ភ្នំពេញៈ ខេត្តព្រះសីហនុ គឺជាប៉ូលសេដ្ឋកិច្ចមួយក្នុងចំណោមប៉ូលសេដ្ឋកិច្ចទាំង ៣ របស់កម្ពុជា ដែលមានសក្តានុពលខ្ពស់ទាំងផ្នែកពាណិជ្ជកម្ម និងទេសចរណ៍ ខណៈខេត្តប្រជុំដោយកោះ និងឆ្នេរសមុទ្រស្រស់ស្អាតមួយនេះបានទាក់ទាញវិនិយោគិនឲ្យមកបណ្តាក់ទុនប្រមាណជិត ៤ ពាន់លានដុល្លារ គិតត្រឹមពាក់កណ្តាលឆ្នាំ ២០២០ នេះ។
លោក គួច ចំរើន អភិបាលខេត្តព្រះសីហនុបានថ្លែងក្នុងសន្និសីទសារព័ត៌មាននៅទីស្តីការគណៈរដ្ឋមន្ត្រីពីម្សិលមិញថា រដ្ឋាភិបាលកំពុងខិតខំប្រឹងប្រែងអភិវឌ្ឍផ្លូវចំនួនជាង ៣០ ខ្សែនៅក្នុងខេត្តដើម្បីទាក់ទាញភ្ញៀវទេសចរជាតិ និងអន្តរជាតិព្រមទាំងអ្នកវិនិយោគពីក្រៅប្រទេសឲ្យចូលមកបណ្តាក់ទុនបានកាន់តែច្រើន។
លោកបន្តថា បើគិតចាប់ពីឆ្នាំ ១៩៩៤ រហូតដល់ពេលនេះខេត្តព្រះសីហនុមានក្រុមហ៊ុនចំនួន ២០ បានមកវិនិយោគលើគម្រោងអភិវឌ្ឍន៍លើកោះ និងឆ្នេរសមុទ្រនៅលើផ្ទៃដីសរុប ១១ ៦៣៧ ហិកតា ដោយមានទុនវិនិយោគជាង ៣,៩ ពាន់លានដុល្លារ។
លោកថ្លែងថា៖ «ការវិនិយោគយើងបើកទូលាយ យើងចង់បានអ្នកវិនិយោគ និងអ្នកទេសចរមកពីបរទេសដោយយើងអត់កំណត់ទិសដៅមកពីប្រទេសណាទេ។ ប្រទេសចិនជាមហាអំណាចសេដ្ឋកិច្ចទី ២ លើពិភពលោក បើគិតតំបន់អាស៊ីគាត់មានអំណាចជាងគេ ជាប្រទេសមានប្រជាជនច្រើនជាងគេ ជាប្រទេសមានលុយច្រើនជាងគេ វាជាគោលដៅរបស់កម្ពុជា»។
លោកឲ្យដឹងទៀតថា ជាមួយគ្នានេះខេត្តព្រះសីហនុក៏ទទួលបានគម្រោងវិនិយោគលើវិស័យសេវាកម្មទេសចរណ៍ និងសណ្ឋាគារចំនួន ៦០ ដោយមានទុនវិនិយោគសរុបជាង ១០,៧៤ ពាន់លានដុល្លារ គិតមកដល់ពេលនេះ។
លោកនាយករដ្ឋមន្ដ្រី ហ៊ុន សែន ធ្លាប់បានថ្លែងកាលពីដើមខែមិថុនាថា ការស្ថាបនាផ្លូវទាំង ៣៤ ខ្សែ និងហេដ្ឋារចនាសម្ព័ន្ធក្នុងខេត្ដព្រះសីហនុគឺជាចក្ខុវិស័យរបស់រដ្ឋាភិបាលក្នុងការរៀបចំខេត្ដនេះឲ្យក្លាយជាប៉ូលអភិវឌ្ឍន៍ជាតិប្រកបដោយចីរភាព និងជាតំបន់សេដ្ឋកិច្ចពិសេសគំរូពហុបំណងសម្រាប់ទាក់ទាញទេសចរ និងការវិនិយោគថ្មីៗ។
លោកថ្លែងថា៖ «តាមរយៈការអភិវឌ្ឍខេត្ដនេះជាទីក្រុងទំនើបជាមួយរមណីយដ្ឋានឆ្នេរសមុទ្រដែលស្អាតបំផុតលើសកលលោក និងជាតំបន់សេដ្ឋកិច្ចពិសេសគំរូពហុបំណងដែលនឹងទាក់ទាញទេសចរ និងការវិនិយោគថ្មីៗបន្ថែមទៀតពីបរទេស។ ខេត្ដនេះក៏នឹងបម្រើដល់ការរស់នៅដ៏ល្អសម្រាប់ប្រជាពលរដ្ឋខ្មែរផងដែរ»។
លោក តាំង សុចិត្តគ្រឹះស្នា ប្រធានមន្ទីរទេសចរណ៍ខេត្ដព្រះសីហនុប្រាប់ភ្នំពេញប៉ុស្ដិ៍កាលថ្ងៃអង្គារថា វិស័យទេសចរណ៍បានចូលរួមចំណែកបង្កើតការងារដោយផ្ទាល់ឲ្យប្រជាជនក្នុងខេត្តនេះក្នុងឆ្នាំនេះជាង ១ ម៉ឺននាក់ និងផ្តល់ការងារដោយប្រយោលជាង ១ ម៉ឺននាក់ផ្សេងទៀត។
លោកនិយាយថា៖ «រដ្ឋបាលខេត្ដព្រះសីហនុកំពុងអភិវឌ្ឍខេត្ដឲ្យក្លាយទៅជាខេត្ដពហុប៉ូលសេដ្ឋកិច្ចទេសចរណ៍ ហើយពេលនេះក៏កំពុងអភិវឌ្ឍតំបន់ទេសចរណ៍នានាក្នុងខេត្ដព្រះសីហនុព្រមជាមួយការអភិវឌ្ឍឆ្នេរសមុទ្រថ្មីៗជាច្រើនកន្លែងផងដែរ»។
បើយោងតាមអ្នកនាំពាក្យសាលាខេត្តព្រះសីហនុលោក ឃាង ភារម្យ បច្ចុប្បន្នខេត្តព្រះសីហនុមានកោះសរុប ៣២ ក្នុងនោះកោះសង្សារ កោះក្របី និងកោះឫស្សី កំពុងដំណើរអាជីវកម្ម ខណៈរដ្ឋាភិបាលក៏កំពុងអភិវឌ្ឍឆ្នេរសមុទ្រចំនួន ៩ នៅក្នុងខេត្តនេះ ហើយក្រៅពីនេះខេត្តនេះក៏មានឆ្នេរស្រស់ស្អាតជាង ១០ ទៀតនៅតាមបណ្តាកោះផងដែរ៕ LA