ស៊េអូលៈ ក្រុមហ៊ុន Samsung Electronics បានឲ្យដឹងកាលពីថ្ងៃអង្គារថា ខ្លួនបានរំពឹងថា ប្រាក់ចំណេញប្រតិបត្តិការនឹងធ្លាក់ចុះជាង ៥០ ភាគរយ នៅត្រីមាសទី ៣ ដោយសារតែការធ្លាក់ចុះជាបន្តនៅលើទីផ្សារបន្ទះឈីបពិភពលោក។
ក្រុមហ៊ុនផលិតស្មាតហ្វូន និងបន្ទះឈីបអង្គចងចាំ (memory Chips) ឈានមុខគេរបស់ពិភពលោកមួយនេះបានឲ្យដឹងក្នុងសេចក្ដីប្រកាសព័ត៌មានមួយថា ប្រាក់ចំណេញប្រតិបត្តិការសម្រាប់ខែកក្កដាដល់ខែកញ្ញាត្រូវបានព្យាករថានឹងកើនឡើងដល់ ៧,៧ ពាន់ពាន់លានវ៉ុន (៦,៤ ពាន់លានដុល្លារ) ធ្លាក់ចុះ ៥៦,២ ភាគរយធៀបនឹងឆ្នាំមុន។
នេះវាបង្ហាញពីការធ្លាក់ចុះ ៤ ត្រីមាសជាប់គ្នារបស់ក្រុមហ៊ុនបច្ចេកវិទ្យារបស់ប្រទេសកូរ៉េខាងត្បូងមួយនេះដែលបានកត់ត្រាការធ្លាក់ចុះប្រាក់ចំណេញក្នុងគ្រាដែលការធ្លាក់ចុះតម្លៃឧបករណ៍ពាក់កណ្ដាលចម្លង និងតម្រូវការចុះខ្សោយសម្រាប់ឧបករណ៍ចល័តរបស់ខ្លួន។
ការលក់នៅត្រីមាសទី ៣ ត្រូវបានរំពឹងថានឹងកើនឡើងដល់ប្រហែល ៦២ ពាន់ពាន់លានវ៉ុនធ្លាក់ចុះ ៥,៣ ភាគរយធៀបនឹងរយៈពេលដូចគ្នាកាលពីឆ្នាំមុន។
ក្រុមហ៊ុន Samsung បដិសេធបង្ហាញប្រាក់ចំណេញសុទ្ធ និងប្រតិបត្តិការអាជីវកម្មតាមវិស័យរហូតដល់ខ្លួនចេញផ្សាយរបាយការណ៍ប្រាក់ចំណេញចុងក្រោយរបស់ខ្លួនដែលត្រូវរំពឹងថានឹងចេញផ្សាយនៅចុងខែនេះ។
តម្លៃភាគហ៊ុនរបស់ក្រុមហ៊ុន Samsung បានកើនឡើង ១ ភាគរយ នៅក្នុងការជួញដូរពេលព្រឹកកាលពីថ្ងៃអង្គារនៅផ្សារហ៊ុនសេអ៊ូល។
Samsung Electronics គឺជាក្រុមហ៊ុនបុត្រសម្ព័ន្ធដ៏សំខាន់របស់ក្រុមហ៊ុន Samsung Group ជាក្រុមហ៊ុនពហុផលិតផលគ្រប់គ្រងដោយគ្រួសារធំជាងគេ គ្របដណ្ដប់ពាណិជ្ជកម្មនៅក្នុងក្រុមហ៊ុនឈានមុខគេទី ១១ របស់ពិភពលោក និងសំខាន់ចំពោះស្ថានភាពសេដ្ឋកិច្ចរបស់ប្រទេសកូរ៉េខាងត្បូង។
ក្រុមអ្នកវិភាគបានបង្ហាញសុទិដ្ឋិនិយមក្នុងរយៈពេលជាច្រើនខែខាងមុខនេះ ដោយកត់សម្គាល់ថាការធ្លាក់ចុះកម្រិតស្ដុកសម្រាប់ឧបករណ៍ពាក់កណ្ដាលចម្លងដែលមានចំនួនជាងពាក់កណ្ដាលនៃប្រាក់ចំណេញរបស់ក្រុមហ៊ុននឹងជួយធ្វើឲ្យមានស្ថិរភាពដល់តម្លៃបន្ទះឈីប បន្ទាប់ពីការធ្លាក់ចុះ ២ ខ្ទង់នៅឆ្នាំនេះ។
គូប្រកួតប្រជែងនៅក្នុងវិបត្តិ
ការប៉ាន់ប្រមាណសម្រាប់ត្រីមាសទី ៣ នេះបានបង្ហាញការកើនឡើងបន្តិចពីខែមេសាដល់ខែមិថុនាដែលក្រុមអ្នកវិភាគបានសន្មតថា ភាគច្រើនដោយសារតែការកើនឡើងផ្នែកអាជីវកម្មទូរស័ព្ទចល័ត។
ក្រុមហ៊ុននេះបានចេញលក់ទូរស័ព្ទ Note 10 ដ៏សំខាន់របស់ខ្លួនដែលតភ្ជាប់បណ្ដាញ 5G ល្បឿនលឿនបំផុតកាលពីខែសីហា ដែលក្រុមអ្នកវិភាគឲ្យដឹងថាបានលក់ប្រសើរជាងម៉ូដែលទូរស័ព្ទលើកមុនរបស់ខ្លួនដើម្បីផ្ដល់ដល់ក្រុមហ៊ុន Samsung នូវការជំរុញដែលត្រូវការខ្លាំងបំផុត។
