The Phnom Penh Post Search

Search form




Logo of Phnom Penh Post newspaper Phnom Penh Post - ក្រុមហ៊ុន US គ្រោង​វិនិយោគ​ផលិត​ស្ករ​គ្រាប់​នៅ​កម្ពុជា

ក្រុមហ៊ុន US គ្រោង​វិនិយោគ​ផលិត​ស្ករ​គ្រាប់​នៅ​កម្ពុជា

ឯក​អគ្គរដ្ឋ​ទូត​អាមេរិក​ប្រចាំ ប្រទេស​កម្ពុជា (ឆ្វេង) និង លោក ស៊ុន ចាន់ថុល (ស្តាំ) ក្នុង​សន្និសីទ​កាល​ពី​ថ្ងៃ ទី៧ កក្ដដា ២០១៤។
ឯក​អគ្គរដ្ឋ​ទូត​អាមេរិក​ប្រចាំ ប្រទេស​កម្ពុជា (ឆ្វេង) និង លោក ស៊ុន ចាន់ថុល (ស្តាំ) ក្នុង​សន្និសីទ​កាល​ពី​ថ្ងៃ ទី៧ កក្ដដា ២០១៤។ ហេង ជីវ័ន

ក្រុមហ៊ុន US គ្រោង​វិនិយោគ​ផលិត​ស្ករ​គ្រាប់​នៅ​កម្ពុជា

ភ្នំពេញៈ មន្ដ្រី​ពាណិជ្ជកម្ម​បាន​ប្រាប់ ភ្នំពេញ ប៉ុស្ដិ៍ កាល​ពី​ថ្ងៃ​ចន្ទ​ថា Aprati Foods Company ជា​ក្រុម​ហ៊ុន​បុត្រ​សម្ព័ន្ធ​ដែល​គ្រប់​គ្រង​ទាំង​ស្រុង​ដោយ American Licorice ដែល​ជា​ក្រុម​ហ៊ុន​ស្ករ​គ្រាប់​ដ៏​ល្បី​ឈ្មោះ​នៅ​អាមេរិក គ្រោង​វិនិយោគ​ទឹក​ប្រាក់​ពី ២ ទៅ ៣ លាន​ដុល្លារ​ដើម្បី​សាង​សង់​រោងចក្រ​មួយ​នៅ​កម្ពុជា។

តាម​សេចក្ដី​ប្រកាស​ព័ត៌មាន​របស់​ក្រសួង​ការ​បង្ហាញ​ពី​ចំណាប់​អាម្មណ៍​នេះ​ធ្វើ​ឡើង​ក្នុង​អំឡុង​កិច្ច​ប្រជុំ​រវាង​លោក ស៊ុន ចាន់ថុល រដ្ឋ​មន្ដ្រី​ក្រសួង​ពាណិជ្ជកម្ម​កម្ពុជា និង​លោក Bradley J. Gordon ស្ថាបនិក​ក្រុម​ហ៊ុន Gordon & Associates និង​លោក Aaron T. Johnson ប្រធាន​ផ្នែក​គ្រប់​គ្រង និង​ផលិត​នៅ​ក្រុម​ហ៊ុន Aprati Foods Company កាល​ពី​ថ្ងៃ​ព្រហស្បតិ៍​មុន។

លោក Mr. Johnson បាន​ប្រាប់​លោក ស៊ុន ចាន់ថុល ថា ក្រុម​ហ៊ុន Aprati Foods Company ជា​ក្រុម​ហ៊ុន​បុត្រ​សម្ព័ន្ធ​គ្រប់​គ្រង​ទាំង​ស្រុង​ដោយ American Licorice ដែល​ជា​ក្រុម​ហ៊ុន​ស្ករ​គ្រាប់​ដ៏​ល្បី​ឈ្មោះ​នៅ អាមេរិក «កំពុង​ធ្វើ​ការ​សម្រេច​ចិត្ត​ដើម្បី​វិនិយោគ​នៅ​ក្នុង​ការ​សាង​សង់​រោងចក្រ​មួយ​នៅ​កម្ពុជា​ដើម្បី​ផលិត​ស្ករ​គ្រាប់​សម្រាប់​ទីផ្សារ​ក្នុង​ស្រុក និង​ក្នុង​តំបន់»។

ដំណើរ​ទស្សនកិច្ច​របស់​ពាណិជ្ជករ​អាមេរិក​កើត​ឡើង​តែ​ប៉ុន្មាន​សប្ដាហ៍​ប៉ុណ្ណោះ​បន្ទាប់​ពី​ដំណើរ​ទស្សន​កិច្ច​របស់ ស៊ុន ចាន់ថុល និង​ឯក​អគ្គ​រដ្ឋ​ទូត​អាមេរិក​ប្រចាំ​កម្ពុជា​ទៅ​អាមេរិក​រយៈ​ពេល ៥​ថ្ងៃ កាល​ពី​ចុង ខែ​មិថុនា។

