ភ្នំពេញៈ ក្រុមហ៊ុន Wah Sun Handbags International Holding បានបង្ហាញផែនការប្រមូលថវិការហូតដល់ ១៧,៦ លានដុល្លារពីការបោះផ្សាយមូលបត្រសាធារណៈលើកដំបូង (IPO) នៅផ្សារហ៊ុនហុងកុង ដែលជិតពាក់កណ្ដាលនៃទឹកប្រាក់នេះគ្រោងនឹងប្រើប្រាស់ដើម្បីពង្រីករោងចក្រផលិតរបស់ខ្លួនក្នុងប្រទេសកម្ពុជា។ នេះបើយោងតាមឯកសារដែលក្រុមហ៊ុនដាក់ជូនផ្សារហ៊ុនក្រុងហុងកុងកាលពីថ្ងៃពុធ។
យោងតាមឯកសារនេះ នៅពេលក្រុមហ៊ុនបោះផ្សាយ IPO រួចហើយ ក្រុមហ៊ុននឹងប្រើប្រាស់ ៤៥ភាគរយនៃទឹកប្រាក់ដែលបានពីការបោះផ្សាយនេះសម្រាប់ការជួលដី និងការសាងសង់អគារ និងការទិញឧបករណ៍ផលិត។
ក្រុមហ៊ុន Wah Sun នឹងបង្កើតក្រុមអភិវឌ្ឍន៍ផលិតផលមួយនៅកម្ពុជា បង្កើនអនុបាតប្រាក់ចំណេញដុល និងបន្តគ្រប់គ្រងថ្លៃដើម រីឯចំណែកនៅសល់នឹងត្រូវប្រើប្រាស់ដើម្បីកែលម្អប្រព័ន្ធនានា កែលម្អ និងដំឡើងបន្ទប់តាំងលក់ផលិតផល និងសម្រាប់ទុនបង្វិលទូទៅ។
ក្រុមហ៊ុន Wah Sun បានឲ្យដឹងនៅក្នុងសេចក្ដីប្រកាសព័ត៌មានរបស់ខ្លួនកាលពីថ្ងៃពុធថា ការចំណាយលើកម្លាំងពលកម្មនៅកម្ពុជាមានកម្រិតទាប ធៀបនឹងប្រទេសចិនដែលទាក់ទាញក្រុមហ៊ុនឲ្យពង្រីកអាជីវកម្មនៅក្នុងប្រទេសនេះ។
ក្រុមហ៊ុនបានឲ្យដឹងទៀតថា ខណៈដែលប្រាក់ខែជាមធ្យមសម្រាប់ឧស្សាហកម្មផលិតកម្មគ្រឿងផ្គុំ (OEM) សម្រាប់ផលិតកាបូបយួរដៃរបស់ប្រទេសកម្ពុជាមានជាង ១៦០ដុល្លារកាលពីឆ្នាំ២០១៦នោះ ប្រាក់ខែជាមធ្យមសម្រាប់ឧស្សាហកម្មកាបូបយួរដៃរបស់ចិនមានជាង ៤៨០ដុល្លារ។
ក្រុមហ៊ុន Wah Sun បានឲ្យដឹងក្នុងឯកសាររបស់ខ្លួនថា៖ «ថ្លៃពលកម្មទាបនៅក្នុងប្រទេសកម្ពុជាត្រូវបានរំពឹងថានឹងទាក់ទាញការវិនិយោគបរទេសនៅក្នុងឧស្សាហកម្មផលិតកម្ម ដូចជា ឧស្សាហកម្មផលិតគ្រឿងផ្គុំសម្រាប់ផលិតកាបូបយួរដៃដែលមិនផលិតពីស្បែកជាដើម»។
