ក្រុងម៉ុមបៃៈ ក្រុមហ៊ុន Total បានយល់ព្រមទិញភាគហ៊ុន ៣៧,៤ ភាគរយនៅក្នុងក្រុមហ៊ុន Adani Gas របស់ប្រទេសឥណ្ឌាដោយចំណាយ ៦០០ លានដុល្លារ ដើម្បីពង្រីកលទ្ធភាពរបស់ខ្លួនក្នុងចូលក្នុងប្រទេសដែលស្រេកឃ្លានថាមពលមួយនេះ។ នេះបើយោងតាមការឲ្យដឹងរបស់ក្រុមហ៊ុនទាំង ២ កាលពីថ្ងៃចន្ទ។
ក្រុមហ៊ុន Adani Gas ដែលជាផ្នែកមួយនៃក្រុមហ៊ុន Adani Group ដែលជាក្រុមហ៊ុនពហុផលិតផលគឺជាក្រុមហ៊ុនមួយក្នុងចំណោមក្រុមហ៊ុនចែកចាយឧស្ម័នធំៗចំនួន ៤ ក្នុងទីក្រុងរបស់ប្រទេសឥណ្ឌា ហើយគ្រោងនឹងបង្កើនសេវារបស់ខ្លួនដល់លំនៅឋាន ៦ លានខ្នង និងស្ថានីយឧស្ម័ន ១៥០០ កន្លែង ដើម្បីផ្គត់ផ្គង់រថយន្តក្នុងពេល ១ ទសវត្សរ៍ក្រោយ។
ស្ថិតក្រោមលក្ខខណ្ឌនៃកិច្ចព្រមព្រៀងនេះ ក្រុមហ៊ុន Total នឹងផ្ដល់ដោយបើកចំហដល់ភាគទុនិករបស់ក្រុមហ៊ុន Adani Gas ក្នុងការទិញភាគហ៊ុនរហូតដល់ ២៥,២ ភាគរយមុនពេលការទិញភាគហ៊ុនដែលនៅសល់ពីក្រុមហ៊ុននេះ ដែលនឹងធ្វើឲ្យក្រុមហ៊ុនបារាំង និងក្រុមហ៊ុនឥណ្ឌាទាំង ២ នេះមានភាគហ៊ុនស្មើគ្នា។
លោក Patrick Pouyanne ប្រធាន និងជាអគ្គនាយកក្រុមហ៊ុន Total បានឲ្យដឹងក្នុងសេចក្ដីប្រកាសព័ត៌មានមួយថា៖ «តម្រូវការថាមពលក្នុងប្រទេសឥណ្ឌាមានទំហំធំ និងភាពចម្រុះគ្នានៃថាមពល គឺជាគន្លឹះមួយចំពោះបញ្ហាប្រឈមការប្រែប្រួលអាកាសធាតុ»។
លោកបន្ថែមថា៖ «ទីផ្សារឧស្ម័នធម្មជាតិនៅប្រទេសឥណ្ឌានឹងមានកំណើនរឹងមាំ ហើយគឺជាកន្លែងដែលគួរឲ្យទាក់ទាញមួយដែលនឹងធ្វើឲ្យក្រុមហ៊ុន Total ក្លាយជាអ្នកដើរតួក្នុងវិស័យឧស្ម័ន LNG ឈានមុខគេទី ២ របស់ពិភពលោក»។
ឧស្ម័នធម្មជាតិបច្ចុប្បន្នជាផលិតផលមួយនៃការប្រើប្រាស់ថាមពលរបស់ប្រទេសឥណ្ឌាដែលមានប្រហែល ៧ ភាគរយ ខណៈដែលរបាយការណ៍កាលពីខែមិថុនារបស់មជ្ឈមណ្ឌលវិទ្យាសាស្ដ្រ និងបរិស្ថានឥណ្ឌាបានរកឃើញថា រោងចក្រថាមពលដែលមានមូលដ្ឋានលើឧស្ម័នរបស់ប្រទេសនេះ កំពុងដំណើរការចំនួន ២៤ ភាគរយនៃសមត្ថភាពរបស់ពួកគេ។
ទីក្រុងញូវដែលីបានកំណត់ទិសដៅក្នុងការបង្កើនការប្រើប្រាស់ឧស្ម័នធម្មជាតិដល់ ១៥ ភាគរយត្រឹមឆ្នាំ ២០៣០។
លោក Gautam Adani ស្ថាបនិករបស់ក្រុមហ៊ុនពហុផលិតផលដែលមានចាប់ពីការរុករករ៉ែរហូតដល់ឡូជីស្ទិកបានថ្លែងថា៖ «ការវិនិយោគរបស់ក្រុមហ៊ុន Total លើក្រុមហ៊ុន Adani Gas ពង្រឹងសក្ដានុពលឧស្ម័នធម្មជាតិ និងតម្រូវការរបស់ប្រទេសឥណ្ឌា»។ លោកបន្ថែមថា៖ «យើងទន្ទឹងរង់ចាំការធ្វើការងារជាមួយគ្នាឆ្ពោះទៅរកការផ្ដល់ចក្ខុវិស័យរបស់ប្រទេសឥណ្ឌាសម្រាប់ថាមពលស្អាត និងបៃតង»៕ LA