ភ្នំពេញៈ សហគ្រាសធុនតូច និងមធ្យមដែលគ្រប់គ្រងដោយក្រុមហ៊ុនឯកជន ១ នឹងក្លាយជាក្រុមហ៊ុនលើកដំបូងត្រូវបានចុះបញ្ជីមូលបត្ររបស់ខ្លួននៅលើផ្សារកំណើននៃក្រុមហ៊ុនមូលបត្រកម្ពុជា (CSX) ចាប់តាំងពីទីផ្សារកំណើនមួយនេះត្រូវបានដាក់ឱ្យដំណើរការកាលពីឆ្នាំ ២០១៥ បន្ទាប់ពី CSX ទើបទទួលបានការអនុម័តជាគោលការណ៍សម្រាប់ការបោះផ្សាយកាលពីពេលថ្មីៗនេះ។
លោក Jon Weon Ha អនុប្រធាន CSX បានប្រាប់ភ្នំពេញ-ប៉ុស្ដិ៍កាលពីថ្ងៃទី ២២ ខែមីនាថា CSX ទើបយល់ព្រមជាគោលការណ៍ដល់ SME មួយលើលទ្ធភាព ចុះបញ្ជីរបស់ពួកគេ ខណៈដែល SME ជាច្រើនផ្សេងទៀតកំពុងរៀបចំផែនការចុះបញ្ជី។
លោកបញ្ជាក់៖ «បច្ចុប្បន្ន យើងទើបបានផ្ដល់ការយល់ព្រមជាគោលការណ៍លើការត្រួតពិនិត្យលទ្ធភាពចុះបញ្ជីដល់ SME មួយ ហើយនឹងប្រកាសតាមរយៈសេចក្ដីប្រកាសព័ត៌មានពេលឆាប់ៗនេះ»។ ទោះយ៉ាងណា លោកបានបដិសេធបង្ហាញឈ្មោះ និងក្រុមហ៊ុនប្រភេទអ្វី និងថា តើប្រាក់ចំនួនប៉ុន្មានដែលក្រុមហ៊ុនមួយនឹងប្រមូលបាន?
លោកលើកឡើងថា៖ «ខ្ញុំគិតថា វាឆាប់ពេកមិនអាចបង្ហាញថា នៅពេលណាពួកគេនឹងចុះបញ្ជី និងថាតើពួកគេបោះផ្សាយមូលបត្រកម្មសិទ្ធិលើកដំបូងជាសាធារណៈ (IPO) ដើម្បីប្រមូលមូលនិធិចំនួនប៉ុន្មាននោះទេ។ ខ្ញុំគិតថា ក្រុមហ៊ុន SME នេះនឹងបើកផ្លូវ ឬនឹងក្លាយជាក្រុមហ៊ុនគំរូដ៏ល្អមួយសម្រាប់ទាក់ទាញ SME ផ្សេងទៀតពិចារណាលើការប្រមូលមូលនិធិសម្រាប់ ការពង្រីកអាជីវកម្មរបស់ពួកគេតាមរយៈ IPO»។
លោក ស៊ូ សុជាតិ អគ្គនាយកនិយតករមូលបត្រកម្ពុជា (SECC) បានឱ្យដឹងថា ក្រុមហ៊ុននេះកំពុងរៀបចំដំណើរការដើម្បីអនុលោមតាមលក្ខខណ្ឌតម្រូវចុះបញ្ជី ប៉ុន្តែលោកបដិសេធធ្វើអត្ថាធិប្បាយបន្ថែមអំពីក្រុមហ៊ុនទាំង ២ នេះទេ។