កាល​ពី​ដើម ខែ​កក្កដា ស៊ុន ចាន់ថុល ថ្លែង​នៅ​សន្និសីទ​រួម​ជាមួយ​អគ្គ​រដ្ឋ​ទូត​អាមេរិក​ថា ក្រុម​ហ៊ុន​អាមេរិក​មួយ​ចំនួន​មាន​បំណង​វិនិយោគ​នៅ កម្ពុជា ប៉ុន្តែ​ពួក​គេ​កំពុង​រង់​ចាំ​មើល​ដំណោះស្រាយ​ជាប់​គាំង​នយោបាយ​ជា​មុន​សិន។

មេ​ដឹក​នាំ​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ​នឹង​ជួប​គ្នា​នៅ​ថ្ងៃ​នេះ​ដើម្បី​ទម្លុះ​ទម្លាយ​ភាព​ជាប់​គាំង​ខាង​នយោបាយ​ដែល​អូស​បន្លាយ​ចាប់​តាំង​ពី​ការ​បោះ​ឆ្នោត​កាល​ពី​ថ្ងៃ ទី២៨ ខែ​កក្កដា កន្លង​មក។

លោក កែន រដ្ឋា អ្នក​នាំ​ពាក្យ​ក្រសួង​ពាណិជ្ជកម្ម​ថ្លែង​ថា លោក​រដ្ឋ​មន្ដ្រី​បាន​បង្ហាញ​ពី​ការ​គាំទ្រ​ដល់​ការ​បង្កើត​ក្រុម​ហ៊ុន​នេះ។

លោក​បន្ត​ថា៖ «ពួក​គេ​មាន​ផែន​ការ​ច្បាស់​លាស់​រួច​ហើយ ហើយ​ពួកគេ​មក​ទី​នេះ​គ្រាន់​តែ​ចង់​ទទួល​បាន​ការ​គាំទ្រ​បន្ថែម​ពី​ពួក​យើង​ប៉ុណ្ណោះ​ដើម្បី​ធ្វើ​ឲ្យ​ប្រាកដ​ថា នៅ​ពេល​ពួក​គេ​ចូល​មក​ថា តើ​ពួកគេ​ទទួល​បាន​ជោគ​ជ័យ​ឬ​អត់​ព្រោះ​ពួក​គេ​ជា​ក្រុម​ហ៊ុន​ធំ​នៅ​ក្នុង ប្រទេស​អាមេរិក»។

លោក​បន្ត​ថា៖ «ដំបូង​ពួក​គេ​ផលិត​ដើម្បី​ផ្គត់​ផ្គង់​ដល់​ទីផ្សារ​ក្នុង​ស្រុក ហើយ​បន្ទាប់​មក​ពួក​គេ​នឹង​ធ្វើ​ការ​នាំ​ចេញ​នៅ​ក្នុង​តំបន់​នេះ។ វត្តមាន​របស់​ពួក​គេ​នៅ​ទី​នេះ​នឹង​មាន​ការ​ទាក់​ទាញ​ដល់​បណ្ដា​ក្រុម​ហ៊ុន​អាមេរិក​ផ្សេង​ទៀត​ចូល​មក​ក្នុង​ប្រទេស​របស់​យើង»។ លោក​មិន​បាន​ដឹង​ពី​ទី​កន្លែង​ដែល​រោងចក្រ​នេះ​ត្រូវ​ធ្វើ​ការ​សាង​សង់​នោះ​ទេ។

លោក Johnson ថ្លែង​ថា ក្រុម​ហ៊ុន​នេះ​គ្រោង​នឹង​វិនិយោគ​ប្រហែល​ពី ២ ទៅ ៣ លាន​ដុល្លារ​សម្រាប់​រោងចក្រ​ស្ករ​គ្រាប់​ដែល​អាច​ផ្ដល់​ការងារ​ដល់​បុគ្គលិក​ចំនួន ៥០ នាក់។

ទិន្នន័យ​ពី CDC បង្ហាញ​ថា កម្ពុជា បាន​អនុម័ត​ទឹក​ប្រាក់​ប្រហែល ១,៣ ពាន់​លាន​ដុល្លារ​លើ​ការ​វិនិយោគ​ពី​អាមេរិក​ចាប់​ពី ឆ្នាំ​១៩៩៤ រហូត​ដល់​ចុង ឆ្នាំ​២០១២។

កម្ពុជា បាន​នាំ​ចេញ​ប្រហែល ១,២ ពាន់​លាន​ដុល្លារ​ទៅ​អាមេរិក​នៅ​ក្នុង​រយៈ​ពេល ៥ ខែ​ដំបូង​ឆ្នាំ​នេះ បើ​ធៀប​នឹង​ចំនួន ១,៣ ពាន់​លាន​ដុល្លារ​ក្នុង​រយៈ​ពេល​ដូច​គ្នា​កាល​ពី​ឆ្នាំ​មុន៕

អត្ថបទគួរចាប់អារម្មណ៍