.jpg)
ទិដ្ឋភាពនៃតំបន់ឆ្នេរមួយកន្លែងក្នុងខេត្តព្រះសីហនុកាលពីដើមឆ្នាំ ២០១៨។ ហេង ជីវ័ន
ភ្នំពេញៈ ក្រុមហ៊ុនក្នុងស្រុក Rice Natural Development Plc បានប្រកាសពីគម្រោងវិនិយោគរួមគ្នាជាមួយវិនិយោគិនអង់គ្លេស និងសិង្ហបុរី នូវទឹកប្រាក់ជាង ៥០ លានដុល្លារ ដើម្បីវិនិយោគលើការអភិវឌ្ឍសួនទេសចរណ៍ឆ្នេរសមុទ្រនៅខេត្តព្រះសីហនុ។ នេះបើតាមអគ្គនាយកក្រុមហ៊ុនបានប្រាប់ឲ្យដឹងកាលពីថ្ងៃម្សិលមិញ។
គម្រោងដែលនឹងសាងសង់លើផ្ទៃដីទំហំ ១,៨ ហិកតា ជាប់មាត់សមុទ្រក្នុងខេត្តព្រះសីហនុរួមមាន ការសាងសង់កំពង់ផែទេសចរណ៍ដ៏ទំនើបមួយដែលនឹងមានទូកទេសចរណ៍ ១០ គ្រឿង សម្រាប់ដឹកភ្ញៀវ សណ្ឋាគារកម្ពស់ ៥ ជាន់ចំនួន ២ ដែលមាន ២០០ បន្ទប់ បាងហ្គាឡូចំនួន ៣៥ ខ្នង និងមានកន្លែងលក់ទំនិញជាច្រើនទៀត។
លោក រស់ សុវណ្ណវាសនា អគ្គនាយកក្រុមហ៊ុន Rice Natural Development Plc បានប្រាប់ភ្នំពេញ ប៉ុស្តិ៍ ថា ក្រុមហ៊ុនបានដាក់គម្រោងអភិវឌ្ឍន៍នេះទៅអាជ្ញាធរខេត្តព្រះសីហនុដើម្បីពិនិត្យរួចហើយ។
ខណៈបច្ចុប្បន្នទីក្រុងព្រះសីហនុពោរពេញដោយជនជាតិចិន លោក សុវណ្ណវាសនា បានឲ្យដឹងថា៖ «គម្រោងនេះនឹងត្រូវធ្វើឡើងយ៉ាងពិសេសសម្រាប់ការកម្សាន្តរបស់ភ្ញៀវក្នុងស្រុក និងភ្ញៀវមកពីតំបន់អឺរ៉ុប ដូច្នេះគម្រោងនេះនឹងមិននៅជិតជាមួយគម្រោងអភិវឌ្ឍន៍ដ៏ច្រើនរបស់វិនិយោគិនចិនទេ»។
ទោះយ៉ាងណាក្រុមហ៊ុនមិនបានប្រាប់ពីទីតាំងជាក់លាក់នៃគម្រោងនេះទេ ដោយអះអាងថាដើម្បីឲ្យមានការភ្ញាក់ផ្អើល ដែលអាចនាំឲ្យតម្លៃអចលនទ្រព្យកើនឡើងខ្ពស់។
លោក សុវណ្ណវាសនា ថ្លែងថា៖ «នៅខេត្តព្រះសីហនុមានកោះជាច្រើនដែលមានទេសភាព និងបរិស្ថានដ៏ស្រស់ស្អាត ប៉ុន្តែមធ្យោបាយធ្វើដំណើរទៅទីនេះនៅមិនទាន់មានភាពល្អប្រសើរទេ នេះគឺជាមូលហេតុចម្បងដែលខ្ញុំរួមជាមួយដៃគូវិនិយោគបរទេសចាប់អារម្មណ៍ក្នុងការសាងសង់ផែទូកទេសចរណ៍»។
លោក គួច ចំរើន អភិបាលខេត្តព្រះសីហនុដែលបានជួបពិភាក្សាគ្នាជាមួយថ្នាក់ដឹកនាំក្រុមហ៊ុន Rice Natural Development Plc កាលពីថ្ងៃចន្ទបាននិយាយថា លោកស្វាគមន៍ចំពោះផែនការនេះ ប៉ុន្តែបានស្នើឲ្យក្រុមហ៊ុនបន្តធ្វើការសិក្សាបន្ថែមទៀតជាមួយមន្ត្រីជំនាញនៃមន្ទីរទេសចរណ៍ខេត្តព្រះសីហនុ។
ប្រធានមន្ទីរទេសចរណ៍ ខេត្តព្រះសីហនុលោក តាំង សុចិត្តគ្រឹស្នា បានឲ្យដឹងថា គម្រោងនេះស្ថិតក្នុងតំបន់រាម។ លោកថ្លែងថា៖ «ខ្ញុំកំពុងពិនិត្យការងារនេះ និងប្រាប់ក្រុមហ៊ុនឲ្យរៀបចំផែនការមួយចំនួនឡើងវិញ»។
លោក សុចិត្តគ្រឹស្នា បានបន្តថាដោយសារផែនការសាងសង់របស់ក្រុមហ៊ុនមិនទាន់មានភាពច្បាស់លាស់ ហេតុនេះក្នុងនាមមន្ត្រីជំនាញលោកបានណែនាំឲ្យក្រុមហ៊ុនរៀបចំផែនការឲ្យបានលម្អិត ដើម្បីយកទៅធ្វើបទបង្ហាញដល់ថ្នាក់ដឹកនាំខេត្តពិនិត្យម្តងទៀតចៀសវាងមានបញ្ហាកើតឡើងនៅពេលសាងសង់។
ទីប្រឹក្សាសមាគមទីភ្នាក់ងារទេសចរណ៍កម្ពុជាលោក ហូ វណ្ឌី បាននិយាយថា ជាមួយនឹងកំណើនភ្ញៀវទេសចរជាបន្តបន្ទាប់ កម្ពុជាចាំបាច់ត្រូវតែយកចិត្តទុកដាក់ទៅលើការអភិវឌ្ឍគម្រោងថ្មីៗដែលគោរពតាមស្តង់ដាបរិស្ថាន។
លោកបន្តថា៖ «ការទទួលបានគម្រោងអភិវឌ្ឍថ្មីៗជាព័ត៌មានល្អសម្រាប់វិស័យទេសចរ តែបើគម្រោងទាំងនោះមិនផ្តោតទៅលើកត្តាបរិស្ថាន និងគោរពតាមប្លង់មេត្រឹមត្រូវនោះ វានឹងធ្វើឲ្យអន្តរាយដល់វិស័យទេសចរណ៍ទៅវិញ»៕LA