លោក Tom Kang នាយកស្រាវជ្រាវនៅក្រុមហ៊ុន Counterpoint Research បានថ្លែងថា៖ «ទូរស័ព្ទត្រកូល Note ជាធម្មតាត្រូវបានចេញលក់កាលពីខែសីហា ឬខែកញ្ញា និងលក់បានល្អប្រសើររហូតដល់ខែធ្នូ ដូច្នេះខ្ញុំរំពឹងថា តម្រូវការនឹងបន្តរហូតដល់ត្រីមាសទី ៤»។
ក្រុមហ៊ុន Samsung បានទាក់ទាញអ្នកប្រើប្រាស់មានប្រាក់ច្រើនជាមួយនឹងការចាប់ផ្ដើមលក់ទូរស័ព្ទស្មាតហ្វូនដែលអាចបត់បានលើកដំបូងរបស់ខ្លួនកាលពីខែមុន ប៉ុន្តែបន្ទាប់ពីមានបញ្ហាអេក្រង់បានបង្ខំឲ្យមានការពន្យារពេលគួរឲ្យអាម៉ាស់កាលពីខែមេសា។
ទីផ្សារស្មាតហ្វូនតម្លៃខ្ពស់បានបង្កើនការប្រកួតប្រជែងយ៉ាងខ្លាំង ហើយការលក់ជារួមបានធ្លាក់ចុះដោយសារតែកង្វះនវានុវត្តន៍ដ៏សំខាន់បានបណ្ដាលឲ្យប្រជាជនត្រូវរង់ចាំកាន់តែយូរ មុនពេលការធ្វើឲ្យប្រសើរឡើងចំពោះម៉ូដែលថ្មីៗ»។
ក្រុមហ៊ុនបច្ចេកវិទ្យាឈានមុខគេរបស់ប្រទេសកូរ៉េខាងត្បូងមួយនេះ នាំមុខទីផ្សារទូរស័ព្ទស្មាតហ្វូនពិភពលោកជាមួយនឹងចំណែក ២៣ ភាគរយ នៃវិស័យនេះដែលតាមពីក្រោយដោយក្រុមហ៊ុនប្រកួតប្រជែងរបស់ប្រទេសចិនដូចជាក្រុមហ៊ុន Huawei និងក្រុមហ៊ុន Oppo ខណៈក្រុមហ៊ុន Apple ស្ថិតក្នុងចំណាត់ថ្នាក់ទី ៤។ នេះបើយោងតាមក្រុមហ៊ុនតាមដានការលក់ IHS Markit ។
លោកស្រី Sujeong Lim អ្នកវិភាគនៅក្រុមហ៊ុនបានឲ្យដឹងថា ក្រុមហ៊ុន Samsung ក៏បានទាញយកផលប្រយោជន៍ពីការហាមឃាត់ពាណិជ្ជកម្មអាមេរិកប្រឆាំងនឹងក្រុមហ៊ុន Huawei «ដែលជំនួសដៃគូប្រកួតប្រជែងដែលកំពុងស្ថិតក្នុងវិបត្តិ» ជាមួយនឹងទូរស័ព្ទ Galaxy A កម្រិតតម្លៃមធ្យមដល់តម្លៃទាបរបស់ខ្លួន។
តម្រូវការកើនឡើងសម្រាប់បន្ទះអេក្រង់ OLED របស់ក្រុមហ៊ុន Samsung ដែលប្រើប្រាស់នៅលើទូរស័ព្ទដោយក្រុមហ៊ុនប្រកួតប្រជែងរួមទាំងទូរស័ព្ទ iPhone 11 ថ្មីរបស់ក្រុមហ៊ុន Apple ផងនោះត្រូវបានរំពឹងថានឹងជួយបង្កើនប្រាក់ចំណេញប្រចាំត្រីមាសរបស់ក្រុមហ៊ុននេះផងដែរ។
ក្រុមហ៊ុន Samsung បានជាប់នៅក្នុងសង្គ្រាមពាណិជ្ជកម្មរវាងប្រទេសជប៉ុន និងប្រទេសកូរ៉េខាងត្បូងដែលកើតចេញពីបញ្ហាជម្លោះអតីតកាលនៃសង្គ្រាមលោកលើកទី ២។
ជម្លោះនេះបាននាំឲ្យទីក្រុងតូក្យូដាក់ការរឹតបន្តឹងកាន់តែខ្លាំងលើការនាំចេញដ៏សំខាន់ចំពោះក្រុមហ៊ុនបច្ចេកវិទ្យាឈានមុខគេរបស់ប្រទេសកូរ៉េខាងត្បូងមួយនេះកាលពីខែកក្កដា ហើយលោក Lee Jaeyong អនុប្រធានក្រុមហ៊ុន Samsung ដែលបានហៅស្ថានការណ៍នេះថាជា «វិបត្តិ» មួយបានទស្សនកិច្ចទីក្រុងតូក្យូ ដើម្បីទទួលបានវត្ថុធាតុដើមទាំងនោះមកប្រើវិញ។
បន្ថែមលើការបារម្ភរបស់ក្រុមហ៊ុន Samsung ដដែលនេះលោក Lee នៅពេលថ្មីៗនេះកំពុងប្រឈមនឹងការកាត់ទោសជាថ្មីលើតួនាទីរបស់លោកនៅក្នុងរឿងអាស្រូវអំពើពុករលួយដ៏ធំមួយដែលបានធ្វើឲ្យលោកស្រី Park Geun-hye អតីតប្រធានាធិបតីបាត់បង់តំណែង៕ LA