ភ្នំពេញៈ ខណៈដែលថ្ងៃសម្រាកបុណ្យចូលឆ្នាំថ្មីជិតចាប់ផ្ដើម បណ្ដាខេត្តទេសចរណ៍មានសក្ដានុពលមួយចំនួនចាប់ពីខេត្តជាប់ឆ្នេរសមុទ្រដល់ខេត្តមានប្រាសាទបុរាណ បានចាប់ផ្ដើមរៀបចំដើម្បីស្វាគមន៍ភ្ញៀវទេសចរដែលនឹងធ្វើដំណើរចេញពីទីក្រុងភ្នំពេញ។
ទីក្រុងសៀមរាប ដែលបានជាប់ចំណាត់ថ្នាក់ទីពីរក្នុងចំណោមទីក្រុងអាស៊ី ១០ ស្អាតបំផុតសម្រាប់ភ្ញៀវ ទេសចរនៅក្នុងការបោះឆ្នោតរបស់អ្នកអានទស្សនាវដ្ដី Travel + Leisure កាលពី ខែមិថុនា ឆ្នាំនេះ បានធ្វើពិធីកាន់តែធំជាងមុនជាមួយនឹងការតុបតែងអំពូលភ្លើងកាន់តែច្រើននៅទីក្រុងនេះដោយមានការប្រគំតន្ដ្រីធំៗ និងការបាញ់កាំជ្រួចនៅយប់ចុងក្រោយនៃ ឆ្នាំ២០១៤។ នេះបើតាមការឲ្យដឹងពីលោក ឃឹម ប៊ុនសុង អភិបាល ខេត្តសៀមរាប។
លោកថ្លែងថា៖ «ការប្រារព្ធពិធីនៅឆ្នាំនេះនឹងធំជាងកាលពីឆ្នាំមុនបន្តិច ដោយសារតែយើងបានពង្រីកការតុបតែងភ្លើងនៅកន្លែងជាច្រើនក្នុងទីក្រុងសៀមរាប។ សណ្ឋាគារ ផ្ទះសំណាក់ និងភោជនីយដ្ឋានក៏កំពុងរៀបចំសកម្មភាពមួយចំនួនផងដែរក្នុងការប្រារព្ធពិធីនេះ»។
លោកបន្តថា៖ «វិស័យឯកជននៅឆ្នាំនេះធ្វើការបានកាន់តែល្អប្រសើរចំពោះការតុបតែងលម្អទីកន្លែងរបស់ពួកគេ ដើម្បីស្វាគមន៍បុណ្យចូលឆ្នាំថ្មី។ ខ្ញុំរំពឹងថា នឹងមានមនុស្សកាន់តែច្រើនដោយសារតែតាមដែលខ្ញុំដឹង សណ្ឋាគារ និងផ្ទះសំណាក់ត្រូវបានគេកក់ពេញអស់ហើយនៅថ្ងៃនេះ និងថ្ងៃស្អែក»។
លោក ប៊ុនសុង ថ្លែងថា ការតុបតែងភាគច្រើនផ្ដោតលើ ក្រុងសៀមរាប ហើយតំបន់ប្រាសាទនឹងត្រូវទុកឲ្យស្ថិតនៅក្នុងសភាពធម្មតា។
លោកបន្តថា៖ «មិនមានការតុបតែងពិសេសសម្រាប់ទីតាំងប្រាសាទនោះទេ។ ហាងតាមដងផ្លូវ និងផ្សាររាត្រីក្រុងសៀមរាប នឹងជាទីតាំងផ្ដោតលើការយកចិត្តទុកដាក់ក្នុងការប្រារព្ធពិធីបុណ្យចូលឆ្នាំ។ កាំជ្រួចនឹងបាញ់ចេញពីតំបន់ស្ពានថ្មចាស់របស់ក្រុងសៀមរាប ក្នុងអំឡុងនៅយប់ថ្ងៃ ទី៣១ ឈានចូល ឆ្នាំ២០១៥»។
លោក ប៊ុនសុង បានថ្លែងថា អាជ្ញាធរសៀមរាបបានបង្កើនការយកចិត្តទុកដាក់ដល់សុវត្ថិភាពភ្ញៀវទេសចរមកកាន់ខេត្តនេះក្នុងរយៈពេលពីរថ្ងៃនេះ។
ទន្ទឹមនឹងនេះដែរ ខេត្តបាត់ដំបង ដែលល្បីថា ជាទីក្រុងបេតិកភណ្ឌ និងពេញនិយមមួយសម្រាប់ស្ថាបត្យកម្មអាណានិគមបារាំង និងណូរី កំពុងរៀបចំការប្រារព្ធពិធីលើកដំបូងរបស់ខ្លួនសម្រាប់ថ្ងៃបុណ្យចូលឆ្នាំសកលផងដែរ។ គួរបញ្ជាក់ថា ដើម្បីទាក់ទាញភ្ញៀវទេសចរបរទេស ខេត្តបាត់ដំបង បានព្យាយាមបង្កើតហាងតាមដងផ្លូវ និងផ្សាររាត្រីដូចផ្សាររាត្រីនៅ ក្រុងសៀមរាប កាលពីដើមឆ្នាំនេះ។
