជា។ គម្រោង Flatiron by Meridian អគារកម្ពស់ ៤១ ជាន់នឹងធ្វើឱ្យក្រុមហ៊ុនឈានជើងដល់កម្រិតថ្មីមួយទៀតនៅក្នុងការខិតខំអភិវឌ្ឍវិស័យអចលនទ្រព្យនៅកម្ពុជា៕