CSX បានជម្នះក្នុងការទាក់ទាញបាន SME ឱ្យមកចុះបញ្ជីបោះផ្សាយលើផ្សារនេះចាប់តាំងពីការដាក់ឱ្យដំណើរការទីផ្សារកំណើនរបស់ខ្លួនកាលពីចុងឆ្នាំ ២០១៥។ យោងតាមបទប្បញ្ញត្តិ SECC ក្រុមហ៊ុននានាត្រូវតម្រូវឱ្យមានប្រាក់អប្បបរមា ចំនួន ៥០០ ០០០ ដុល្លារ ជាមូលធនប្រតិបត្តិការដើម្បីចុះបញ្ជីធៀបនឹង ៧,៥ លានដុល្លារនៅលើផ្សារគោល។
ក្រុមហ៊ុនដែលចុះបញ្ជីនៅផ្សារកំណើនមួយនេះក៏ត្រូវតម្រូវឱ្យចេញផ្សាយលទ្ធផលហិរញ្ញវត្ថុដែលបានធ្វើសវនកម្មរួចរយៈពេល ១ ឆ្នាំធៀបនឹងរយៈពេល ២ ឆ្នាំដែលតម្រូវសម្រាប់ក្រុមហ៊ុនធំៗដែលចុះបញ្ជីនៅលើទីផ្សារគោល។
លើសពីនេះ លទ្ធផលនេះត្រូវតែបង្ហាញប្រាក់ចំណេញវិជ្ជមាន ឬលំហូរសាច់ប្រាក់ប្រតិបត្តិការវិជ្ជមាន ជាមួយនឹងកម្រិតប្រាក់ចំណេញដុលយ៉ាងហោចណាស់ ១០ ភាគរយ។
យោងតាមលោក Mr. Ha ក្រុមហ៊ុន SME ទាំងនោះក៏នឹងទទួលបានការលើកទឹកចិត្តពន្ធមួយចំនួនរយៈពេល ៣ ឆ្នាំសម្រាប់ក្រុមហ៊ុនចុះបញ្ជីដូចជាការកាត់កងពន្ធលើប្រាក់ចំណូល ការផ្អាកការបង់ពន្ធមុនការទូទាត់ប្រចាំខែ និងការលើកលែងបំណុលពន្ធកន្លងមក។
លោកបានឱ្យដឹងថា បច្ចុប្បន្នមានក្រុមហ៊ុន SME មួយចំនួនមកពីវិស័យសំណង់ វិស្វកម្ម និងអចលនទ្រព្យ កំពុងស្ថិតក្នុងដំណើរការរៀបចំជាមួយក្រុម IPO ជាពិសេសការធ្វើការងារជាមួយក្រុមហ៊ុនគណនេយ្យលើការងារសវនកម្ម។
ទិន្នន័យ CSX បង្ហាញថា បច្ចុប្បន្នមានក្រុមហ៊ុនចំនួន ១៣ ចុះបញ្ជីនៅលើផ្សារហ៊ុន ១ នេះក្នុងនោះក្រុមហ៊ុន ៧ បានចុះបញ្ជីភាគហ៊ុន និងក្រុមហ៊ុន ៦ បានចុះបញ្ជីសញ្ញាបណ្ណសាជីវកម្ម។ ក្រុមហ៊ុនទាំង ១៣ នោះប្រមូលមូលនិធិរួមបាន ២៥៣ លានដុល្លារ និងសន្ទស្សន៍ភាគហ៊ុនបានកើនឡើងជាង ៥៧ ភាគរយកាលពីឆ្នាំ ២០១៩ ធៀបនឹងឆ្នាំ ២០១៨។
ក្នុងរយៈពេល ៩ ខែដំបូងនៃឆ្នាំ ២០២០ ក្រុមហ៊ុន ២ បានចុះបញ្ជីភាគហ៊ុន និងក្រុមហ៊ុន ៣ បានចុះបញ្ជីសញ្ញាបណ្ណ។ ក្រុមហ៊ុនទាំង ៥ ចុងក្រោយនេះ ប្រមូលមូលនិធិរួមបាន ៩២ លានដុល្លារ។ នេះបើយោងតាមទិន្នន័យរបស់ CSX៕LA