ភ្នំពេញៈ ខេត្តព្រះសីហនុត្រូវគេរំពឹងថា នឹងក្លាយជាកន្លែងដ៏មានសក្តានុពលដែលអាចទាក់ទាញវិនិយោគិនចម្រុះសាសន៍ឲ្យចូលទៅបណ្តាក់ទុន បន្ទាប់ពីរដ្ឋាភិបាលកំពុងអភិវឌ្ឍតំបន់ឆ្នេរមួយនេះទៅជាទីក្រុងឆ្លាតដំបូងគេនៅកម្ពុជា។ នេះបើតាមការអះអាងរបស់អ្នកនៅក្នុងខេត្តព្រះសីហនុ។
លោកនាយករដ្ឋមន្ត្រី ហ៊ុន សែន ក្នុងពិធីសំណេះសំណាលជាមួយមន្ត្រីរាជការ និងក្រុមការងារបច្ចេកទេសស្ថាបនាហេដ្ឋារចនាសម្ព័ន្ធផ្លូវនៅក្រុងព្រះសីហនុកាលពីថ្ងៃចន្ទបានលើកឡើងថា តាមរយៈការកសាងហេដ្ឋារចនាសម្ព័ន្ធផ្លូវថ្នល់ជាច្រើន ការដាក់បំពាក់អំពូលឆ្លាតវៃ និងការបំពាក់កាមេរ៉ាសុវត្ថិភាពជាច្រើនដែលរដ្ឋាភិបាលបានចំណាយថវិកាផ្ទាល់ខ្លួនជិត ៣០០ លានដុល្លារ បច្ចុប្បន្នក្រុងព្រះសីហនុបានក្លាយជាទីក្រុងឆ្លាតដំបូងគេនៅកម្ពុជា ដោយបានឈានមុនរាជធានីភ្នំពេញទៀតផង។
លោកថ្លែងថា៖ «ខ្ញុំអាចនិយាយថា ខេត្តព្រះសីហនុគឺបានក្លាយជាទីក្រុងឆ្លាតដែលដើរមុនគេ ក្នុងចំណោមទីក្រុងឆ្លាតនៅកម្ពុជា»។ លោកបន្ថែមថា៖ «គោលដៅធំរបស់យើងនៅពេលនេះគឺបង្កើតឲ្យទៅជាទីក្រុងពហុបំណង»។
ក្នុងន័យជំរុញឲ្យខេត្តក្រុងផ្សេងៗទៀតជ្រើសរើសយកការប្រើអំពូលឆ្លាត លោក ហ៊ុន សែន បាននិយាយថា ចំណុចចម្បងមួយដែលធ្វើឲ្យក្រុងព្រះសីហនុក្លាយជាក្រុងឆ្លាតគឺការបំពាក់អំពូលឆ្លាតប្រមាណជាង ៥០០០ ដែលអំពូលភ្លើងបែបនេះមិនត្រឹមតែជួយបំភ្លឺទីក្រុងប៉ុណ្ណោះទេ តែវាថែមទាំងជួយសន្សំថាមពលអគ្គិសនីបានយ៉ាងច្រើន ហើយលោកក៏បានជំរុញឲ្យកន្លែងផ្សេងទៀតត្រូវគិតគូរពីការប្រើប្រាស់អំពូលភ្លើងឆ្លាតនៅពេលខាងមុខផងដែរ។
លោក ឃុត សុភ័ណ្ឌ អនុប្រធានសភាពាណិជ្ជកម្មខេត្តព្រះសីហនុបានប្រាប់ភ្នំពេញប៉ុស្តិ៍កាលពីថ្ងៃអង្គារថា សេដ្ឋកិច្ច និងចំនួនអ្នកវិនិយោគនឹងមានកំណើនខ្ពស់ក្នុងខេត្តព្រះសីហនុនាពេលឆាប់ៗ ខណៈខេត្តព្រះសីហនុត្រូវគេដឹងថាជាទីតាំងដ៏មានសក្តានុពលសម្រាប់ការវិនិយោគលើគ្រប់វិស័យ ព្រោះទីនោះមិនត្រឹមតែមានទេសភាព និងឆ្នេរសមុទ្រស្រស់ស្អាតប៉ុណ្ណោះទេ តែថែមទាំងជាមជ្ឈមណ្ឌលដឹកជញ្ជូនតាមគ្រប់មធ្យោបាយរបស់ប្រទេសកម្ពុជាទៀតផង។ លោកបន្តថា ព្រះសីហនុកំពុងក្លាយជាទីក្រុងឆ្លាតដំបូងគេនៅកម្ពុជា។
លោកអះអាងថា៖ «នៅពេលទីនេះក្លាយជា Smart City (ទីក្រុងឆ្លាត) នឹងមានអ្នកវិនិយោគមកពីគ្រប់ទិសទីចូលមកវិនិយោគ ព្រោះជាកន្លែងដែលមានភាពអំណោយផលលើការងារគ្រប់បែបយ៉ាង»។
លោក អ៊ឹម សេងហួ ប្រធានសាខាក្រុមហ៊ុនអចលនទ្រព្យ Century 21 Zillion Holding ប្រចាំខេត្តព្រះសីហនុបានប្រាប់ថា ខេត្តព្រះសីហនុនឹងក្លាយជាប៉ូលសេដ្ឋកិច្ចដ៏សំខាន់របស់កម្ពុជាដែលនឹងមានការរីកចម្រើនលើគ្រប់វិស័យ។ វិស័យអចលនទ្រព្យនឹងស្ទុះងើបឡើងថែមទៀតនៅពេលខាងមុខ។ លោកអះអាងថា៖ «ហេដ្ឋារចនាសម្ព័នល្អប្រសើរ និងភាពស៊ីវិល័យក្នុងទីក្រុងនឹងធ្វើឲ្យមានកំណើនអ្នកចូលមកកម្សាន្ត និងវិនិយោគ»។
លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុបាននិយាយថា បច្ចុប្បន្នសកម្មភាពនៃការអភិវឌ្ឍហេដ្ឋារចនាសម្ព័ន្ធក្នុងក្រុងព្រះសីហនុមិនទាន់បញ្ចប់ទាំងស្រុងទេ ចំណែកការបំពាក់អំពូលឆ្លាត ក៏មិនទាន់រួចរាល់ដែរ។
លោកបន្តថា៖ «តាមរយៈការអភិវឌ្ឍហេដ្ឋារចនាសម្ព័ន្ធ ពិសេសផ្លូវទាំង ៣៤ ខ្សែពេលនេះយើងរំពឹងថា ខេត្តព្រះសីហនុនឹងមានកំណើនសេដ្ឋកិច្ចជាបន្តបន្ទាប់តាមរយៈការទាក់ទាញភ្ញៀវទេសចរជាតិ និងអន្តរជាតិក៏ដូចជាអ្នកវិនិយោគទៅលើវិស័យជាច្រើនដូចជាវិស័យទេសចរណ៍ និងឧស្សាហកម្ម (តំបន់សេដ្ឋកិច្ចពិសេស) ជាដើម»៕ LA