.jpg)
ភ្នំពេញៈ រដ្ឋាភិបាលនឹងបង្កើតគណៈកម្មការជាតិការពារអ្នកប្រើប្រាស់ ដើម្បីអនុវត្តច្បាប់ស្តីពីកិច្ចការពារអ្នកប្រើប្រាស់ដែលច្បាប់នេះបង្កើតឡើងក្នុងគោលបំណងធានាឲ្យមានកិច្ចការពារអ្នកប្រើប្រាស់ និងលើកកម្ពស់ការប្រកួតប្រជែងដោយសុចរិត។
លោក ផាន អូន អគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំនៃក្រសួងពាណិជ្ជកម្មប្រាប់ភ្នំពេញប៉ុស្តិ៍ពីថ្ងៃអង្គារថា ក្រសួងពាណិជ្ជកម្មគ្រោងនឹងពិភាក្សាលើសេចក្តីព្រាងអនុក្រឹត្យស្តីពីការរៀបចំ និងប្រព្រឹត្តទៅនៃគណៈកម្មការជាតិការពារអ្នកប្រើប្រាស់ក្នុងសប្តាហ៍នេះ។
លោកថ្លែងថា៖ «អគ្គនាយកដ្ឋានបានធ្វើសេចក្តីព្រាងអនុក្រឹត្យនេះរួចរាល់ហើយយើងនឹងលើកយកពិភាក្សាក្នុងក្របខ័ណ្ឌក្រសួង និងជាមួយម្ចាស់ជំនួយនៅថ្ងៃសុក្រខាងមុខនេះ បន្ទាប់ពីពិភាក្សារួច យើងបញ្ជូនសេចក្តីព្រាងអនុក្រឹត្យនេះទៅទីស្តីការគណៈរដ្ឋមន្ត្រីពិនិត្យ និងសម្រេច»។
ច្បាប់ស្តីពីកិច្ចការពារអ្នកប្រើប្រាស់ត្រូវបានប្រកាសឲ្យប្រើប្រាស់កាលពីថ្ងៃទី ២ វិច្ឆិកា ឆ្នាំ ២០១៩ ដែលមាន ១១ ជំពូក និង ៥១ មាត្រា។ ច្បាប់នេះមានគោលដៅកំណត់វិធានការ និងយន្តការ ដើម្បីចូលរួមចំណែកបង្កើតបរិយាកាសនៃការធ្វើពាណិជ្ជកម្មរួមមានសិទ្ធិ និងផលប្រយោជន៍របស់អ្នកប្រើប្រាស់ត្រូវបានការពារការធ្វើពាណិជ្ជកម្មនោះមានការប្រកួតប្រជែងដោយសុចរិត និងអ្នកប្រើប្រាស់ និងពាណិជ្ជករធ្វើសកម្មភាពជាមួយគ្នាដោយមានទំនុកចិត្ត។
លោកស្រី កែវ មុំ អគ្គនាយិកាក្រុមហ៊ុន LYLY Food Industry Co ដែលជារោងចក្រផលិតនាំស្រួយ លីលី ប្រាប់ភ្នំពេញ ប៉ុស្តិ៍ថា ច្បាប់នេះនឹងជួយទប់ស្កាត់ការនាំចូលផលិតផលចំណីអាហារក្លែងក្លាយ និងការពារសុខភាព សុវត្ថិភាពចំណីអាហាររបស់អ្នកប្រើប្រាស់។
លោកស្រីបន្តថា ច្បាប់នេះក៏នឹងជួយជំរុញឲ្យក្រុមហ៊ុនក្នុងស្រុកពង្រឹកគុណភាពស្តង់ដាអនាម័យ។
លោកស្រីថ្លែងថា៖ «យើងឃើញថា ការនាំចូលផលិតផលសម្រេចមួយចំនួនទាក់ទងនឹងផលិតផលចំណីអាហារគ្មានគុណភាពបានធ្វើឲ្យប៉ះពាល់សុខភាពអ្នកប្រើប្រាស់យ៉ាងខ្លាំង ដូច្នេះក្រុមហ៊ុនខ្ញុំផលិតនំផ្តោតលើសុវត្ថិភាព គុណភាព ចំណីអាហារ ជាចម្បង»។
លោកស្រីបានឲ្យដឹងថា ការនាំចូលផលិតផលនំ ចំណីក្លែងក្លាយ និងគ្មានគុណភាពនឹងធ្វើឲ្យប៉ះពាល់ដល់ទីផ្សារក្នុងស្រុក។ លោកស្រីបញ្ជាក់ថា៖ «ការត្រួតពិនិត្យរបស់យើងនៅមានកម្រិតនៅឡើយ ដែលអាចធ្វើឲ្យប៉ះពាល់ដល់ជីវភាពរបស់ប្រជាពលរដ្ឋ ដូច្នេះក្រសួងត្រូវធ្វើការរឹតបន្តឹងការនាំចូលនំចំណីគ្មានគុណភាពទៅតាមព្រំដែនបន្ថែមទៀត»៕