លោក អ៊ុច អ៊ុំពីនីស្សារ៉ា ប្រធានមន្ទីរទេសចរណ៍ ខេត្តបាត់ដំបង បានប្រាប់ ភ្នំពេញ ប៉ុស្ដិ៍ កាលពីម្សិលមិញថា ភ្ញៀវទេសចរបានចាប់ផ្ដើមធ្វើដំណើរចូលទៅកាន់ ខេត្តបាត់ដំបង ខណៈ ដែលថ្ងៃឆ្លងឆ្នាំ នឹងចូលមកដល់ អាជ្ញាធរបានរៀបចំតុបតែងលម្អ ក្រុងបាត់ដំបង ដោយភ្លើងពណ៌ដើម្បីអបអរពិធីបុណ្យចូលឆ្នាំសកល។ នេះជាលើកដំបូងហើយដែលខេត្តនេះរៀបចំការប្រគំតន្ដ្រី ការបង្ហោះគោម និងការសម្ដែងសៀកដើម្បីស្វាគមន៍ភ្ញៀវទេសចរ។
លោកលើកឡើងថា៖ «ព្រឹត្តិការណ៍ទាំងមូលនឹងត្រូវប្រារព្ធឡើងក្នុងតំបន់ផ្សាររាត្រីចាប់ពីម៉ោង ៦ ព្រឹកដល់ម៉ោង ១២ យប់។ នេះគឺជាលើកដំបូងហើយសម្រាប់ខេត្តនេះក្នុងការរៀបចំព្រឹត្តិការណ៍ដូចនោះដើម្បីទាក់ទាញភ្ញៀវទេសចរ។ ខ្ញុំរំពឹងថា មនុស្សជាច្រើនចូលរួមក្នុងឆ្នាំនេះ។ យើងសង្កេតឃើញភ្ញៀវទេសចរបរទេសច្រើនបានចាប់ផ្ដើមធ្វើដំណើរកម្សាន្តខេត្តនេះនៅក្នុងរយៈពេលពីរបីថ្ងៃចុងក្រោយនេះ»។
លោក សារ៉ា ថ្លែងថា ព្រឹត្តិការណ៍នេះបានរៀបចំដោយប្រើប្រាស់ថវិកាបានពីសាលាខេត្តមានបំណងលើកកម្ពស់ទេសចរណ៍ ខេត្តបាត់ដំបង ជាទិសដៅទេសចរណ៍ដែលកំពុងរីកចម្រើន និងតាមឲ្យទាន់និន្នាការពិភពលោក។ មន្ទីរបានសហការជាមួយសមាគមទេសចរណ៍ប្រទេសថៃ ផងដែរដើម្បីផ្សព្វផ្សាយព្រឹត្តិការណ៍ដល់ភ្ញៀវទេសចរបរទេស។
លោកបន្តថា៖ «ឆ្នាំនេះយើងរៀបចំពិធីបុណ្យនេះជាផ្នែកមួយនៃនិន្នាការពិភពលោក។ ខ្ញុំសង្ឃឹមថានឹងមានមនុស្សជាច្រើនមកកាន់ខេត្តនេះនិងជាការប្រារព្ធពិធីដ៏ធំនៅលើកនេះ។ ភ្ញៀវទេសចរបរទេសភាគច្រើនមកកាន់ខេត្តនេះគឺមកពី កោះឆាង ប៉ាតាយ៉ា និងតាមរយៈច្រកព្រំដែនអន្តរជាតិប៉ោយប៉ែត ដែលឆ្លងកាត់ខេត្តនេះទៅកាន់ទិសដៅបន្ទាប់នៅក្នុងប្រទេសកម្ពុជា»។
លោកបន្តថា៖ «រហូតមកទល់ពេលនេះ ខេត្តបាត់ដំបង ទទួលបានតួលេខបឋមមានភ្ញៀវទេសចរជាង ៩០០០០ នាក់ចាប់ពី ខែមករាដល់ ខែធ្នូ។
លោក នូ សុផល ប្រធានមន្ទីរទេសចរណ៍ខេត្តព្រះសីហនុ បានថ្លែងថា ការប្រារព្ធពិធីសម្រាប់បុណ្យចូល ឆ្នាំសកលនេះទំនងជានឹងរក្សាបានដូចគ្នានឹងការប្រារព្ធពិធីកាលពីឆ្នាំមុនដែរ។
លោកបញ្ជាក់ថា៖ «យើងបានដាក់បំភ្លឺក្រុងនេះជាមួយនឹងអំពូលភ្លើងនៅពេលតុបតែង។ យើងមានការតាំងពិព័រណ៍និងការប្រគំតន្ដ្រី។ នោះគឺជាផ្នែកមួយនៃការរៀបចំពីអាជ្ញាធរនៅកណ្ដាលក្រុង។ សម្រាប់រមណីយដ្ឋាន និងកោះផ្សេងទៀត ម្ចាស់អាជីវកម្មនឹងរៀបចំសកម្មភាព របស់ពួកគេជាផ្នែកមួយនៃការ ខោនដោន នេះសម្រាប់ឆ្នាំសកលនេះ»។
លោករំពឹងថា នឹងមានភ្ញៀវទេសចរសរុប ៧ ម៉ឺននាក់ក្នុងរយៈពេលថ្ងៃសម្រាកបីថ្ងៃនេះ ខណៈដែលខេត្តនេះបានរៀបចំការតាំងពិព័រណ៍ និងការប្រគំតន្ដ្រីនៅលើតំបន់ឆ្នេរអូរឈើទាលដ៏ពេញនិយមបំផុតសម្រាប់ភ្ញៀវទេសចរ៕
