.jpg)
សម្បុកត្រចៀកកាំមិនទាន់សម្អាតមានតម្លៃពី ៥០០-៨០០ ដុល្លារ ក្នុង ១ គីឡូក្រាម និងសម្បុកសម្អាតរួចមានតម្លៃពី ១ ៨០០ ដុល្លារ ដល់ ៣ ៥០០ ដុល្លារ។ រូបថត ភ្នំពេញ ប៉ុស្តិ៍
ភ្នំពេញៈ ការអូសបន្លាយពេលនៃការឆ្លងរាលដាលកូវីដ ១៩ និងឧបសគ្គចម្បងៗចំនួន ២ កំពុងធ្វើឱ្យក្តីសង្ឃឹមក្នុងការនាំចេញផលិតផលទឹកមាត់ត្រចៀកកាំពីកម្ពុជាទៅទីផ្សារប្រទេសចិន ជាផ្លូវការនឹងត្រូវបន្តអូសបន្លាយពេលបន្ថែមទៀត។
លោក ងិន ឆាយ អគ្គនាយកនៃអគ្គនាយកដ្ឋានកសិកម្ម ក្រសួងកសិកម្ម រុក្ខាប្រមាញ់ និងនេសាទបានប្រាប់ភ្នំពេញប៉ុស្តិ៍កាលពីថ្ងៃទី ១ ខែមេសាថា បើទោះបីមន្ត្រីជំនាញ និងវិស័យឯកជនកំពុងខិតខំធ្វើការជាមួយគ្នាក៏ការនាំចេញទឹកមាត់ត្រចៀកកាំកម្ពុជាទៅប្រទេសចិននឹងមិនអាចកើតមានក្នុងពេលឆាប់ៗទេ ព្រោះមានឧបសគ្គធំៗចំនួន ២ គឺការចរចាជាមួយភាគីចិន និងបញ្ហាក្នុងស្រុក។
លោកបន្តថា បញ្ហាខាងក្រៅគឺភាគីចិនបានកំណត់គោលការណ៍ក្នុងការចរចាថា នឹងមិនអាចយកផលិតផល ២ មុខមកចរចាក្នុងពេលតែមួយបានទេ ចំណែកបញ្ហាខាងក្នុងគឺសមត្ថភាពការកែច្នៃដែលនៅមិនទាន់គោរពតាមស្តង់ដាចិន។
លោកថ្លែងថា៖ «ជារួមយើងកំពុងស្ថិតក្នុងដំណាក់កាលនៃការបំពេញឯកសារឆ្លើយតបភាគីចិននៅឡើយ ហើយបើទោះបីយើងធ្វើការនេះរួចរាល់ក៏ជាគោលការណ៍របស់ភាគីចិនគេមិនអនុញ្ញាតដែរ ព្រោះគេកំណត់ថា នៅពេលដែលការចរចាលើលក្ខខណ្ឌភូតគាមអនាម័យចប់ ១ មុខទំនិញ ទើបគេបន្ត ១ មុខទៀត ខណៈបច្ចុប្បន្នយើងកំពុងជំរុញខ្លាំងលើដំណាំស្វាយស្រស់ ដែលឈានដល់ដំណាក់កាលចុងក្រោយ និងបន្ទាប់មកទៀត គឺផ្លែមៀនប៉ៃលិន»។
កាលពីដើមខែ មិថុនា ឆ្នាំ ២០២០ កម្ពុជា និងចិនបានចុះកិច្ចព្រមព្រៀងជាផ្លូវការដើម្បីបើកផ្លូវឱ្យមានការនាំចេញស្វាយស្រស់ពីកម្ពុជាទៅទីផ្សារប្រទេសចិនចំនួន ៥០ ម៉ឺនតោន ក្នុង ១ ឆ្នាំ ប៉ុន្តែមកទល់ពេលនេះការនាំចេញមិនទាន់កើតឡើងទេ ដោយសារការកំណត់ភូតគាមអនាម័យរបស់ចិន។
កន្លងមកកម្ពុជាបានដាក់ទឹកមាត់ត្រចៀកកាំជាផលិតផលដែលត្រូវចរចាជាមួយភាគីចិន បន្ទាប់ពីផ្លែមៀនប៉ៃលិន។ លោកបញ្ជាក់ថា៖ «ពេលនេះយើងមានគំនិតចង់សុំឱ្យភាគីចិនចរចា ១ ដងចាប់ពី ២ មុខទំនិញឡើងទៅ»។
ជាមួយគ្នានេះលោកក៏បានលើកឡើងពីបញ្ហាកង្វះរោងចក្រ ឬសិប្បកម្មកែច្នៃទឹកមាត់ត្រចៀកកាំដែលមិនទាន់មានលក្ខណៈស្តង់ដា។ លោកនិយាយថា៖ «តាមការស្រាវជ្រាវ គឺកម្ពុជានៅមិនទាន់មានការរៀបចំរោងចក្រកែច្នៃណាមួយដែលមានកម្រិត ISO នៅឡើយទេ»។
បច្ចុប្បន្ននេះកម្ពុជាមានផលិតផលកសិកម្ម ៤ មុខដែលត្រូវបានអនុញ្ញាតជាផ្លូវការឱ្យនាំទៅប្រទេសចិន រួមមាន ពោត ដំឡូងមី អង្ករ និងចេក។
លោក ណាង សុធី ប្រធានសហព័ន្ធសម្បុកត្រចៀកកាំកម្ពុជាបាននិយាយថា ការរីករាលដាលជំងឺកូវីដ១៩ បានធ្វើឱ្យការចុះមកពិនិត្យគុណភាពនៅទីតាំងផ្ទាល់របស់អ្នកជំនាញចិននៅកម្ពុជាត្រូវពន្យារពេលជាបន្តបន្ទាប់។
លោកបញ្ជាក់ថា៖ «ការនាំចេញទឹកមាត់ត្រចៀកកាំជាផ្លូវការទៅចិននឹងត្រូវការពេលយូរទៀត ព្រោះនៅបាំង ២ មុខទំនិញសំខាន់ជាមុនសិន»។
យោងតាមលោក សុធី គុណភាពសម្បុកត្រចៀកកាំកម្ពុជាត្រូវបានគេទទួលស្គាល់ថា មានគុណភាពល្អ ព្រោះកម្ពុជាមានតំបន់ធម្មជាតិច្រើន និងមិនសូវមានឧស្សាហកម្មធំៗដែលបញ្ចេញផ្សែងច្រើន។
តម្លៃផលិតផលពីសត្វត្រចៀកកាំនៅកម្ពុជាមិនប្រែប្រួលទេនាពេលនេះធៀបនឹងចុងឆ្នាំ ២០២០ ដោយសម្បុកត្រចៀកកាំមិនទាន់សម្អាតមានតម្លៃពី ៥០០-៨០០ ដុល្លារ ក្នុង ១ គីឡូក្រាម និងសម្បុកសម្អាតរួចមានតម្លៃពី ១ ៨០០ ដុល្លារ ដល់ ៣ ៥០០ ដុល្លារ។
នៅកម្ពុជាមានផ្ទះអភិរក្សត្រចៀកកាំប្រមាណ ៣ ០០០ ខ្នង៕ LA
