ភ្នំពេញ: ក្រុមហ៊ុន Gold Coast International Development Co.,LTD គ្រោងនឹងបោះទុនជិត ២៥ លានដុល្លារ វិនិយោគលើការសាងសង់មជ្ឈមណ្ឌលពាណិជ្ជកម្មចម្រុះនៅក្នុងខេត្តកំពតដែលជាតំបន់ជាប់ឆ្នេរសមុទ្រកំពុងមានសក្តានុពលលើវិស័យទេសចរណ៍ និងអចលនទ្រព្យ។
គម្រោងដែលគ្រោងនឹងវិនិយោគដោយវិនិយោគិននៅក្នុងស្រុក និងចិននេះត្រូវបានបង្ហើបឲ្យដឹងក្នុងកិច្ចប្រជុំរបស់អនុគណៈកម្មាធិការវិនិយោគខេត្តដឹកនាំដោយលោក ជាវ តាយ អភិបាលខេត្តកំពតកាលពីពេលថ្មីៗនេះ។
លោក ជាវ តាយ បានឲ្យដឹងថា ក្រុមហ៊ុនបានសុំវិនិយោគសាងសង់មជ្ឈមណ្ឌលពាណិជ្ជកម្មចម្រុះរួមមានសណ្ឋាគារផ្កាយ៤ ខុនដូ មណ្ឌលកម្សាន្ត ផ្សារទំនើប និងសេវាទេសចរណ៍ដោយមានទុនវិនិយោគ ២៤,៨ លានដុល្លារ។
លោកបន្តថា គម្រោងនេះនឹងសាងសង់លើផ្ទៃដី ៤២ ហិកតាស្ថិតនៅក្នុងស្រុកកំពង់ត្រាច ខេត្តកំពត។ ដើម្បីសម្របសម្រួលគម្រោងនេះ រដ្ឋបាលខេត្តបានបង្កើតក្រុមការងារចម្រុះឲ្យធ្វើការសិក្សាលម្អិតនៅទីតាំងជាក់ស្តែងក្នុងការវាយតម្លៃផលប៉ះពាល់ និងទីតាំងភូមិសាស្ត្រ។
លោកបន្តថា៖ «យើងសូមណែនាំឲ្យក្រុមហ៊ុនសហការជាមួយមន្ត្រីជំនាញខេត្ត ធ្វើការផ្នែកបច្ចេកទេស ច្បាប់ និងឯកសារពាក់ព័ន្ធ ដើម្បីស្នើសុំទៅក្រុមប្រឹក្សាអភិវឌ្ឍន៍កម្ពុជា និងរដ្ឋាភិបាលដើម្បីពិនិត្យ និងសម្រេចលើគម្រោងវិនិយោគនេះ»។
យោងតាមលោក តាយ កាលពីឆ្នាំ ២០១៩ រដ្ឋបាលខេត្តកំពតរួមទាំងរដ្ឋបាលក្រុង និងស្រុកបានចេញលិខិតអនុញ្ញាតលើគម្រោងសាងសង់ចំនួន ២៣៨ គម្រោង ដែលមានទុនវិនិយោគជាង ៣,១៣ លានដុល្លារ។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាប្រាប់ភ្នំពេញប៉ុស្តិ៍កាលពីថ្ងៃចន្ទថា សព្វថ្ងៃខេត្តកំពតកំពុងទាក់ទាញការវិនិយោគលើវិស័យអចលនទ្រព្យគួរឲ្យកត់សម្គាល់ ពិសេសលើគម្រោងសាងសង់ខុនដូ។ លោកថ្លែងថា៖ «អ្នកវិនិយោគនៅខេត្តព្រះសីហនុកំពុងងាកទៅបោះទុនក្នុងខេត្តកំពតជាបន្តបន្ទាប់ ព្រោះខេត្តនេះជាតំបន់មានសក្តានុពលទេសចរណ៍ធម្មជាតិ»។
លោកថ្លែងថា៖ «ប្រសិនបើមានការវិនិយោគលើគម្រោងនេះពិតប្រាកដមែន វានឹងជួយលើកមុខមាត់ខេត្តកំពត ហើយវាក៏នឹងជួយជំរុញឲ្យតម្លៃអចលនទ្រព្យល្អផងដែរ»។
បើតាមលោក សុខនីម សព្វថ្ងៃដីនៅចំកណ្តាលទីក្រុងកំពតមានតម្លៃចន្លោះពី ១ ៨០០ ដុល្លារ ទៅ ២ ៥០០ ដុល្លារ ក្នុង ១ ម៉ែត្រការ៉េ។
របាយការណ៍ក្រសួងរៀបចំដែនដី នគរូបនីយកម្ម និងសំណង់បង្ហាញថា ទុនវិនិយោគវិស័យសំណង់នៅកម្ពុជាក្នុងឆមាសទី ១ ឆ្នាំ ២០២០ មានតម្លៃជាង ៣,៨៤ ពាន់លានដុល្លារ កើន ១៣,២៦ ភាគរយ ធៀបនឹងឆមាសទី ១ ឆ្នាំ ២០១៩។
យោងតាមក្រសួងពាណិជ្ជកម្ម លំហូរវិនិយោគរបស់ចិនមកកម្ពុជាក្នុងឆ្នាំ ២០១៨ មាន ៣ ៥៩៤ លានដុល្លារ៕ LA