ក្រុងហុងកុងៈ ក្រុមហ៊ុនផលិតទូរស័ព្ទទំនើប Xiaomi របស់ចិននឹងផ្តោតយ៉ាងតក់ក្រហល់លើទីផ្សារអឺរ៉ុប ដោយប្រើប្រាស់ទឹកប្រាក់មួយផ្នែកដែលទទួលបានពីការបោះផ្សាយមូលបត្រជាសាធារណៈលើកដំបូង (IPO) របស់ខ្លួនដែលមានតម្លៃ ៦,១ ពាន់លានដុល្លារក្នុងទីក្រុងហុងកុង។ នេះបើតាមការឲ្យដឹងពីសហស្ថាបនិកក្រុមហ៊ុនកាលពីថ្ងៃសៅរ៍។
ក្រុមហ៊ុន Xiaomi នឹងបោះផ្សាយលក់ភាគហ៊ុន ២,១៨ ពាន់លានហ៊ុនក្នុងតម្លៃពី ១៧ ទៅ ២២ ដុល្លារហុងកុងក្នុងមួយហ៊ុន (២,១៥ ទៅ ២,៨ ដុល្លារអាមេរិក) ក្នុងគោលបំណងប្រមូលប្រាក់ចំនួន ៦,១ ពាន់លានដុល្លារពោលគឺតិចជាងឆ្ងាយធៀបនឹង ១០ ពាន់លានដុល្លារដែលរំពឹងថានឹងបោះផ្សាយកន្លងមក ខណៈមានការឡើងកម្តៅសង្គ្រាមពាណិជ្ជកម្មរវាងប្រទេសចិន និងអាមេរិកធ្វើឲ្យប៉ះពាល់អារម្មណ៍របស់វិនិយោគិន។
ប៉ុន្តែនៅសន្និសីទសារព័ត៌មានមួយក្នុងទីក្រុងហុងកុងកាលពីថ្ងៃសៅរ៍មុនពេលចុះបញ្ជីក្នុងផ្សារហ៊ុនរបស់ខ្លួននៅថ្ងៃទី ៩ ខែ កក្កដា សហស្ថាបនិករបស់ក្រុមហ៊ុននេះមានសុទិដ្ឋិនិយមអំពីចក្ខុវិស័យរបស់ខ្លួនដោយបង្ហាញផែនការនានាសម្រាប់ការពង្រីកអាជីវកម្មអន្តរជាតិនៅតំបន់អឺរ៉ុប និងអាស៊ីអាគ្នេយ៍។
លោក Lei Jun សហស្ថាបនិកក្រុមហ៊ុន Xiaomi ថ្លែងថា៖ «មនុស្សម្នាក់បានសួរខ្ញុំថាតើក្រុមហ៊ុន Xiaomi (នឹង) ពង្រីកអាជីវកម្មតែក្នុងប្រទេសកំពុងអភិវឌ្ឍន៍ ឬ? កាលពីឆ្នាំមុនយើងបានចាប់ផ្តើមចូលទីផ្សារអឺរ៉ុប ហើយយើងបានដឹងថា យើងមានអ្នកគាំទ្រជាច្រើននៅអឺរ៉ុប»។
Xiaomi នឹងវិនិយោគប្រហែល ៨,៣ ពាន់លានពីទឹកប្រាក់បោះផ្សាយ IPO ដើម្បីបង្កើនវត្តមាននៅទីផ្សារបរទេសរួមទាំងនៅអេស្ប៉ាញ និងឥណ្ឌូនេស៊ី៕ KC