ភ្នំពេញៈ គណៈកម្មការទី ៩ នៃរដ្ឋសភាបានអនុម័តទាំងស្រុងលើសេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងពាណិជ្ជកម្មសេរីអាស៊ាន-ហុងកុង (AHKFTA) នៃសាធារណរដ្ឋប្រជាមានិតចិនដែលបើកផ្លូវឲ្យរាជរដ្ឋាភិបាលកម្ពុជាក្នុងការបន្តនីតិវិធីនៃការធ្វើសច្ចាប័នលើកិច្ចព្រមព្រៀងនេះសម្រាប់បើកទីផ្សារនាំចេញថ្មីមួយទៀតនៅក្នុងតំបន់ ដែលផ្នែកឯកជនចាត់ទុកជាទីផ្សារមានសក្តានុពលសម្រាប់ផលិតផលកម្ពុជា។
ការអនុម័តនេះត្រូវធ្វើឡើងរវាងគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ដែលហៅកាត់ថា «គណៈកម្មការទី ៩» នៃរដ្ឋសភាដឹកនាំដោយប្រធានគណៈកម្មការលោកស្រី និន សាផុន ជាមួយនឹងលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មដែលដឹកនាំមន្ត្រីជំនាញស្ថិតក្រោមឱវាទក្រសួងការពារសេចក្តីព្រាងច្បាប់នេះកាលពីថ្ងៃចន្ទ។
បន្ទាប់ពីពិនិត្យលើអត្ថបទកិច្ចព្រមព្រៀងពាណិជ្ជកម្មសេរីអាស៊ាន-ហុងកុង អ្នកស្រី និន សាផុន បានប្រកាសពីការឯកភាពទាំងស្រុងទៅលើបែបបទ និងនីតិវិធីនៃការស្នើសុំសច្ចាប័នលើកិច្ចព្រមព្រៀងនេះ។
លោក ប៉ាន សូរស័ក្តិ បានថ្លែងថា កម្ពុជានឹងទទួលបានអត្ថប្រយោជន៍ជាច្រើនពីកិច្ចព្រមព្រៀងពេលវាចូលជាធរមាន។
លោកថា៖ «ក្រសួងពាណិជ្ជកម្មបានខិតខំប្រឹងប្រែងក្នុងការជំរុញការនាំចេញតាមរយៈការធ្វើពិពិធកម្មទីផ្សារ ទាញយកប្រយោជន៍ឱ្យអស់លទ្ធភាពពីកិច្ចព្រមព្រៀង ពាណិជ្ជកម្មសេរីនានាដែលកម្ពុជាជាសមាជិក និងស្វែងរកទីផ្សារបន្ថែមតាមរយៈការចរចាបង្កើតកិច្ចព្រមព្រៀងពាណិជ្ជកម្មសេរីទ្វេភាគីជាមួយដៃគូពាណិជ្ជកម្មសំខាន់ៗ»។
សេចក្តីព្រាងច្បាប់នេះនឹងត្រូវដាក់ចូលក្នុងរបៀបវារៈនៃកិច្ចប្រជុំពេញអង្គរដ្ឋសភានាពេលខាងមុខ។
លោក សុង សារ៉ន ប្រធានសហព័ន្ធស្រូវ-អង្ករកម្ពុជាបានថ្លែងថា ហុងកុងគឺជាទីផ្សារដ៏មានសក្តានុពលមួយសម្រាប់ផលិតផលកម្ពុជា ជាពិសេសវិស័យកែច្នៃចំណីអាហារ ហើយប្រសិនកិច្ចព្រមព្រៀងនេះចូលជាធរមាន នោះមានន័យថា កម្ពុជាអាចបង្កើនផលិតភាពក្នុងការធ្វើពិពិធកម្មនាំចេញទៅកាន់ទីផ្សារហុងកុងបន្ថែមទៀត។
លោកថ្លែងយ៉ាងដូច្នេះថា៖ «ទីក្រុងហុងកុងគឺជាទីក្រុងមួយដែលមានទំនើបកម្មនៅក្នុងវិស័យចំណីអាហារ ការជួញដូរផ្សេងៗ និងជាច្រកទ្វារហិរញ្ញវត្ថុដ៏សំខាន់នៅក្នុងតំបន់។ ដូច្នេះការសម្រេចបាននូវ FTA ជាការបើកផ្លូវថ្មីមួយសម្រាប់ផលិតផលរបស់យើង»។
