ភ្នំពេញៈ ក្រុមហ៊ុន Sumitronics Manufacturing (Cambodia) ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនផលិតឧបករណ៍អគ្គិសនីឈានមុខគេ Sumitronics Corp របស់ប្រទេសជប៉ុនបានបើកដំណើរការជាផ្លូវការនូវប្រតិបត្តិការរោងចក្ររបស់ខ្លួននៅតំបន់សេដ្ឋកិច្ចពិសេស Poi Pet PP សម្រាប់ការពង្រីកផលិតកម្មក្នុងតំបន់។
ក្រុមហ៊ុន Sumitronics Manufacturing (Cambodia) ដែលការវិនិយោគសរុបមានតម្លៃប្រហែល ១១ លានដុល្លារបានចាប់ផ្ដើមដំណើរការកាលពីថ្ងៃចន្ទនៅលើផ្ទៃដីជួលទំហំ ១០ ០០០ ម៉ែត្រការ៉េ ក្នុងតំបន់សេដ្ឋកិច្ចពិសេស Poi Pet PP។ ក្នុងនោះរោងចក្រគ្របដណ្តប់លើផ្ទៃដីទំហំ ៤ ៨០០ ម៉ែត្រការ៉េ និងផ្ដល់ការងារដល់កម្មករ ១២០ នាក់។
លោក Mifune Noriya នាយកក្រុមហ៊ុន Sumitronics Manufacturing (Cambodia) បានឲ្យដឹងក្នុងការបើកដំណើរការរោងចក្រនេះថា កាលពីខែសីហា ឆ្នាំ ២០១៦ ក្រុមហ៊ុនទទួលបានការយល់ព្រមចុះបញ្ជីអាជីវកម្មដើម្បីចាប់ផ្ដើមការផលិតគ្រឿងផ្គុំ និងឧបករណ៍អេឡិចត្រូនិកថ្មី។ លោកបានឲ្យដឹងថា ក្នុងរយៈពេល ៣ ឆ្នាំកន្លងមក ក្រុមហ៊ុនកំពុងធ្វើការងារលើការសាងសង់អគារក្នុងតំបន់សេដ្ឋកិច្ចពិសេសនេះ ហើយនៅពេលនេះក្រុមហ៊ុនបានបញ្ចប់ការសាងសង់សម្រាប់ការផលិតហើយ។
លោកថ្លែងថា៖ «យើងបានបញ្ចប់ការសាងសង់រោងចក្រនេះនៅខែឧសភាឆ្នាំនេះ និងបានចាប់ផ្ដើមការផលិតនៅក្នុងរោងចក្រថ្មីកាលពីខែមិថុនា។ វាមានរយៈពេល ៣ ឆ្នាំចាប់តាំងពីយើងបានចូលមកក្រុងប៉ោយប៉ែតរបស់ប្រទេសកម្ពុជា ហើយទីបំផុតយើងបានបញ្ចប់ការសាងសង់រោងចក្រផ្ទាល់ខ្លួនរបស់យើង។ នៅពេលនេះយើងបានចូលរួមក្នុងការផលិតគ្រឿងផ្គុំអេឡិចត្រូនិក និងឧបករណ៍អេឡិចត្រូនិកដោយពេញលេញ»។
លោកបញ្ជាក់ថា៖ «ដោយមានកិច្ចសហប្រតិបត្តិការរបស់សហគមន៍មូលដ្ឋាន ខ្ញុំសង្ឃឹមថា ការណ៍នេះនឹងរួមចំណែកដល់ការអភិវឌ្ឍសង្គម និងឧស្សាហកម្មផលិតកម្មនៅកម្ពុជា និងជប៉ុន»។
លោក Masahiro Mikami ឯកអគ្គរាជទូតជប៉ុនថ្មីដែលបានចូលរួមក្នុងពិធីនេះបានឲ្យដឹងថា ជាមួយនឹងកំណើនសេដ្ឋកិច្ចខ្ពស់របស់កម្ពុជាចំនួន ៧ ភាគរយ ក្នុងរយៈពេលជាច្រើនឆ្នាំ និងមានទីតាំងភូមិសាស្ដ្រជាយុទ្ធសាស្ដ្រនៅចំណុចកណ្ដាលច្រករបៀបសេដ្ឋកិច្ចភាគខាងត្បូងដែលតភ្ជាប់ទីក្រុងបាងកក និងទីក្រុងហូជីមិញតំបន់នេះទាក់ទាញការវិនិយោគខ្លាំងបំផុតសម្រាប់ក្រុមវិនិយោគិនបរទេស។
លោកបានមានប្រសាសន៍បន្តថា៖ «តាមចក្ខុវិស័យនៃអត្ថប្រយោជន៍ភូមិសាស្ដ្រ ក្រុមហ៊ុនបរទេសកំពុងចាប់អារម្មណ៍កាន់តែខ្លាំងឡើងចំពោះការវិនិយោគ។ អាស្រ័យហេតុនេះវាត្រូវបានគេចាត់ទុកថា ជាទិសដៅវិនិយោគដ៏មានសក្ដានុពលសម្រាប់ក្រុមហ៊ុនជប៉ុន»។
លោកបន្តថា ជាមួយនឹងវត្តមានក្រុមហ៊ុន Sumitronics លើកដំបូងដែលមានទីតាំងក្នុងតំបន់សេដ្ឋកិច្ចពិសេស Poi Pet PP ពិតណាស់ស្ថិតក្រោមយុទ្ធសាស្ដ្រ «ថៃបូក ១» ដែលក្រុមហ៊ុនជប៉ុននឹងពង្រីកនៅទីនេះ។
លោកបានថ្លែងថា៖ «នឹងមានរោងចក្រកាន់តែច្រើនមកពីប្រទេសថៃ ដែលមានឧស្សាហកម្មផលិតកម្មតម្លៃបន្ថែមខ្ពស់មកពង្រីកអាជីវកម្មរបស់ខ្លួន និងចូលមកប្រទេសកម្ពុជារបស់ខ្លួន។ គំរូអាជីវកម្មគឺជាគំរូឈ្នះ-ឈ្នះ សម្រាប់ក្រុមហ៊ុនជប៉ុន និងកម្ពុជា»៕ LA