ឯកសារដដែលបានបន្ថែមថា នឹងមានកំណើនចំនួនក្រុមហ៊ុនផលិតគ្រឿងផ្គុំសម្រាប់ផលិតកាបូបយួរដៃដែលមិនផលិតពីស្បែក ដែលបានផ្លាស់ប្តូរមូលដ្ឋានផលិតរបស់ពួកគេមកប្រទេសកម្ពុជា ដើម្បីទទួលបានអត្ថប្រយោជន៍ដ៏សំខាន់ រួមទាំងលទ្ធភាពទទួលបានការអនុគ្រោះពាណិជ្ជកម្មរបស់ខ្លួនទៅបណ្ដាប្រទេសអភិវឌ្ឍន៍ធំៗ និងថ្លៃពលកម្មទាបរបស់ប្រទេសនេះ។
សេចក្ដីប្រកាសព័ត៌មាននេះបន្តថា៖ «មានការរំពឹងថា រោងចក្រផលិតកាបូបយួរដៃដែលមិនផលិតពីស្បែកកាន់តែច្រើន នឹងផ្លាស់ប្តូរមកពីបណ្ដាប្រទេសផ្សេងទៀតមកកម្ពុជានៅពេលអនាគត»។
ក្រុមហ៊ុន Wah Sun Handbags International Holding នឹងបោះផ្សាយភាគហ៊ុនចំនួន ១០០ លានហ៊ុនដែលមានតម្លៃចន្លោះពី ១ដុល្លារហុងកុង (០,១៣ ដុល្លារអាមេរិក) ទៅ ១,៣៨ ដុល្លារហុងកុងក្នុងមួយភាគហ៊ុន។
ក្រុមហ៊ុន Wah Sun Cambodia ដែលមានទីតាំងនៅក្នុងខេត្តកំពង់ស្ពឺ ត្រូវបានបង្កើតឡើងកាលពីឆ្នាំ២០១៣ និងផ្ដល់ការងារដល់កម្មករចំនួន ៤៥០០ នាក់រហូតមកដល់ពេលនេះ។
អតិថិជនដ៏សំខាន់របស់ក្រុមហ៊ុននេះគឺជាយីហោលំដាប់អន្តរជាតិដែលមានការិយាល័យកណ្ដាលនៅអាមេរិក កាណាដា អេស្ប៉ាញ ស៊ុយអែត និងជប៉ុន។
លោក ស៊ាង ថៃ អ្នកនាំពាក្យក្រសួងពាណិជ្ជកម្ម បានថ្លែងកាលពីម្សិលមិញថា លោកស្វាគមន៍ចំពោះការសម្រេចចិត្តរបស់ក្រុមហ៊ុន Wah Sun ក្នុងការពង្រីកប្រតិបត្តិការក្នុងប្រទេសកម្ពុជា ដោយលោកបានថ្លែងថា ឧស្សាហកម្មកាបូបយួរដៃនៅក្នុងប្រទេសកម្ពុជាកំពុងទទួលបានការទាក់ទាញកាន់តែច្រើនពីវិនិយោគិន បន្ទាប់ពីកាលពាក់កណ្ដាលឆ្នាំ ២០១៦ ដែលរដ្ឋាភិបាលអាមេរិកបានពង្រីកផែនការប្រព័ន្ធអនុគ្រោះពន្ធទូទៅ (GSP) ដោយដាក់បញ្ចូលទំនិញធ្វើដំណើរដែលបានផលិតនៅកម្ពុជា ដែលផ្ដល់ឲ្យទំនិញទាំងនេះនូវការចូលទៅទីផ្សារអាមេរិកដោយរួចពន្ធ។
លោកថ្លែងថា៖ «បន្ទាប់ពីទទួលបានការនាំចេញដោយរួចពន្ធសម្រាប់ទំនិញធ្វើដំណើរទៅទីផ្សារអាមេរិករួចមក យើងបានមើលឃើញកំណើនខ្លាំងនៃការនាំចេញរបស់ផលិតផលទាំងនេះ»។
លោកបន្តថា៖«នៅពេលអនាគតវិស័យនេះនៅកម្ពុជាគឺល្អ ដោយសារយើងឃើញថា មានក្រុមវិនិយោគិនកាន់តែច្រើនឡើងៗបង្កើតរោងចក្ររបស់ពួកគេនៅក្នុងប្រទេសរបស់យើង»៕ LA