ភ្នំពេញ៖ ដំណើរការសាងសង់គម្រោងសួនបណ្តុំសហគ្រាសធុនតូច និងមធ្យម (Worldbridge I4.0 SME Cluster) មានតម្លៃប្រហែល ៣០ លានដុល្លារ របស់ក្រុមហ៊ុន វើលដ៍ ប្រ៊ីដ អ៊ិនដាសស្ទ្រៀល ឌីវេឡុបមិន អាចនឹងយឺតពេលជាងផែនការគ្រោងទុករយៈពេល ១ ខែ ដោយសារការបិទខ្ទប់ក្រុងភ្នំពេញ និងក្រុងតាខ្មៅ ខេត្តកណ្តាលនាពេលកន្លងមក ដើម្បីទប់ស្កាត់ការរីករាលដាលជំងឺកូវីដ ១៩។
សួនបណ្តុំសហគ្រាសធុនតូច និងមធ្យមនេះ ត្រូវបានសាងសង់លើផ្ទៃដីសរុប ៦ ហិកតា ក្នុងសង្កាត់រកាខ្ពស់ក្រុងតាខ្មៅ ខេត្តកណ្តាល ទល់មុខនឹងគម្រោងអភិវឌ្ឍន៍លំនៅឋានតម្លៃសមរម្យ «ទីក្រុងរណបសិរីមង្គល» របស់ក្រុមហ៊ុន Worldbridge Homes Co.,Ltd ដែលជាក្រុមហ៊ុនបុត្រសម្ព័ន្ធរបស់ Worldbridge Group។
គម្រោងនេះ ត្រូវបានបុកគ្រឹះសាងសង់កាលពីថ្ងៃទី ២៧ ខែ វិច្ឆិកា ឆ្នាំ ២០២០ ដែលតាមផែនការគម្រោងនេះ នឹងសាងសង់រួចក្នុងរយៈពេល ៨ ខែ ចាប់ពីថ្ងៃបុកគ្រឹះ។
លោក សៀ ឫទ្ធី ប្រធានក្រុមប្រឹក្សាភិបាលនៃសម្ព័ន្ធក្រុមហ៊ុន វើលដ៍ ប្រ៊ីដ អ៊ិនដាសស្ទ្រៀល ឌីវេឡុបមិន ឯ.ក Worldbrigde Industrial Development Co.,Ltd) ប្រាប់ ភ្នំពេញ ប៉ុស្ដិ៍ថា សព្វថ្ងៃគម្រោងនេះដំណើរសាងសង់ជាធម្មតា ប៉ុន្តែអាចនឹងយឺតពេលជាងផែនការគ្រោងទុក។
លោកប្រាប់ថា៖ «យើងកំពុងដំណើរការសាងសង់ ប៉ុន្តែអាចយឺតពេល ១ ទៅ ២ ខែ យើងឃើញថា មានសហគ្រាសធុនតូច និងមធ្យមជាច្រើនបានចាប់អារម្មណ៍លើបណ្តុំសហគ្រាសធុនតូច និងមធ្យមនេះ»។
សួនបណ្តុំសហគ្រាសធុនតូច និងមធ្យមនេះ ចែកចេញជា ៧ ផ្នែក រួមមានមជ្ឈមណ្ឌលសេវាកម្ម មជ្ឈមណ្ឌលទ្រទ្រង់គ្រឿងបរិក្ខារឧស្សាហកម្មចង្កោមសហគ្រាសធុនតូច និងមធ្យម ហេដ្ឋារចនាសម្ព័ន្ធ មជ្ឈមណ្ឌលភ័ស្តុភារកម្ម និងសេវាកម្ម ភាពងាយស្រួលក្នុងការប្រកបធុរកិច្ច ភាពងាយស្រួលដល់កម្មករក្នុងការប្រកបការងារ និងផ្តល់សេវាកម្មគាំទ្រដទៃទៀត។
ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា លោក តែ តាំងប៉ ប្រាប់ ភ្នំពេញ ប៉ុស្តិ៍ថា បណ្តុំសហគ្រាសធុនតូច និងមធ្យមនេះ គឺមានកម្រិតស្តង់ដាអន្តរជាតិដែលអាចភ្ជាប់ទំនាក់ទំនងជាមួយរោងចក្រ សហគ្រាសនៅក្រៅប្រទេស។
លោកនិយាយថា៖ «ការបើកសួនឧស្សាហកម្មនេះ គឺស័ក្តិសមសម្រាប់សហគ្រាសធុនតូច និងមធ្យមដែលមានស្តង់ដាយើងគាំទ្រគម្រោងនេះ ដើម្បីចូលរួមចំណែកជំរុញសហគ្រាសធុនតូច និងមធ្យម ដែលមានលទ្ធភាពឲ្យចូលទៅក្នុងតំបន់ឧស្សាហកម្មរបស់ក្រមហ៊ុន វើលដ៍ ប្រ៊ីដ»។
លោក តាំងប៉ ឲ្យដឹងថា អ្នកដែលចូលទៅក្នុងតំបន់ឧស្សាហកម្មនេះ នឹងទទួលបានការលើកទឹកចិត្តពីរដ្ឋាភិបាលលើផ្នែកពន្ធដា និងពន្ធគយ។ ការអនុគ្រោះពន្ធនេះ នឹងជួយទាក់ទាញសហគ្រាសធុនតូច និងមធ្យម ចូលទៅបណ្តុំសហគ្រាសធុនតូច និងមធ្យមនេះយ៉ាងច្រើន។
លោកបន្ថែមទៀតថា៖ «សម្រាប់សហគ្រាសធុនតូច និងមធ្យមនៅក្នុងស្រុក យើងទាល់តែមានខ្នាតធំ ទើបអាចមានលទ្ធភាពចូលទៅបណ្តុំនេះបាន រីឯពួកខ្ញុំសហគ្រាសដែលភាគច្រើនជាសិប្បកម្មតូចៗនឹងមិនមានលទ្ធភាពចូលទៅក្នុងបណ្តុំនេះទេ ព្រោះចំណាយខ្ពស់»។
លោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានថ្លែងក្នុងកម្មវិធីបុកគ្រឹះសាងសង់គម្រោងនេះ កាលពីខែវិច្ឆិកា ឆ្នាំមុនថា សហគ្រាសធុនតូច និងមធ្យមទាំងអស់នៅកម្ពុជាត្រូវចាប់យកបច្ចេកវិទ្យាឧស្សាហកម្ម ៤.០ ដើម្បីចូលទៅក្នុងខ្សែចង្វាក់ផលិតកម្មរបស់ខ្លួនក្នុងសួនបណ្តុំសហគ្រាសធុនតូច និងមធ្យមនេះ។
លោកថ្លែងថា៖ «យើងបង្កើតសួនឧស្សាហកម្មសហគ្រាសធុនតូច និងមធ្យមនេះ ដើម្បីជួយឧបត្ថម្ភគាំទ្រ និងតម្រង់ទិសពួកគាត់សម្រាប់នាំចេញទំនិញទៅទីផ្សារពិភពលោក»។
លោក ចម ប្រសិទ្ធ ថ្លែងទៀតថា សួនឧស្សាហកម្មនេះ ពិតជាមានសារៈសំខាន់ណាស់សម្រាប់ពួកគេផលិតទំនិញនាំចេញ ដើម្បីបំពេញតម្រូវការទីផ្សារ។
លោកអះអាងថា៖ «យើងកំពុងលើកទឹកចិត្តពួកគាត់ឱ្យចាប់យកបច្ចេកវិទ្យាចុងក្រោយមកចូលនៅក្នុងបណ្តុំសួនឧស្សាហកម្មនេះ សម្រាប់ផលិតនាំចេញទៅតាមតម្រូវការទីផ្សារ»៕