ក្រុងតូក្យូៈ ក្រុមហ៊ុនទូរគមនាគមន៍ SoftBank របស់ប្រទេស ជប៉ុន នឹងចុះបញ្ជីក្រុមហ៊ុនអាជីវកម្មទូរស័ព្ទចល័តរបស់ខ្លួននៅផ្សារហ៊ុនក្នុងខែក្រោយ ក្នុងការលក់ភាគហ៊ុនដែលអាចប្រមូលទឹកប្រាក់បានជាង ២១ ពាន់លានដុល្លារ និងក្លាយជាការបោះផ្សាយ IPO តម្លៃខ្ពស់បំផុតមួយ។
ក្រុមហ៊ុន SoftBank បានឲ្យដឹងថា ការបោះផ្សាយមូលបត្រលក់ជាសាធារណៈលើកដំបូង (IPO) នេះនឹងធ្វើឡើងនៅទីក្រុងតូក្យូនៅថ្ងៃទី ១៩ ខែ ធ្នូ ហើយនឹងបោះផ្សាយលក់ភាគហ៊ុនចំនួន ១,៦ ពាន់លានហ៊ុនរបស់ក្រុមហ៊ុនទូរស័ព្ទ SoftBank Corp ក្នុងតម្លៃ ១ ៥០០ យ៉េន (១៣ ដុល្លារ) ក្នុងមួយហ៊ុន។
សារព័ត៌មានក្នុងស្រុកបានរាយការណ៍ថា ការលក់ក្នុងតម្លៃនេះនឹងធ្វើឲ្យតម្លៃក្រុមហ៊ុនផ្តល់សេវាទូរស័ព្ទមួយនេះមានតម្លៃ ៧,១៨ ពាន់ពាន់លានយ៉េន ហើយ IPO នេះអាចក្លាយជា IPO ធំបំផុតមិនធ្លាប់មានក្នុងប្រទេស ជប៉ុន។
ក្រុមហ៊ុន SoftBank បានប្រកាសនៅខែកុម្ភៈថា ខ្លួននឹងដំណើរការ IPO នេះទៅមុខ បន្ទាប់ពីប្រព័ន្ធផ្សព្វផ្សាយបានរាយការណ៍ពីផែនការនេះ។
ក្រុមហ៊ុននេះបានឲ្យដឹងថា ការចុះបញ្ជីក្នុងផ្សារហ៊ុននេះនឹងផ្តល់ឲ្យក្រុមហ៊ុនខ្លួននូវ «ស្វ័យភាពគ្រប់គ្រងកាន់តែខ្លាំងក្នុងការអភិវឌ្ឍយុទ្ធសាស្រ្តកំណើនផ្ទាល់របស់ខ្លួន»។
ស្ថិតក្រោមអគ្គនាយកលោក Masayoshi Son ក្រុមហ៊ុន SoftBank បានផ្លាស់ប្តូរពីក្រុមហ៊ុនផលិតសូហ្វវែរមួយ និងត្រូវបានគេមើលឃើញថាជាក្រុមហ៊ុនដែលបានវិនិយោគទឹកប្រាក់ទៅក្នុងក្រុមហ៊ុន និងគម្រោងជាច្រើននៅខាងក្រៅអាជីវកម្មស្នូលរបស់ខ្លួន។
លោក Son បានទិញភាគហ៊ុនក្នុងក្រុមហ៊ុនបច្ចេកវិទ្យាមួយចំនួនរួមទាំងក្រុមហ៊ុន Uber, Slack, WeWork និងNvidia៕ AFP/KC