.jpg)
ក្រុមហ៊ុន Reitman ដែលជាក្រុមហ៊ុនលក់រាយសម្លៀកបំពាក់របស់ប្រទេស កាណាដា គ្រោងនឹងបង្កើនការបញ្ជាទិញសម្លៀកបំពាក់ពីកម្ពុជាសម្រាប់ឆ្នាំ ២០១៩-២០២០ ឲ្យបានរហូតដល់ចំនួនជាង ៩១ លានដុល្លារ។ ក្រសួងពាណិជ្ជកម្ម
ភ្នំពេញៈ ក្រុមហ៊ុន Reitman ដែលជាក្រុមហ៊ុនលក់រាយសម្លៀកបំពាក់របស់ប្រទេស កាណាដា គ្រោងនឹងបង្កើនការបញ្ជាទិញសម្លៀកបំពាក់ពីកម្ពុជាសម្រាប់ឆ្នាំ ២០១៩-២០២០ ឲ្យបានរហូតដល់ចំនួនជាង ៩១ លានដុល្លារ។ នេះបើយោងតាមក្រសួងពាណិជ្ជកម្មកម្ពុជា។
គម្រោងបង្កើនការបញ្ជាទិញនេះត្រូវបានលើកឡើងដោយតំណាងក្រុមហ៊ុន Reitman ដែលជាដៃគូពាណិជ្ជកម្មដ៏សំខាន់មួយរបស់វិស័យកាត់ដេរនៅកម្ពុជាក្នុងជំនួបពិភាក្សាជាមួយលោក ឱក ប៊ុង រដ្ឋលេខាធិការក្រសួងពាណិជ្ជកម្ម កាលពីសប្តាហ៍មុន។
លោក Gary Ross ប្រធានក្រុមហ៊ុន Reitman បានបង្ហាញសុទិដ្ឋិនិយម ចំពោះវឌ្ឍនភាពនៃឧស្សាហកម្មកាត់ដេរនៅកម្ពុជា និងវិធានការថ្មីៗរបស់រដ្ឋាភិបាល ដើម្បីពង្រឹងភាពប្រកួតប្រជែងរបស់កម្ពុជា តាមរយៈការធ្វើឲ្យប្រសើរទ្បើងនូវបរិយាកាសធុរកិច្ច និងវិនិយោគ។
Reitman គឺជាក្រុមហ៊ុនបញ្ជាទិញសម្លៀកបំពាក់ដ៏ធំរបស់កាណាដា ដែលបានធ្វើប្រតិបត្តិការពាណិជ្ជកម្មជាមួយឧស្សាហកម្មកាត់ដេរសម្លៀកបំពាក់កម្ពុជា ចាប់តាំងពីឆ្នាំ ២០០២-២០០៣។
កាលពីឆ្នាំ ២០១៦ ក្រុមហ៊ុនមួយនេះបានបញ្ជាទិញផលិតផលសម្លៀកបំពាក់ពីរោងចក្រចំនួន ១៤ នៅកម្ពុជាក្នុងតម្លៃទឹកប្រាក់ ៦៦ លានដុល្លារ។
លោក ឱក ប៊ុង រដ្ឋលេខាធិការក្រសួងពាណិជ្ជកម្ម បាននិយាយថា ទំនាក់ទំនងពាណិជ្ជកម្មទ្វេភាគីរវាងប្រទេស កម្ពុជា និងកាណាដា មានភាពល្អប្រសើរជាបន្តបន្ទាប់។
ជាមួយនឹងសហប្រតិបត្តិការសេដ្ឋកិច្ចល្អប្រសើរជាមួយបណ្តាប្រទេសនានាលើពិភពលោក ការនាំចេញទំនិញពីប្រទេស កម្ពុជា ទៅកាន់ទីផ្សារអន្តរជាតិ មានកំណើនយ៉ាងខ្ពស់ក្នុងរយៈពេល ២ ទសវត្សរ៍ចុងក្រោយនេះ ដោយកើនពី ១ ពាន់លានដុល្លារ កាលពីឆ្នាំ ២០០១ ដល់ ១៣ ពាន់លានដុល្លារ ក្នុងឆ្នាំ ២០១៨។
លោកបន្តថា ទន្ទឹមនឹងកំណើនខាងលើរដ្ឋាភិបាលកម្ពុជាក៏បានប្តេជ្ញាចូលរួមយ៉ាងសកម្មនៅក្នុងការបន្តគាំទ្រគម្រោងរោងចក្រកាន់តែប្រសើរឡើងនៅកម្ពុជា (BFC) របស់អង្គការការងារអន្តរជាតិ (ILO) ដើម្បីលើកស្ទួយលក្ខខណ្ឌការងារនៅក្នុងឧស្សាហកម្មវាយនភណ្ឌ និងកាត់ដេរសម្លៀកបំពាក់។
លោក វ៉ាន់ ស៊ូអៀង ប្រធានសមាគមរោងចក្រកាត់ដេរនៅកម្ពុជា កាលពីថ្ងៃម្សិលមិញបានប្រាប់ថា កាណាដា គឺជាទីផ្សារធំមួយក្នុងចំណោមទីផ្សារធំៗសម្រាប់វិស័យកាត់ដេរនៅកម្ពុជា ដែលមានដូចជា អឺរ៉ុប អាមេរិក និងជប៉ុន។
ការនាំសម្លៀកបំពាក់ពីកម្ពុជា ទៅប្រទេស កាណាដា សរុបមានតម្លៃប្រមាណ ៣០០-៤០០ លានដុល្លារក្នុង ១ ឆ្នាំ។
លោកថ្លែងថា៖«ប្រសិនបើផែនការនេះអាចសម្រេចទៅបាននោះ វានឹងចូលរួមចំណែកយ៉ាងច្រើនក្នុងវិស័យកាត់ដេរនៅកម្ពុជា»។
លោកប្រាប់ទៀតថា ការនាំសម្លៀកបំពាក់ទៅប្រទេស កាណាដា ក៏ទទួលបានការអនុគ្រោះដោយមិនមានបង់ពន្ធគយផងដែរ។
កាលពីឆ្នាំ ២០១៨ ការនាំចេញក្នុងវិស័យកាត់ដេរសម្លៀកបំពាក់ និងស្បែកជើងនៅកម្ពុជាមានតម្លៃប្រមាណ ១០ ពាន់លានដុល្លារ៕ LA
