ក្រុងញូវយ៉កៈ កាសែត Wall Street Journal បានរាយការណ៍កាលពីថ្ងៃពុធថា ក្រុមហ៊ុន Uber កំពុងស្វែងរកការប្រមូលមូលនិធិប្រហែល ១០ ពាន់លានដុល្លារជាអ្វីដែលនឹងក្លាយជាការបោះផ្សាយមូលបត្រសាធារណៈលើកដំបូង (IPO) ធំបំផុតប្រចាំឆ្នាំនេះ ហើយព័ត៌មានលម្អិតអាចនឹងត្រូវចេញផ្សាយនៅថ្ងៃនេះ។
សេចក្ដីរាយការណ៍បានឲ្យដឹងថា ក្រុមហ៊ុនផ្តល់សេវាហៅតាក់ស៊ីជិះឈានមុខគេរបស់ពិភពលោកមួយនេះ កំពុងស្វែងរកការបោះផ្សាយមូលបត្រក្នុងតម្លៃជិត ១០០ ពាន់លានដុល្លារ ដែលជាតួលេខគួរឲ្យចាប់អារម្មណ៍មួយ ប៉ុន្តែតួលេខនេះមានកម្រិតទាបជាងការព្យាករកាលពីលើកមុន ក្នុងគ្រាដែលមានការធ្លាក់ចុះភាពសុទិដ្ឋិនិយមលើកំណើន និងប្រាក់ចំណេញ។
កាសែត Journal បានរាយការណ៍ទៀតថា ការបោះផ្សាយ IPO របស់ក្រុមហ៊ុន Uber ត្រូវបានរំពឹងថា នឹងធ្វើឡើងនៅខែឧសភា។
ការបោះផ្សាយ IPO នេះធ្វើឡើងបន្ទាប់ពីការឆ្លើយតបចម្រុះទៅនឹងការបោះផ្សាយលក់មូលបត្រជាសាធារណៈលើកដំបូងរបស់ក្រុមហ៊ុនអាមេរិក Lyft ដែលជាក្រុមហ៊ុនជាគូប្រជែងដ៏សំខាន់របស់ក្រុមហ៊ុន Uber។
តម្លៃភាគហ៊ុនរបស់ក្រុមហ៊ុន Lyft បានកើនឡើងនៅថ្ងៃជួញដូរដំបូង ហើយបន្ទាប់មកបានធ្លាក់ចុះ។ កាលពីថ្ងៃពុធ តម្លៃភាគហ៊ុនរបស់ក្រុមហ៊ុននេះបានធ្លាក់ចុះជាង ១០ ភាគរយ ដោយជួញដូរក្នុងតម្លៃ ៧២ ដុល្លារក្នុងមួយហ៊ុន។
Journal បានរាយការណ៍ថា ភាគហ៊ុនរបស់ក្រុមហ៊ុន Uber អាចមានតម្លៃន្លោះពី ៤៨ ដុល្លារទៅ ៥៥ ដុល្លារក្នុងមួយភាគហ៊ុន៕ AFP/LA