កិច្ចព្រមព្រៀងពាណិជ្ជកម្មសេរីចិន អាស៊ាន ហុងកុង ( AHKFTA) ចូលជាធរមានកាលពីថ្ងៃទី ១១ ខែមិថុនា ឆ្នាំ ២០១៩ សម្រាប់ហុងកុង និងប្រទេសជាសមាជិកអាស៊ាន ដូចជាឡាវ មីយ៉ាន់ម៉ា សិង្ហបុរី ថៃ និងវៀតណាម។
ស្ថិតក្រោមកិច្ចព្រមព្រៀង AHKFTA ហុងកុង និងសិង្ហបុរីផ្ដល់ការចូលទីផ្សារដោយរួចពន្ធ ហើយនឹងដាក់បញ្ចូលពន្ធគយសូន្យនៅពេលកិច្ចព្រមព្រៀងនេះចូលជាធរមាន។ ប្រទេសប្រ៊ុយណេ ម៉ាឡេស៊ី ហ្វីលីពីន និងថៃនឹងលុបចោលពន្ធគយលើផលិតផល ៨៥ ភាគរយ ដែលបានជួញដូរជាមួយហុងកុងក្នុងរយៈពេល ១០ ឆ្នាំ និងកាត់បន្ថយបន្ទាត់ពន្ធ ១០ ភាគរយផ្សេងទៀតក្នុងរយៈពេល ១៤ ឆ្នាំ។
ប្រទេសឥណ្ឌូនេស៊ី និងវៀតណាមនឹងលុបចោលពន្ធគយលើផលិតផល ៧៥ ភាគរយក្នុងរយៈពេល ១០ ឆ្នាំ និងកាត់បន្ថយបន្ទាត់ពន្ធ ១០ ភាគរយផ្សេងទៀតក្នុងរយៈពេល ១៤ ឆ្នាំ។ ចំណែកកម្ពុជា ឡាវ និងមីយ៉ាន់ម៉ានឹងលុបចោលពន្ធគយលើផលិតផលរបស់ពួកគេ ៦៥ ភាគរយក្នុងរយៈពេល ១៥ ឆ្នាំ និងកាត់បន្ថយបន្ទាត់ពន្ធ ២០ ភាគរយផ្សេងទៀតក្នុងរយៈពេល ២០ ឆ្នាំ។
AHKFTA និងអាស៊ាន-ហុងកុង កិច្ចព្រមព្រៀងវិនិយោគចិន (AHKIA) ត្រូវបានចុះហត្ថលេខាដោយរដ្ឋមន្ដ្រីក្រសួងសេដ្ឋកិច្ចអាស៊ាន និងលេខាធិការទទួលបន្ទុកការអភិវឌ្ឍពាណិជ្ជកម្ម និងសេដ្ឋកិច្ចរបស់ហុងកុងកាលពីថ្ងៃទី ១២ ខែវិច្ឆិកាឆ្នាំ ២០១៧ នៅទីក្រុង Pasay City ប្រទេសហ្វីលីពីន។
អាស៊ានគឺជាដៃគូពាណិជ្ជកម្មឈានមុខគេទី ២ របស់ហុងកុងផ្នែកពាណិជ្ជកម្មទំនិញកាលពីឆ្នាំ ២០១៩ និងជាកិច្ចព្រមព្រៀងឈានមុខគេទី ៤ ផ្នែកពាណិជ្ជកម្មសេវាកម្មកាលពីឆ្នាំ ២០១៨។ ពាណិជ្ជកម្មទំនិញសរុបរវាងហុងកុង និងអាស៊ានមានចំនួន ១០១៨ ពាន់លានដុល្លារហុងកុង កាលពីឆ្នាំ ២០១៩ និងពាណិជ្ជកម្មសេវាកម្មសរុបរវាងភាគីទាំង ២ មានចំនួន ១៣៧ ពាន់លានដុល្លារហុងកុង កាលពីឆ្នាំ ២០១៨។ នេះបើយោងតាមក្រសួងពាណិជ្ជកម្ម និងឧស្សាហកម្មរបស់តំបន់រដ្ឋបាលពិសេសហុងកុង។
កាលពីចុងឆ្នាំ ២០១៨ អាស៊ានជាប់ចំណាត់ថ្នាក់ទី ៤ ក្នុងចំណោមទិសដៅនៃការវិនិយោគផ្ទាល់ខាងក្រៅជាច្រើនរបស់ហុងកុងមានភាគហ៊ុនចំនួន ៤៨០ ពាន់លានដុល្លារហុងកុង និងជាប់ចំណាត់ថ្នាក់ទី ៦ នៃប្រភពវិនិយោគផ្ទាល់ខាងក្រៅរបស់ហុងកុង៕LA